پرەمەر-مينيستر ءاليحان سمايىلوۆ قازاقستان ەكونوميكاسىن جاڭعىرتۋ ماسەلەلەرى جونىندەگى مەملەكەتتىك كوميسسيانىڭ وتىرىسىن وتكىزدى, دەپ حابارلايدى Egemen.kz.
ۇكىمەتتىڭ ءباسپاسوز قىزمەتىنىڭ مالىمەتىنشە, وتىرىستا سالىق سالۋ نورمالارى, ونىڭ ىشىندە سالىق سالۋ ماقساتتارى ءۇشىن «رويالتي» ۇعىمىن قولدانۋ, ەنەرگيا ءوندىرۋشى ۇيىمداردىڭ مۇلكىنە سالىق سالۋ وبەكتىسىن ايقىنداۋ بويىنشا, سونداي-اق ققس ەسەپكە جاتقىزۋ ادىسىمەن تولەنەتىن تاۋارلاردىڭ جاڭارتىلعان تىزبەسىن قولدانۋ مەرزىمى قارالعان.
تالقىلاۋ قورىتىندىسى بويىنشا پرەمەر-مينيستر العاشقى ەكى ماسەلەنى بارلىق مۇددەلى تاراپتاردىڭ پىكىرىن جانە الەۋمەتتىك-ەكونوميكالىق جاعدايعا ىقتيمال اسەرىن ەسكەرە وتىرىپ, قوسىمشا پىسىقتاۋدى تاپسىردى.
سونداي-اق وتىرىستا قىزىلوردا وبلىسى ارال اۋدانى اۋماعىندا كالتسيلەنگەن سودا ءوندىرۋ زاۋىتىن سالۋ جوباسى قارالدى. ونى ىسكە اسىرۋ شامامەن 140 ملرد تەڭگە ينۆەستيتسيا تارتۋعا, 700-دەن استام تۇراقتى جۇمىس ورنىن اشۋعا جانە جىلىنا 300 مىڭ تونناعا جۋىق ءونىم ءوندىرۋ ەسەبىنەن يمپورتتى الماستىرۋعا مۇمكىندىك بەرەدى.
پرەمەر-مينيستر زاۋىتقا قاجەتتى ينفراقۇرىلىم قۇرىلىسىن قارجىلاندىرۋ مۇمكىندىگىن قاراستىرۋدى, سونداي-اق جوبانى ينۆەستور تارتۋ تۇرعىسىنان پىسىقتاۋدى جالعاستىرۋدى تاپسىردى. سونىمەن قاتار وتىرىسقا قاتىسۋشىلار اقتاۋدا كوپفۋنكتسيونالدى قوناق ءۇي-تۋريستىك كەشەن سالۋ ماسەلەلەرىن تالقىلادى. بۇل 170 ملرد تەڭگە ينۆەستيتسيا تارتۋعا, 4000-عا جۋىق تىكەلەي جانە جاناما جۇمىس ورنىن اشۋعا, سونداي-اق ماڭعىستاۋ وبلىسىنا تۋريستىك اعىندى 850 مىڭ ادامعا دەيىن ۇلعايتۋعا مۇمكىندىك بەرەدى.
ۇكىمەت باسشىسى جوبانى ىسكە اسىرۋدى جەدەلدەتۋدى جانە قۇرىلىسى باستالعان بارلىق وبەكتىلەردى اياقتاۋ ءۇشىن «قدب» اق بيۋدجەتتىك نەسيە ءبولۋ مۇمكىندىگىن قاراستىرۋدى تاپسىردى. وتىرىسقا قاتىسۋشىلار مەملەكەت يەلىگىنەن الۋ جانە جەكەشەلەندىرۋ ماسەلەلەرى جونىندە ۇسىنىستار ازىرلەۋ بويىنشا جۇمىس توبىن قۇرۋ ماسەلەسىن دە قاراستىردى.