سولتۇستىك قازاقستان جانە اقمولا وبلىسىنىڭ 16 تۇرعىنى ەمتيحانسىز جۇرگىزۋشى كۋالىگىن الامىن دەپ الاياققا الداندى, دەپ حابارلايدى Egemen.kz.
سقو پوليتسيا دەپارتامەنتى ءباسپاسوز قىزمەتىنىڭ مالىمەتىنشە, سقو مەن اقمولا وبلىسىندا 16 ادام الاياققا «جەم» بولدى. ولار ەمتيحان تاپسىرماي جۇرگىزۋشى كۋالىگىن الۋعا بولادى دەگەن جالعان ۋادەگە سەنىپ, ونداعان مىڭ تەڭگەسىنەن ايىرىلعان. زارداپ شەككەندەردىڭ ءبىرى - تايىنشا اۋدانىنىڭ تۇرعىنى.
الاياققا الدانعانىن بىلگەن ول پوليتسياعا جۇگىنگەن. جەدەل-ىزدەستىرۋ ءىس-شاراسى ناتيجەسىندە اۋدان پوليتسەيلەرى 34 جاستاعى كوكشەتاۋ قالاسىنىڭ تۇرعىنىن انىقتادى. قازىرگى ۋاقىتتا ول تەرگەۋ يزولياتورىندا قاماۋدا وتىر.
قر قىلمىستىق كودەكسىنىڭ 190-بابى 3-بولىگى «الاياقتىق» بويىنشا سوتقا دەيىنگى تەرگەپ-تەكسەرۋ جۇرگىزىلىپ جاتىر. بۇگىنگى تاڭدا قىلمىستىق ىستە 16 ەپيزود تىركەلگەن.
«بەلگىلەنگەن راسىمدەردى اينالىپ ءوتىپ, جۇرگىزۋشى كۋالىگىن ساتىپ الۋ زاڭعا قايشى كەلەدى. دەگەنمەن, مۇنداي قادامعا باراتىن ادامدار دا كەزدەسىپ جاتادى. مۇنى, ءوز كەزەگىندە, الاياقتار پايدالانادى. زارداپ شەككەندەردىڭ ءبىرى كۇدىكتىمەن ينتەرنەتتە اۆتوكولىك ساتۋ تۋرالى حابارلاندىرۋ بويىنشا بايلانىسقا شىققان. ەر ادام جۇرگىزۋشى كۋالىگىن زاڭسىز ءارى جىلدام الۋعا بولاتىنىن ايتقان. اۋىل تۇرعىنى كەلىسىمىن بەرىپ, جاڭا تانىسىنىڭ تەلەفون ءنومىرىن العان. وسىلايشا, ادامنان ادامعا تاراپ, زاڭسىز قۇجات العىسى كەلمەك بولعانداردىڭ سانى ارتقان. كەلتىرىلگەن شىعىن سوماسى 65 مىڭ تەڭگەدەن باستالادى. ەگەر ادامدار زاڭدى اينالىپ ءوتىپ جاتسا, الاياقتاردىڭ بۇرىننان قولدانىپ كەلە جاتقان ايلالارىنا ءتۇسۋى مۇمكىن. زاڭنامانى قاتاڭ ساقتاپ, كۇماندى ۇسىنىسقا كەلىسىم بەرمەۋدى سۇرايمىز», دەيدى تايىنشا اۋداندىق پوليتسيا باسقارماسىنىڭ باستىعى نۇرلىجان اقتانوۆ.