ماۋسىم ايىندا ەلەكتروندىق ەڭبەك بيرجاسىندا 124,6 مىڭ بوس جۇمىس ورنى مەن 59,9 مىڭ تۇيىندەمە ورنالاستىرىلدى. وتكەن ايمەن سالىستىرعاندا بوس ورىندار سانى 1,5 ەسە, ال وزەكتى تۇيىندەمەلەر سانى 31%-عا ارتتى, دەپ حابارلايدى Egemen.kz ەڭبەك جانە حالىقتى الەۋمەتتىك قورعاۋ مينيسترلىگىنە سىلتەمە جاساپ.
«بوس جۇمىس ورىندارى سانىنىڭ كۇرت ءوسۋى بارلىق وڭىرلەردە بايقالدى, بىراق ەڭ كوبى اقتوبە (2,5 ەسە) جانە جامبىل (3 ەسەگە جۋىق) وبلىستارىندا. اتالعان وڭىرلەر بوس جۇمىس ورىندارى بويىنشا ءبىرىنشى ورىنعا شىقتى. قاراعاندى وبلىسى دا بوس جۇمىس ورىندارى بويىنشا الدىڭعى قاتارعا جايعاستى (12,6 مىڭ). بۇل رەتتە باتىس قازاقستان وبلىسىندا كاسىپورىندار مەن فيرمالاردىڭ ۇسىنىسى 5,8%-عا – 3,3 مىڭ بوس ورىنعا دەيىن ازايدى. سونداي-اق ۇسىنىلاتىن جۇمىس ورىندارىنىڭ ەڭ از سانى شىمكەنت قالاسىندا – 3,5 مىڭ جانە ماڭعىستاۋ وبلىسىندا - 3,1 مىڭ بوس ورىن», دەدى «ەڭبەك رەسۋرستارىن دامىتۋ ورتالىعى» اق باسقارۋشى ديرەكتورى الەكساندرا مولچانوۆسكايا.
بوس ورىنداردىڭ باسىم بولىگىن اۋىل شارۋاشىلىعى (10,8 مىڭ بوس ورىن), تۇرعىن ەمەس ءۇي-جايلار جانە تۇرعىن ءۇي وبەكتىلەرىن سالۋ (9,8 مىڭ بوس ورىن), ءبىلىم بەرۋ (6,6 مىڭ بوس ورىن) جانە وزگە دە قىزمەتتەر (5,8 مىڭ بوس ورىن) سەكتورلارىنىڭ كاسىپورىندارى ورنالاستىردى. بۇل رەتتە اۋىل شارۋاشىلىعى سالاسىندا ورنالاستىرىلعان بوس ورىنداردىڭ جارتىسىنا جۋىعى (47%) جامبىل وبلىسىنا, ال شىعىس قازاقستان جانە قوستاناي وبلىستارىندا – تۇرعىن ءۇي قۇرىلىسى سالاسىندا تيىسىنشە 33,7% جانە 35%-دان كەلدى. ەلوردادا قۇرىلىس سالاسىنداعى جۇمىسشىلارعا جوعارى سۇرانىس ساقتالدى, ياعني, بوس ورىنداردىڭ ۇشتەن ءبىرى قۇرىلىس سالاسىنا تيەسىلى.
بىلىكتىلىگى تومەن قىزمەتكەرلەرگە سۇرانىس 23,4 مىڭنان 50,7 مىڭعا دەيىن 2 ەسەدەن استام ءوستى. ونىڭ ءبىر سەبەبى – اۋىل شارۋاشىلىعىنداعى ماۋسىمدىق جۇمىستارعا جۇمىسشىلاردى تارتۋ. سونىمەن قاتار بىلىكتىلىگى تومەن ىزدەنۋشىلەر تاراپىنان ۇسىنىس ءبىر مەزگىلدە 58,2%-عا, 18,4 مىڭنان 29,1 مىڭعا دەيىن ءوستى. ەڭبەك نارىعىنىڭ قاجەتتىلىكتەرى مەن ورتاشا بىلىكتى مامانداردىڭ ۇسىنىسى اراسىنداعى تەڭگەرىمسىزدىك تومەندەدى, 42 مىڭ ورنالاستىرىلعان تۇيىندەمەگە قاراعاندا 52,9 مىڭ بەلسەندى بوس جۇمىس ورنى بار. بوس جۇمىس ورىندارىنىڭ ەڭ از ۇلەسى جوعارى بىلىكتى جۇمىس ورىندارىنا تيەسىلى.
«سوڭعى ايلاردا قوسالقى جۇمىسشىلارعا, كۇزەتشىلەرگە, جۇرگىزۋشىلەرگە, سانيتارلارعا, مۇعالىمدەرگە, دارىگەرلەر مەن مەدبيكەلەرگە دەگەن سۇرانىس جوعارى. ماۋسىم ايىندا وزگەرىس بولعان جوق. وسىلايشا, ەەب پورتالىنىڭ دەرەكتەرىنە سايكەس بوس لاۋازىمداردىڭ ەڭ كوپ سانى قوسالقى جۇمىسشىلار (19,8 مىڭ بوس جۇمىس ورنى جانە 15,2 مىڭ تۇيىندەمە), جول قۇرىلىسى جۇمىسشىلارى (3,1 مىڭ بوس جۇمىس ورنى جانە 294 تۇيىندەمە), كۇزەتشىلەر (2,2 مىڭ بوس جۇمىس ورنى جانە 621 تۇيىندەمە), جۇرگىزۋشىلەر (4,4 مىڭ بوس جۇمىس ورنى جانە 1,4 مىڭ تۇيىندەمە), مۇعالىمدەر (3,9 مىڭ بوس جۇمىس ورنى جانە 2,7 مىڭ تۇيىندەمە) جانە دارىگەرلەر (635 رەزيۋمەگە قارسى 2,2 بوس ورىن)», دەدى ا. مولچانوۆسكايا.
ەسەپتى ايدا ىزدەنۋشىلەردىڭ بەلسەندىلىگى الماتى وبلىسىنان باسقا بارلىق دەرلىك وڭىرلەردە ءوستى. وسىلايشا, وسى وڭىردەگى جاريالانعان تۇيىندەمەلەردىڭ سانى 8%-عا تومەندەپ, 4,7 مىڭ تۇيىندەمەنى قۇرادى. تۇيىندەمەلەر سانىنىڭ ايتارلىقتاي ءوسۋى تۇركىستان جانە اقتوبە وبلىستارىندا – 1,8 ەسە بايقالدى. بۇل رەتتە اتالعان وڭىرلەردە تۇيىندەمەلەر سانىنىڭ ءوسۋى بىلىكتىلىگى جوق ەڭبەكتى بولجايتىن تۇيىندەمەلەر سانىنىڭ كوبەيۋى ەسەبىنەن بولدى.
بىلىكتىلىگى جوق جۇمىسشىلارمەن قاتار ەڭ قاجەتتى ماماندىقتارعا, مىسالى, اقتوبە وبلىسىندا كۇزەتشىلەر, جۇرگىزۋشىلەر, اسپازدار, ەلەكترومونتەرلار جانە سىرلاۋشىلار, قاراعاندى وبلىسىندا – كۇزەتشىلەر, تاربيەشىلەر, مۇعالىمدەر, ەلەكترگازبەن دانەكەرلەۋشىلەر, ماي قۇيۋ ستانتسيالارىنىڭ وپەراتورلارى جانە اس ءۇي جۇمىسشىلارى جاتادى.
كەلەسى ماماندىقتارعا ىزدەنۋشىلەر ەڭ جوعارى جالاقىنى كۇتۋدە: ءوندىرىستى دايىنداۋ بويىنشا ينجەنەردىڭ كومەكشىلەرى – 5 ملن تەڭگە, دىبىس رەجيسسەرلەرى – 2,1 ملن تەڭگە, ينۆەستيتسيالىق جوبالار بويىنشا ديرەكتورلار – 1,9 ملن تەڭگە جانە گۋمانيتارلىق عىلىمدار سالاسىنداعى جوو پروفەسسورلارى – 1,8 ملن تەڭگە.
ەەب-دا ۇسىنىلعان ەڭ جوعارى اقى تولەنەتىن بوس جۇمىس ورىندارى ريەلتورلار (ورتا ەسەپپەن 900 مىڭ تەڭگە), باس قۇرىلىسشىلار (824 مىڭ تەڭگە) جانە وبەكتيۆتى باقىلاۋ جونىندەگى ينجەنەرلەر (800 مىڭ تەڭگە).
وسىلايشا, ءبىرىنشى جارتىجىلدىقتىڭ قورىتىندىسى بويىنشا قازاقستاندىق ونلاين ەڭبەك نارىعىندا جۇمىس بەرۋشىلەردىڭ بەلسەندىلىگى ارتىپ كەلەدى, جىل باسىمەن سالىستىرعاندا بوس لاۋازىمدار سانى 1,8 ەسەگە ارتتى. ال جۇمىس ىزدەۋشىلەر اراسىندا بەلسەندىلىكتىڭ تومەندەۋى بايقالسا, تۇيىندەمەلەر سانى جىل باسىنان باستاپ 14,6%-عا, 70,2 مىڭنان 59,9 مىڭعا دەيىن تومەندەدى, بۇل ادەتتە جازدا, دەمالىس ۋاقىتى كەلگەندە جانە جۇمىس ىزدەۋشىلەر ىزدەۋدى نەمەسە جۇمىستى كۇزگە دەيىن اۋىستىرۋدى توقتاتقان كەزدە بولاتىن جايت.