بۇگىن نۇر-سۇلتان قالاسىنىڭ اكىمدىگىندە كورونوۆيرۋستىق ينفەكتسيانىڭ تارالۋى مەن قازىرگى جاعدايى بويىنشا ماسەلەلەر تالقىلاندى, دەپ حابارلايدى Egemen.kz اكىمدىكتىڭ ءباسپاسوز قىزمەتىنە سىلتەمە جاساپ.
نۇر-سۇلتان قالاسىنىڭ قوعامدىق دەنساۋلىق ساقتاۋ باسقارماسىنىڭ باسشىسى تيمۋر مۇراتوۆتىڭ ايتۋىنشا, قالادا اعىمداعى جىلدىڭ 22 ماۋسىمىنان باستاپ كوروناۆيرۋستىق ينفەكتسيانىڭ ءوسۋى بايقالادى.
«145 ادام ينفەكتسيالىق ستاتسيونارلاردا, توسەك ورىندارىنىڭ جۇكتەلۋى 36,8% قۇرايدى. رەانيماتسيا بولىمشەسىندە 11 پاتسيەنت ەم الۋدا, ونىڭ ىشىندە يۆل اپپاراتىندا – 0, جۇكتەمەلىگى - 21,5%. سوڭعى 3 اپتادا ورتاشا ەسەپپەن تاۋلىگىنە 100 جاعداي تىركەلىپ, 12 ادام اۋرۋحاناعا جاتقىزىلادى. بۇگىنگى كۇننىڭ وزىندە 353 ادامنىڭ كوروناۆيرۋس بويىنشا پتر تەستى وڭ ناتيجە كورسەتتى. بارلىق سانيتارلىق نورمالاردى ساقتاپ, ۆاكتسينا الىپ, رەۆاكتسيناتسيادان ءوتۋ كەرەك», دەپ اتاپ ءوتتى ول.
ءىس-شارا نۇر-سۇلتان قالاسى اكىمىنىڭ ورىنباسارى ەرلان بەكمۋرزاەۆتىڭ توراعالىعىمەن ءوتتى. جيىنعا «نۇر-سۇلتان قالاسىنىڭ سانيتاريالىق-ەپيدەميولوگيالىق باقىلاۋ دەپارتامەنتى» رمم باسشىسى سارحات بەيسەنوۆا جانە قالالىق ەمحانالار مەن اۋرۋحانالاردىڭ ديرەكتورلارى قاتىستى.
ايتا كەتەيىك, قازىرگى ۋاقىتتا ەلوردادا 7 ينفەكتسيالىق ستاتسيونار جۇمىس ىستەيدى, ولاردىڭ توسەك-ورىن سىيىمدىلىعى - 394, ونىڭ ىشىندە كۆي ەمدەۋگە ارنالعان 51 رەانيماتسيالىق توسەك-ورىن جابدىعى بار.