پرەزيدەنت كەڭەسشىسى مالىك وتارباەۆ جاقىندا الماتى وبلىسىندا بولىپ, رايىمبەك جانە كەگەن اۋداندارىنىڭ حالقىمەن جۇزدەسىپ قايتتى.
العاشقى كەزدەسۋ رايىمبەك اۋدانىنىڭ ورتالىعى نارىنقولدا ءوتىپ, اۋىلدارداعى اقساقالدار القاسىنىڭ توراعالارى, اۋىل اكىمدەرى مەن الەۋمەتتىك جەلى بەلسەندىلەرى جينالعان باسقوسۋدا ءبىراز ۋاقىتتان بەرى شەشىمىن تاپپاي كەلە جاتقان ماسەلەلەر تۋرالى وي-پىكىرلەر ورتاعا تاستالىپ, ءتۇيىندى سۇراقتارعا تۇشىمدى جاۋاپ الىندى.
جول, جەر, شەكارا ماسەلەلەرى تۋرالى ورىندى ۇسىنىستاردى زەيىن قويىپ تىڭداعان پرەزيدەنت كەڭەسشىسى بۇل ايتىلعانداردى ءتيىستى ورگاندار باسشىلارىنا جەتكىزەتىنىنە ۋادە بەردى. كەزدەسۋ كەزىندە مالىك وتارباەۆ پرەزيدەنتىمىزدىڭ ساياسي رەفورماسىنىڭ قىر-سىرىن, ۇلىتاۋدا وتكەن ۇلتتىق قۇرىلتايدا كوتەرىلگەن ماسەلەلەردىڭ تاريحي ماڭىزى مەن ءمانىن, سونىمەن بىرگە جاڭا قازاقستان قۇرۋداعى ەل بەلسەندىلەرى الدىندا تۇرعان ماقسات-مىندەتتەر مەن پاتريوتتىق بورىشتارىن ەگجەي-تەگجەي ءتۇسىندىرىپ, جيىنعا قاتىسۋشىلاردىڭ سۇراقتارىنا جاۋاپ بەردى. اۋدان اكىمى وڭىردە قولعا الىنىپ جاتقان وڭدى ىستەر مەن يگى باستامالار تۋرالى حاباردار ەتتى.
ساپار بارىسىنداعى ەكىنشى كۇن كەگەن اۋدانىنداعى جۇزدەسۋلەرگە جالعاستى. بۇل اۋداندا دا جەرگىلىكتى تۇرعىندارمەن كەزدەسۋدە تالقىعا تۇسكەن باستى ماسەلە – رەسپۋبليكالىق ماڭىزعا يە جول مەن ۋشىعىپ تۇرعان جەر جاعدايى بولدى. جيىنعا قاتىسۋشىلار مەن سۇراق قويعان اۋىل بەلسەندىلەرىنە پرەزيدەنت كەڭەسشىسى جەر مەن جول پروبلەمالارى رەسپۋبليكا دەڭگەيىندە قولعا الىنىپ, كەزەڭ-كەزەڭىمەن وڭ شەشىلىپ كەلە جاتقانىن ناقتى مىسالدارمەن ءتۇسىندىرىپ كەتتى.
پرەزيدەنت كەڭەسشىسى, سونداي-اق كەگەن اۋىلىندا وتكەن اقىن, قازاقستان جازۋشىلار وداعىنىڭ مۇشەسى كادىربەك قۇنىپيا ۇلىنىڭ 60 جاس سالتاناتىنا جانە اقىننىڭ «نايزاقارا» جىر جيناعىنىڭ تۇساۋكەسەرىنە قاتىسىپ, مەرەيتوي يەسىنە پرەزيدەنت ق.توقاەۆتىڭ العىسحاتىن تابىس ەتىپ, مەملەكەتتىك كەڭەسشى ە.قاريننىڭ قۇتتىقتاۋىن جەتكىزدى.