استانا. 30 ءساۋىر. مەملەكەت باسشىسى نۇرسۇلتان نازارباەۆ م.ۆ.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىندە وقىعان ءدارىسى كەزىندە 2025 جىلعا دەيىنگى كەزەڭدى قامتيتىن ەۋرازيالىق يننوۆاتسيالىق-تەحنولوگيالىق ءوزارا ءىس-قيمىلدار باعدارلاماسىن قابىلداۋدىڭ اسا ماڭىزدى ەكەنىنە توقتالدى. بۇل تۋرالى egemen.kz ءتىلشىسى حابارلادى.
مەملەكەت باسشىسىنىڭ ايتۋىنشا, ۇلتتىق ەكونوميكالار مەن ەۋرازيالىق ينتەگراتسيا كەڭىستىگىنىڭ يننوۆاتسيالىق-تەحنولوگيالىق سەرپىلىسى ءۇشىن قاجەتتى جاعدايلار جاساۋ كەرەك. سوندىقتان, 2025 جىلعا دەيىنگى كەزەڭگە باعىتتالعان ەۋرازيالىق يننوۆاتسيالىق-تەحنولوگيالىق ءوزارا ءىس-قيمىلدار باعدارلاماسىن ازىرلەگەن ءجون.
پرەزيدەنت بۇل باعدارلامادا نەعۇرلىم پەرسپەكتيۆالى باعىتتار بويىنشا, ماسەلەن, مينەرالدى رەسۋرستاردى تەرەڭدەتىپ قايتا وڭدەۋ جانە اەروعارىش, حيميا, ماشينا جاساۋ, اگرووندىرىس, ەنەرگەتيكا, كولىك سالالارىندا يندۋستريالىق كونسورتسيۋمدار قۇرۋ ىستەرى قامتىلۋى ءتيىس ەكەنىنە ءمان بەردى. بۇعان قوسا, ول: «ءبىزدىڭ يننوۆاتسيالار سالاسىنداعى قىزمەتتەستىگىمىزدىڭ ماسەلەلەرىمەن اينالىساتىن تەڭبە-تەڭ نەگىزدەگى ەۋرازيالىق يننوۆاتسيالىق كەڭەس تاعايىنداۋ ماڭىزدى دەپ سانايمىن», – دەدى.
ءدارىس بارىسىندا مەملەكەت باسشىسى تاراپىنان ەكىجاقتى جانە كوپجاقتى نەگىزدە بىرلەسكەن عىلىمي-زەرتتەۋ كلاستەرلەرىن قۇرۋ قاجەتتىگى دە ايتىلدى.
نۇرسۇلتان نازارباەۆتىڭ پىكىرىنشە, ەۋرازيالىق ەكونوميكالىق وداق اياسىنداعى ناقتى جوبالار ەكونوميكالىق ينتەگراتسيانىڭ قوزعاۋشى كۇشىنە اينالىپ, باسەكەگە قابىلەتتى ونىمدەر شىعارىپ, جۇمىس ورىندارىن قۇرىپ, ۇلتتىق بيۋدجەتتەرگە اۋدارىمداردى كوبەيتۋى ءتيىس.
جولدىباي بازار.
دەرەككوز: egemen.kz.
فوتو: Nur.kz.