ۇكىمەت وتىرىسىندا قر ەكولوگيا, گەولوگيا جانە تابيعي رەسرۋرستار ءمينيسترى سەرىكقالي برەكەشەۆ كيىك پوپۋلياتسياسىن تىڭعىلىقتى زەرتتەۋگە قارجى قاجەت ەكەنىن ايتتى, دەپ حابارلايدى Egemen.kz.
«كيىك پوپۋلياتسياسىن رەتتەۋ تۋرالى ايتاتىن بولساق, كەشە ءبىز عىلىم مەن سالالىق قاۋىمداستىقتاردىڭ قاتىسۋىمەن جينالىس وتكىزىپ, ورتاق ءبىر شەشىمگە كەلدىك. ءبىرىنشى. تەرەڭ مونيتورينگ جۇرگىزىپ, كيىك پولپۋلياتسياسىن ءتيىمدى رەتتەۋ ءۇشىن كۇردەلى عىلىمي زەرتتەۋلەر جۇرگىزۋ قاجەت. بيىل زوولوگيا ينستيتۋتى عىلىم جانە جوعارى ءبىلىم مينيسترلىگىنە وسى تاقىرىپ بويىنشا زەرتتەۋلەر جۇرگىزۋ ءۇشىن ءوتىنىم بەرگەن ەدى. وكىنىشكە قاراي, بۇل جوبا قابىلدانبادى. وسىعان بايلانىستى, ءاليحان اسحان ۇلى, عىلىم جانە جوعارى ءبىلىم, قارجى مينيسترلىكتەرى وسى زەرتتەۋلەردى قارجىلاندىرۋدى بيىلدان باستاپ قاراستىرۋىن سۇرايمىز», دەدى سەرىكقالي برەكەشەۆ.
سونداي-اق مينيستر كيىكتەن زارداپ شەككەن شارۋالاردىڭ ماسەلەسىن دە نازاردان تىس قالدىرمادى.
«اتالعان زەرتتەۋلەر جۇرگىزىلىپ, ونىڭ قورىتىندىسى شىققانعا دەيىن شارۋالارعا كەلگەن زالالدى ەسەپتەۋ ادىستەمەسى ازىرلەنىپ, وتەماقى تولەۋ ماسەلەسى پىسىقتالادى», دەدى ول.
ەسكە سالا كەتسەك, كەشە ەل پرەزيدەنتى قاسىم-جومارت كەمەل ۇلى اتالعان ۆەدومستۆونىڭ جۇمىسىنا سىن ايتىپ, سەرىكقالي برەكەشەۆكە سوگىس جاريالاعان ەدى.