كەشە ۇكىمەت باسشىسى ءاليحان سمايىلوۆ كاسىپكەرلىك قىزمەتتە «تازا پاراقتان باستاپ» رەتتەۋدى ەنگىزۋ جانە مەملەكەتتىك باقىلاۋ مەن قاداعالاۋدى اۆتوماتتاندىرۋ ماسەلەلەرى جونىندە كەڭەس وتكىزدى, دەپ حابارلايدى Egemen.kz.
جيىندا قر ۇلتتىق ەكونوميكا ءمينيسترى الىبەك قۋانتىروۆ قوعامدىق تاماقتانۋ, ساۋدا, قوناق ءۇي قىزمەتتەرى, كولىك جانە اۋىل شارۋاشىلىعى سالالارىنداعى رەتتەۋشى اكتىلەرگە جۇرگىزىلگەن تالداۋدىڭ بازالىق شارتتارعا سايكەس كەلمەيتىن باسى ارتىق جانە ءبىرىن-ءبىرى قايتالايتىن بىرقاتار تالاپتى انىقتاعانىن حابارلادى.
الداعى ايلاردا تاعى 6 باعىت بويىنشا, اقپارات جانە بايلانىس, كومپيۋتەرلىك باعدارلامالاۋ سالاسى, جىلجىمايتىن م ۇلىكپەن جاسالاتىن وپەراتسيالار, جيناقتاۋ, تاۋ-كەن ونەركاسىبى جانە قۇبىر كولىگىنىڭ قىزمەتىنە تالداۋ جۇرگىزۋ جوسپارلانۋدا.
پرەمەر-ءمينيستردىڭ ايتۋىنشا, قازىرگى ۋاقىتتا بيزنەسكە كوپتەگەن فورمالدى تالاپتار قويىلعان. ولاردى ءتيىستى باقىلاۋدى قامتاماسىز ەتۋگە زيان كەلتىرمەيتىندەي ەتىپ الىپ تاستاۋعا بولادى.
ۇكىمەت باسشىسى مۇنداي تالاپتاردىڭ بولۋى ەلدەگى ىسكەرلىك احۋالعا كەرى اسەر ەتەتىنىن, سوندىقتان ورتالىق مەملەكەتتىك ورگانداردىڭ «اتامەكەن» ۇكپ-مەن بىرلەسىپ, رەتتەۋشى اكتىلەرى قىسقارتۋ بويىنشا جۇمىس جۇرگىزۋى ءتيىس ەكەنىن قاداپ ايتتى.
«مەملەكەت باسشىسى ءبىزدىڭ الدىمىزعا بيزنەسكە كوبىرەك ەركىندىك بەرۋ مىندەتىن قويدى. بۇل – جاڭا ەكونوميكالىق ساياساتتى قالىپتاستىرۋ اياسىنداعى ۇكىمەت جۇمىسىنىڭ باستى باعىتتارىنىڭ ءبىرى. تەكسەرۋشى ورگانداردىڭ فورمالدى بەلگىلەرىنە قاراپ بيزنەستى جاۋاپكەرشىلىككە تارتۋعا مۇمكىندىگى بولماۋى ءتيىس», دەدى پرەمەر-مينيستر ءوز سوزىندە.
وسىعان بايلانىستى ۇكىمەت باسشىسى ءتيىستى ورگاندارعا قايتا قاراۋ جانە قىسقارتۋ ارقىلى قازاقستاندىق نورماتيۆتىك-قۇقىقتىق بازانى باسى ارتىق تالاپتاردان تازارتۋ جونىندەگى جۇمىستى جانداندىرۋدى تاپسىردى.
سونداي-اق ءاليحان سمايىلوۆ تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگىنىڭ مەملەكەتتىك باقىلاۋ مەن قاداعالاۋدى قامتاماسىز ەتۋ كەزىندە تاۋەكەلدەردى باسقارۋدىڭ اۆتوماتتاندىرىلعان جۇيەسىن قۇرۋ بويىنشا تاسىلدەرىن ماقۇلدادى.
«تەكسەرۋشى ۆەدومستۆولار بۇزۋشىلىقتاردىڭ قاۋپى جوعارى بولعان كەزدە ارەكەت ەتۋى ءتيىس. بيزنەسكە اكىمشىلىك جۇكتەمەنى ازايتۋ جانە تاۋەكەلدەردى باسقارۋ جۇيەسىن ىسكە قوسۋ – جۇرگىزىلىپ جاتقان رەفورماداعى نەگىزگى قادامدار. ورتالىق مەملەكەتتىك ورگانداردىڭ باسشىلارىنا وسى جۇمىستىڭ ناتيجەلەرى ءۇشىن جەكە جاۋاپكەرشىلىك تۋرالى تاعى دا ەسكەرتەمىن», دەدى پرەمەر-مينيستر.