تسيفرلاندىرۋ – وزەكتى ماسەلە

تەلەفون الاياقتىعىنان ساق بولۋ قاجەت

تسيفرلىق دامۋ, يننوۆاتسيالار جانە اەروعارىش ونەركاسىبى ءمينيسترى باعدات ءمۋسيننىڭ ايتۋىنشا, بيزنەس پروتسەستەردىڭ رەينجينيرينگىنە قاتىستى رەفورمالار 1 300-دەن استام مەملەكەتتىك قىزمەتتىڭ جاڭا ءتىزىمىن قالىپتاستىرۋعا مۇمكىندىك بەردى.

«قازىرگى كەزدە مەملەكەتتىك قىزمەت­تەردىڭ 93%-ى ونلاين تۇردە قولجەتىمدى, بىراق كەيبىر مەملەكەتتىك ورگاندارعا بۇل جۇمىستى ءالى دە جەتىلدىرۋ قاجەت. وسى جاڭا باستامانىڭ نەگىزىندە اۆتوماتتاندىرۋدىڭ جەتىلدىرىلگەن مەتريكاسىن ەنگىزۋدەمىز», دەدى ب.مۋسين.

ستاتيستيكالىق مالىمەتتەرگە سايكەس, پرواكتيۆتى جانە تولىق اۆتومات­تان­دى­رىلعان قىزمەتتەر سانىن, ياعني ادامي فاكتورسىز قۇرىلاتىن قىزمەتتەر 6%-دى قۇرايدى.

مينيسترلىك جۇرگىزگەن تالداۋ مەملە­كەتتىك قىزمەتتەردىڭ باسىم بولىگى, ياعني ادامي فاكتورمەن قۇرىلاتىن قىزمەتتەردىڭ سانى شامامەن 85%-دى قۇراپ وتىرعانىن كورسەتتى.

بايانداما بارىسىندا ۆەدومستۆو باسشىسى ەڭبەك جانە حالىقتى الەۋمەتتىك قورعاۋ مينيسترلىگى جۇرگىزىپ وتىرعان ما­ڭىزدى الەۋمەتتىك قىزمەتتەردى پرواكتيۆتى فورماتقا كوشىرۋ جونىندەگى اۋقىمدى جۇمىس ءجۇرىپ جاتقانىن ايتىپ بەردى.

بۇگىن ەلەكتروندى قىزمەتتەر سانى بويىنشا, جالپى وڭ وزگەرىس بايقالادى. EGov Mobile موبيلدىك قوسىمشاسىندا دا ەلەكتروندى قىزمەتتەردى پايدالانۋ 2 ەسەگە ارتقان.

جىل سوڭىنا دەيىن ەڭ تانىمال 20 مەملەكەتتىك قىزمەتتى سىرتقى پلات­فورمالارعا شىعارۋ جوسپارلانىپ وتىر. سونداي-اق SMS ارقىلى زاڭسىز تىركەلۋ ماسەلەسى شەشىلدى. بايلانىس ورتالىعىنىڭ كۇتۋ ۋاقىتى 5 مينۋتتان 20 سەكۋندقا دەيىن قىسقارتىلدى.

سونىمەن قاتار ۆەدومستۆو باسشىسى ازاماتتاردى قۇجاتتاندىرۋ بويىنشا ادامي فاكتورسىز ۇسىنىلاتىن, جاڭا پەرسپەكتيۆالىق جوبانى ىسكە اسىرۋ جايلى ايتتى. «ۆيدەو تسون» جوباسى اياسىندا تسيفرلىق دامۋ, يننوۆاتسيالار جانە اەروعارىش ونەركاسىبى مينيسترلىگى مەملەكەتتىك ورگاندارمەن بىرلەسىپ, 2025 جىلعا دەيىن ازاماتتارعا كونسۋلتاتسيا جانە قىزمەت كورسەتۋدى وسى ءتاسىل ارقىلى ۇسىنۋدى جوسپارلاپ وتىر. ء«بىز حقو-دا QR ارقىلى باج-داردى تولەۋ مۇمكىندىگىن ەنگىزدىك. ناتيجەسىندە, 5 اي ىشىندە ازاماتتاردىڭ قاراجاتى 205 ملن تەڭگەگە ۇنەمدەلدى. ايتا كەتەيىك, بارلىق باج-داردى QR ارقىلى تولەۋگە وتكىزگەن ءجون. ءوز كەزەگىندە بۇل ازاماتتاردىڭ قاراجاتىن ۇنەمدەۋمەن قاتار, كولەڭكەلى ەكونوميكانى جويۋعا تاعى ءبىر قادام جاساۋعا مۇمكىندىك بەرەدى», دەدى ب.مۋسين.

Fintech پەن ونلاين بانكينگتىڭ دامۋى تۋرالى Kaspi بانكىنىڭ باسقارما توراعاسى ميحايل لومتادزە ايتىپ بەردى.

ونىڭ ايتۋىنشا, 2021 جىلى 7 ملن-نان استام قازاقستاندىق – Kaspi.kz قوسىمشاسىنداعى مەملەكەتتىك قىزمەتتەر ءبولىمىنىڭ پايدالانۋشىلارى. ءاربىر ءۇشىنشى اۆتوموبيل ونلاين تىركەۋدەن وتەدى, 2021 جىلى 286 مىڭ كولىك تىركەلگەن. «Kaspi.kz 446 ملرد سالىق تولەدى. 2 ملن قازاقستاندىق تسيفرلى قۇجاتتاردى پايدالانادى. 500 مىڭ الەۋمەتتىك شوت اشىلىپ, 66 مىڭ جەكە كاسىپكەر تىركەلدى», دەدى م.لومتادزە.

Kaspi باسقارما توراعاسى اتاپ وتكەندەي, كاسىپكەرلەرمەن جۇمىس اياسىندا ولار ءۇشىن ارنايى كارتالارمەن دە, QR ارقىلى دا تولەم قابىلدايتىن زاماناۋي تولەم تەرمينالدارى ازىرلەندى. ء«بىز ەلدەگى كاسىپكەرلەرگە 276 مىڭنان استام تولەم تەرمينالىن تەگىن ۇسىندىق. بۇل ساۋدانىڭ قولما-قول اقشادان قولما-قول اقشاسىز ساۋداعا كوشۋىنە ارنالعان بىرەگەي پلاتفورما جاسادى. ناتيجەسىندە, قازاقستاندا قولما-قول اقشاسىز ساۋدا اينالىمى قارقىندى ءوسىپ كەلەدى جانە 2021 جىلى 8,4 ترلن-نان استام سومانى قۇرادى, ءوسىم 85%, بۇل الەمدەگى ەڭ جوعارى ءوسۋ قارقىنىنىڭ ءبىرى بولىپ تابىلادى», دەدى م.لومتادزە.

IT سالاسىن دامىتۋ تۋرالى «تەرريكون القابى» ءىت Hub دامىتۋ جونىندەگى ديرەكتورى الەكساندر دوروشەنكو بايانداما جاسادى.

ا.دوروشەنكونىڭ ايتۋىنشا, سوڭعى ۋاقىتتا نۇر-سۇلتاندا جانە الماتىدا IT سالاسىنىڭ بەلسەندى دامۋى بايقالادى. بۇعان ەلورداعا وڭىرلىك كادرلاردىڭ كوپتەپ كەلۋى ەسەبىنەن جاسالعان بارىنشا قولايلى جاعدايلار ىقپال ەتەدى. باسەكەگە قابىلەتتى ورتاسى بار دامىعان وڭىرلەر دە ەل ءۇشىن الەۋمەتتىك-ەكونوميكالىق تۇراقتىلىققا قول جەتكىزەدى جانە تۋعان قالاسىندا بولا وتىرىپ, تابىستى مانساپ نەمەسە تابىستى بيزنەس قۇرۋعا بولادى.

«قاراعاندىدا ءبىز «تەرريكون القابى» جوباسىن قولعا الدىق, ونىڭ مىندەتى – قاراعاندى وبلىسىندا IT كومپانيالار قىزمەتكەرلەرىنىڭ سانىن قازىرگى ءۇش مىڭنان ون مىڭ ادامعا دەيىن بەس جىل ىشىندە ۇلعايتۋ. جوبا – وبلىس اكىمدىگى مەن استانا حابتىڭ قولداۋىنا يە بولعان جەكە باستاما. ءبىزدىڭ كاسىپكەرلەر توبى IT حاب قۇرۋعا ينۆەستيتسيا سالدى», دەدى ا.دوروشەنكو.

تالقىلاۋدى قورىتىندىلاي كەلە, ۇكىمەت باسشىسى ءاليحان سمايىلوۆ وتكەن جىلى تسيفرلى فورماتتا كورسەتىلگەن مەملەكەتتىك قىزمەتتەر سانىنىڭ ەكى ەسە وسكەنىن اتاپ ءوتتى. جالپى, بۇگىندە ەلەكترون­دىق فورماتتاعى قىزمەتتەردىڭ دەڭ­گەيى 93%-دى قۇرايدى. ال قىزمەتتەردىڭ 66%-ىن ازاماتتار كادىمگى سمارتفون ارقىلى الىپ وتىر. 18 قۇجات ءتۇرى تسيفر­لى فورماتتا بەرىلەدى, ياعني ولاردى قاعاز جۇزىندە راستاۋدىڭ قاجەتى جوق.

«ەلەكتروندى قىزمەتتەر مەن بازا­لاردىڭ ينتەگراتسياسى ازاماتتاردىڭ ءومىرىن جەڭىلدەتۋگە مۇمكىندىك بەردى. ولار مەملەكەتتىك ورگانداردىڭ ەسىگىن توزدىرىپ, قاعازباستىلىققا سالىنىپ, اۋرەگە تۇسپەيدى. دەمەك بۇل جۇمىستى ودان ءارى كەڭەيتە بەرۋ قاجەت», دەدى ءا.سمايىلوۆ.

سونىمەن قاتار ۇكىمەت باسشىسى ەلىمىزدە ەلەكتروندى فورماتتاعى بانكتىك قىزمەت تۇرلەرى جاقسى دامىپ كەلە جاتقانىن اتاپ ءوتتى. ازاماتتارعا ىڭعايلى بولۋى ءۇشىن بانكتىك قوسىمشالاردا مەملەكەتتىك قىزمەت سەرۆيستەرى ەنگىزىلۋدە. ولاردا ەڭ جوعارى دەڭگەيدەگى زاماناۋي قورعاۋ تاسىلدەرى, بيومەتريا قولدانىلادى.

سونداي-اق پرەمەر-مينيستر بانكتەر الاياقتىق جاعدايلاردىڭ جيىلەپ كەتكەنىنە بارىنشا نازار اۋدارىپ, كليەنتتەردىڭ دەرەكتەرىن قورعاۋدى كۇشەيتۋى قاجەت ەكەنىن اتاپ ءوتتى.

«جالپى, وتاندىق ءىت-سالانى دامىتۋ, قازاقستاندىق ەلەكتروندى ونىمدەردى ازىرلەۋ باعىتىندا بەلسەندى جۇمىس جۇرگىزۋ جانە ولاردى قولدانۋ اياسىن كەڭەيتۋ قاجەت. ءبىز يننوۆاتسيالىق شەشىمدەرگە, ونىڭ ىشىندە حالىققا ەلەكتروندى قىزمەت كورسەتۋ سالاسىنا قاشاندا قولداۋ كورسەتەتىن بولامىز», دەدى ءا.سمايىلوۆ.

مينيسترلەر كابينەتىنىڭ باسشىسى نازار اۋداراتىن بىرقاتار ماسەلە بار ەكەنىن اتاپ ءوتتى. كەيبىر مينيسترلىكتە قىزمەتتەردى ەلەكتروندى فورماتتا الۋ مۇمكىن ەمەس. ونىڭ ىشىندە, اشم, عىلىم جانە جوعارى ءبىلىم, يدم, دسم جانە قورعانىس مينيسترلىكتەرى بار. سونداي-اق سىرتقى ىستەر مينيسترلىگى بويىنشا قىزمەتتەردى اۆتوماتتاندىرۋ دەڭگەيى تومەن.

وسىعان وراي ءتسدياوم اتالعان مەملە­كەتتىك ورگاندارمەن بىرلەسىپ, 3 اي مەرزىمدە قولجەتىمسىز مەملەكەتتىك قىزمەتتەردى ەلەكتروندى فورماتقا كوشىرۋگە ءتيىس.

بۇدان باسقا, ورتالىق مەملەكەتتىك ورگاندار مەن اكىمدىكتەرگە دەرەكتەردى ۇنەمى جاڭارتىپ تۇرۋدى, اقپاراتتىق جۇيەلەردىڭ توقتاۋسىز جۇمىس ىستەۋىن جانە ولاردىڭ ۋاقتىلى ينتەگراتسيالانۋىن قامتاماسىز ەتۋ مىندەتى قويىلدى.

باق تۋرالى جاڭا زاڭ جوباسى تالقىلانادى

ۇكىمەت وتىرىسىندا بۇقارالىق اقپا­رات قۇرالدارىن دامىتۋدىڭ نەگىزگى تاسىلدەرى قارالدى. بۇل ماسەلە تۋرالى اقپا­رات جانە قوعامدىق دامۋ ءمينيسترى اسقار وماروۆ باياندادى. ءمينيستردىڭ ايتۋىن­شا, قازىرگى كەزدە وتاندىق مەديا يندۋس­تريا بەلسەندى تۇردە جانە ساپالى دامىپ كەلە جاتىر. ماسەلەن, بۇگىنگى تاڭدا ەلى­مىزدە 5 مىڭنان استام باق تىركەلگەن جانە جىل سايىن ولاردىڭ قاتارى كوبەيىپ كەلەدى.

«بۇقارالىق اقپارات قۇرالدارىنىڭ سانىمەن بىرگە تارالۋ اۋماعى, بەلگىلى ءبىر ەتنوس تۇراتىن جەردە عانا ەمەس, بۇكىل رەسپۋبليكاعا تارالاتىن باسىلىم تىلدەرىنىڭ ارتۇرلىلىگى كەڭەيىپ كەلەدى», دەدى ا.وماروۆ.

بۇل رەتتە, ونىڭ ايتۋىنشا, «بۇقارالىق اقپارات قۇرالدارى تۋرالى» زاڭىنا سايكەس بۇقارالىق اقپارات قۇرالىنىڭ ءونىمىن شىعارۋدى توقتاتا تۇرۋ نەمەسە توقتاتۋ مەنشىك يەسىنىڭ نەمەسە سوتتىڭ شەشىمى بويىنشا عانا جۇزەگە اسادى. زاڭنىڭ بۇل تارماعى باق-تىڭ ينستيتۋتسيونالدىق قورعالۋىن ايتارلىقتاي جوعارى دارەجەگە كوتەرەدى.

سوڭعى 5 جىلدا مەملەكەتتىڭ قولداۋى­مەن 3 500-دەن استام سەريادان تۇراتىن 250-گە جۋىق سەريال ءتۇسىرىلدى. ولاردىڭ 50-دەن استامى سينگاپۋر, رەسەي, تۇركيا, وزبەكستان, قىرعىزستان جانە ت.ب. ەلدەرگە ساتىلدى.

«بۇدان باسقا, مەملەكەتتىك تەلەارنالار الەۋمەتتىك جەلىلەردە اقپاراتتى ىلگەرىلەتۋ بويىنشا بەلسەندى تۇردە جۇمىس جۇرگىزۋدە. ماسەلەن, بۇگىندە «حابار» جانە «قازاقستان» تەلەارنالارىنىڭ YouTube ارناسى ميلليوننان استام جازىلۋشىسى بار اۋديتوريا بولعان جاعدايدا بەرىلەتىن «التىن باتىرما» ماراپاتىنىڭ يەگەرلەرى بولىپ تابىلادى», دەدى ا.وماروۆ.

قازاقستاندىقتاردىڭ سەنىمى مەن اقپاراتتى تۇتىنۋدىڭ نەعۇرلىم تانىمال الاڭدارىنا كەلەتىن بولساق, مىنا ستاتيستيكانى كەلتىرۋگە بولادى:

Internews in Kazakhstan دەرەكتەرىنە ساي, قازاقستاندىقتار ءبىرىنشى كەزەكتە تەلەديدارعا سەنەدى (58,1%), ەكىنشى ورىندا – ينتەرنەت-سايتتار (34,3%). سونداي-اق حالىقتىڭ جارتىسىنان كوبى مەملەكەتتىك مەدياعا سەنەدى (51,4%), تەك 9,6%-ى جەكە ادامدارعا سەنەدى.

ءمينيستردىڭ سوزىنە قاراعاندا, پرەزيدەنت ق.توقاەۆتىڭ تاپسىرمالارىن ىسكە اسىرۋ اياسىندا اقپارات جانە قوعامدىق دامۋ مينيسترلىگى باق-تىڭ باسەكەگە قابىلەتتىلىگىن دامىتۋ جانە ارتتىرۋ بويىنشا جۇيەلى جۇمىس جۇرگىزۋدە. 2020 جىلدان باستاپ اقپارات سالاسىن دامىتۋدىڭ 2020-2022 جىلدارعا ارنالعان ۇلتتىق جوسپارىن ىسكە اسىرۋ قولعا الىندى. بۇل جوسپار مەملەكەت پەن مەديا سالاسىنىڭ جۇيەلى شەشىمدەرىن تالاپ ەتەتىن باق سالاسىنداعى وزەكتى ماسەلەلەردى شەشۋ ماقساتىندا ازىرلەندى.

ءمينيستردىڭ ايتۋىنشا, 2021 جىلدىڭ قورىتىندىسى بويىنشا مىناداي ءىس-شارالار وتكىزىلدى: مەملەكەتتىك باس­پا باق-تى قايتا ۇيىمداستىرۋ جانە وڭتايلاندىرۋ بويىنشا جۇمىس جۇرگىزىلدى; «تۇمار», «ۇركەر», «Astana Media Week» ۇلتتىق سىيلىقتارى جىل سايىن وتكىزىلەدى; مەديا سالاسىنىڭ قىزمەتكەرلەرى ءۇشىن بىلىكتىلىكتى ارتتىرۋ كۋرستارى جۇمىس ىستەيدى; حالىقتىڭ باق-تا مەملەكەتتىك ساياساتتى جاريا ەتۋگە قاناعاتتانۋ دەڭگەيىن ايقىندايتىن الەۋمەتتىك زەرتتەۋلەر, سونداي-اق ماركەتينگتىك زەرتتەۋلەر جۇرگىزىلدى; باق سالاسىندا بىرقاتار زاڭعا تاۋەلدى نورماتيۆتىك قۇقىقتىق اكتىلەر ازىرلەندى جانە بەكىتىلدى.

سونىمەن قاتار جۋرناليستەردىڭ قۇقىقتارىن قورعاۋدىڭ قوسىمشا تەتىكتەرىن ازىرلەۋ جانە ولاردىڭ قىزمەت جاعدايلارىن جاقسارتۋ ماقساتىندا جۋرناليستەردى اككرەديتتەۋ قاعيداسى, جۋرناليستەردىڭ قۇقىقتارى بۇزىلعان جاعدايدا ولاردىڭ قۇقىقتارىن قورعاۋ جونىندەگى رەگلامەنت ازىرلەنىپ, بەكىتىلدى. «مەملەكەت باسشىسىنىڭ 2022 جىلعى 16 ناۋرىزداعى جولداۋى اياسىندا بەرگەن تاپسىرماسىنا سايكەس باق سالاسىنداعى سالالىق زاڭنامانى جەتىلدىرۋ بويىنشا جۇمىستار جۇرگىزىلۋدە. وسى ماقساتتا جۋرناليستىك قوعامداستىقپەن بىرلەسىپ جۇمىس توبى قۇرىلدى», دەدى ا.وماروۆ.

مينيسترلىك تسيفرلى ەفيرلىك تەلەراديو حابارلارىن تاراتۋدى دامىتۋ ىسىنە كوپ كوڭىل بولۋدە. بۇگىندە قازاقستان حالقىنىڭ 92,43%-ى تسيفرلى ەفيرلىك تەلەراديو حابارلارىن تاراتۋمەن قامتىلعان. 11 ءوڭىر تولىعىمەن تسەتحت-قا كوشتى. قالعان 6 ءوڭىردى 2024 جىلعا دەيىن كوشىرۋ جوسپارلانىپ وتىر. شىعىس قازاقستان وبلىسىندا راديوتەلەۆيزيالىق ستانساسى بيىل پايدالانۋعا بەرىلۋگە ءتيىس. تسەتحت-قا كوشۋ حالىق ءۇشىن وبلىستىق جانە رەسپۋبليكالىق ماڭىزى بار قالالاردا 30-عا دەيىن, وبلىس ورتالىعىنان تومەن دەڭگەيدە 15-كە دەيىن تەلەارنانى ترانسلياتسيالاۋعا مۇمكىندىك بەرەدى. ء«بىز حالىقتىڭ باق سالاسىنداعى مەملەكەتتىك ساياساتقا قاناعاتتانۋ دەڭگەيىن باعالاۋ ماقساتىندا الەۋمەتتىك زەرتتەۋلەر جۇرگىزۋدەمىز. 2021 جىلدىڭ قورىتىندىسى بويىنشا قاناعاتتانۋ دەڭگەيى 68,58%-دى قۇرادى», دەدى ا.وماروۆ.

مينيستر اقپاراتتىق ساياساتتى ءتيىمدى ىسكە اسىرۋ ماقساتىندا مەدياكەڭىستىك مونيتورينگى تۇراقتى تۇردە جۇرگىزىلەتىنىن ايتتى. «قازىرگى ۋاقىتتا مەملەكەت باسشى­سىنىڭ تاپسىرمالارىن ورىنداۋ بويىنشا ۇكىمەت قىزمەتىنە جۇرتشىلىقتىڭ جوعارى قىزىعۋشىلىعى بايقالادى», دەدى ول وسىعان وراي.

مينيستر جۇرتشىلىق پەن باق وكىلدەرى تاراپىنان بيلىك جۇمىسىنا سىننىڭ بولۋ سەبەپتەرىن دە تالداپ ءوتتى. ونىڭ سەبەپتەرىن تومەندەگىدەي توپتاستىرۋعا بولادى: بىرىنشىدەن, مەملەكەتتىك ورگاندار تاراپىنان باق-تا كەڭىنەن تۇسىندىرىلۋگە ءتيىس تاقىرىپتار بويىنشا اقپاراتتار تولىق بەرىلمەيدى. ەكىنشىدەن, جەكە جانە زاڭدى تۇلعالاردىڭ, سونداي-اق باق-تىڭ رەسمي ساۋالدارىنا جاۋاپتار تولىق بەرىلمەيدى; ۇشىنشىدەن, باق-قا تۋىنداعان ماسەلەلەردى تۇسىندىرۋگە بىلىك­تىلىگى جەتكىلىكسىز سپيكەرلەر ۇسىنىلادى. «اقپاراتتىق-ءتۇسىندىرۋ جۇمىسىنىڭ ماڭىزدىلىعىن ەسكەرە وتىرىپ, اتالعان فاكتورلار قوعامنىڭ ۇكىمەت قىزمەتىن تەرىس قابىلداۋىنا جانە تۇتاستاي العاندا مەملەكەتتىڭ وڭ جەتىستىكتەرىن نيۆەليرلەۋگە ىقپال ەتەدى», دەپ تۇيىندەدى ءسوزىن ا.وماروۆ.

ماسەلەنى قورىتىندىلاعان پرەمەر-مينيستر ءا.سمايىلوۆ قوعامدىق پىكىردى قالىپتاستىرۋدا بۇقارالىق اقپارات قۇرالدارىنىڭ ءرولى ەرەكشە ەكەنىن اتاپ ءوتتى. وسىعان وراي مەملەكەت پەن حالىق اراسىنداعى ءتيىمدى بايلانىس قۇرالى بولۋى ءۇشىن باسپاسوزگە وڭتايلى جاعداي جاساۋ – ماڭىزدى ماسەلە بولىپ وتىر.

مەملەكەت باسشىسى حالىققا جول­داۋىندا بۇقارالىق اقپارات قۇرالدارى باسەكەگە قابىلەتتى جانە تاۋەلسىز بولۋعا ءتيىس ەكەنىنە ءمان بەرگەن بولاتىن. «وسىعان بايلانىستى ازىرلەنىپ جاتقان «بۇقارالىق اقپارات قۇرالدارى تۋرالى» زاڭ جوباسى مەملەكەتتىڭ مۇددەلەرىن, قوعامنىڭ سۇرانىسىن جانە مەديا سالانىڭ دامۋ ۇردىستەرىن ەسكەرۋگە ءتيىس. زاڭ جوباسىنداعى جاڭالىقتاردى ۇكىمەتتىك ەمەس ۇيىمداردى, جۇرتشىلىقتى, ساراپشىلار مەن جۋرناليستەردى قاتىستىرا وتىرىپ, كەڭىنەن تالقىلاۋعا شىعارۋ قاجەت», دەگەن ۇكىمەت باسشىسى قۇجاتتى وسى جىلدىڭ سوڭىنا دەيىن پارلامەنت قاراۋىنا ەنگىزۋدى تاپسىردى.

پرەمەر-مينيستر «حالىق ۇنىنە قۇلاق اساتىن مەملەكەتتى» قالىپتاستىرۋ ءۇشىن اشىق اقپاراتتىق كەڭىستىكتى دۇرىس پايدالانۋ, الەۋمەتتىك جەلىلەر مەن بلوگوسفەرانىڭ ءرولىن ەسكەرۋ دە ماڭىزدى ەكەنىن ايتتى. «جۋرناليستەر قوعامدىق باقىلاۋ فۋنكتسياسىن ورىنداي وتىرىپ, بيلىكتىڭ بارلىق تارماقتارى جۇمىسىنىڭ تيىمدىلىگىن ارتتىرۋعا ىقپال ەتە الادى. سوندىقتان باسپاسوزبەن بىرلەسە جۇمىس جۇرگىزۋگە ناقتى قادامدار جاسالۋى كەرەك», دەدى ول.

ءا.سمايىلوۆ ورتالىق جانە جەرگىلىكتى اتقارۋشى ورگاندارعا ۆەدومستۆولاردىڭ سالالىق قىزمەتىنە ماماندانعان سپيكەر­لەردىڭ ساپالى پۋلىن قۇرۋدى تاپسىردى. ولار مەملەكەتتىك ورگانداردىڭ قىزمەتى تۋرالى تۇراقتى تۇردە ءتۇسىندىرۋ جۇمىستارىن جۇرگىزىپ وتىرۋعا ءتيىس.

ۇكىمەت باسشىسىنىڭ پىكىرىنشە, مەملەكەتتىك ورگانداردىڭ رەسمي وكىلدەرى, ءباسپاسوز حاتشىلارى رەسمي حابارلاردى بەرۋدىڭ جاڭا فورماتىنا كوشۋى كەرەك. ولارعا كاسىبي «قۇرعاق» تىلدە جازىلعان پرەسس-رەليزدەردى تاراتۋمەن عانا شەكتەلىپ قالۋعا بولمايدى. مەملەكەتتىك ورگاننىڭ قىزمەتىن الەۋمەتتىك جەلىلەردە بەلسەندى جاريالاپ, حالىقتىڭ سۇراقتارىنا تۇراقتى تۇردە جاۋاپ بەرۋ قاجەت.

ءسوز سوڭىندا ءاليحان سمايىلوۆ بۇقا­رالىق اقپارات قۇرالدارى قىزمەتكەرلەرىن كاسىبي مەرەكەلەرىمەن قۇتتىقتاپ, بىر­لەسكەن كۇش-جىگەر ۇكىمەتتىڭ جۇمىسىن بۇدان دا اشىق ءارى ءتيىمدى ەتۋگە مۇمكىندىك بەرەتىنىنە سەنىم ءبىلدىردى.