رەسەيدى الدىڭعى قاتارلى عىلىم مەن تەحنولوگيالاردىڭ جەتىستىگىنەن الشاقتاتۋ ول ەلدىڭ الەۋەتىن شەكتەپ, ەكونوميكاسىنىڭ قاراپايىمدالۋىنا الىپ كەلەدى. بۇل تۋرالى بەلگىلى ەكونوميست جاقسىبەك قۇلەكەەۆ ەل گازەتىنە بەرگەن ەكسكليۋزيۆتى سۇحباتىندا ايتتى, دەپ حابارلايدى Egemen.kz.
«رەسەي ەكونوميكاسى داعدارىستان كوز اشپايتىنى بەلگىلى بولىپ وتىر. سەبەبى الداعى جىلداردا بۇل ەلدە عىلىمنىڭ سوڭعى جەتىستىكتەرىنە نەگىزدەلگەن كۇردەلى وزىق تەحنولوگيالار شىعارۋ قيىنعا تۇسەدى. ويتكەنى بۇگىنگى وزىق تەحنولوگيالار – الەم عالىمدارىنىڭ ورتاق جەتىستىكتەرىنىڭ ناتيجەسى. رەسەيدى الدىڭعى قاتارلى عىلىم مەن تەحنولوگيالاردىڭ جەتىستىگىنەن الشاقتاتۋ ول ەلدىڭ الەۋەتىن شەكتەپ, ەكونوميكاسىنىڭ قاراپايىمدالۋىنا الىپ كەلەدى. مىسالى, بۇل ەل قازىردىڭ وزىندە LADA Granta-نى شىعارۋدا وتىز جىلعا كەيىن كەتىپ قالدى. اتالعان كولىكتىڭ قوزعالتقىشى – 1990-جىلداردىڭ ءونىمى. مۇندا ABS جۇيەسى, قاۋىپسىزدىك جاستىقشاسى, ينجەكتور دەگەن يگىلىكتەر جوق. شاناعى بۇرىنعى LADA Granta-عا ۇقساس بولعانىمەن, ىشكى دۇنيەسى تۇگەل ەسكى. سوندىقتان ەندىگى جەردە رەسەي وندىرەتىن كولىكتەر ەۋرو ستاندارتتارعا سايكەس كەلمەۋى مۇمكىن. بۇل ءبىر عانا مىسال», دەدى ەكونوميست.
جاقسىبەك قۇلەكەەۆ رەسەي ەكونوميكاسىنىڭ كەز كەلگەن سالاسىندا وسىنداي تەندەنتسيالاردىڭ ورىن الا بەرگەنى ءبىر جاعىنان قازاقستانعا ءتيىمدى ەكەنىن ايتتى.
«رەسەي – 140 ميلليوننان استام حالقى بار ۇلكەن نارىق. دەمەك حالىق تۇتىنۋدى توقتاتپايدى. رەسەيدىڭ ەڭ جاقىن شەكارالاس مەملەكەتى ءبىز بولعان سوڭ ولاردىڭ قازاقستاننان جاقسى تاۋارلاردى ساتىپ الۋى توقتامايدى. قازاقستان ەندىگى جەردە ءوندىرىستى ىشكى نارىق ءۇشىن عانا ەمەس, كورشىلەس رەسەيدىڭ نارىعىنا دا بەيىمدەي وتىرىپ ۇيىمداستىرۋى كەرەك. قازىردىڭ وزىندە رەسەيدەن كەتكەن اۆتوموبيل شىعاراتىن ءىرى كومپانيالار قازاقستانعا كەلۋدى كوزدەپ وتىر. وسىنداي مۇمكىندىكتى مەيلىنشە دۇرىس پايدالانعان ابزال. بۇل جەردە ساقتىق جاساپ, سانكتسياعا ءتۇسىپ قالماۋ جاعىنا قاتتى ءمان بەرۋ دە ماڭىزدى», دەپ تۇيىندەدى جاقسىبەك قۇلەكەەۆ.