ەكى مەملەكەت اراسىندا پارلامەنتارالىق, ىسكەرلىك, عىلىمي جانە گۋمانيتارلىق بايلانىستاردى نىعايتۋ ماقساتىندا تاياۋدا ءماجىلىس دەپۋتاتتارى كورەيا رەسپۋبليكاسىنا ساپارمەن بارىپ كەلدى. اتالعان پالاتانىڭ اگرارلىق ماسەلەلەر كوميتەتىنىڭ توراعاسى رومين ءمادينوۆ باستاعان دەلەگاتسيا قۇرامىندا دەپۋتاتتار ءاليحان تويباەۆ, سۆەتلانا قادىراليەۆا, رومان كيم جانە عىلىم, بيلىك, كاسىپكەرلىك سالاسىنىڭ وكىلدەرى بولدى.
قازاقستان دەلەگاتسياسى مينيسترلىك وكىلدەرىمەن, كاسىپكەرلەرمەن جانە تانىمال جۋرناليستەرمەن كەزدەستى.
ايتا كەتۋ كەرەك, وسى ساپار بارىسىندا بيىل جازدا وسكەمەن قالاسىندا وتكەلى تۇرعان فورۋم ماسەلەسى ءسوز بولدى. شىعىس قازاقستان وبلىسىنىڭ اكىمى بەردىبەك ساپارباەۆتىڭ باستاماسىمەن ۇلكەن بيزنەس-فورۋم وتەتىنى جوسپارلانۋدا. وعان كورەيادان ارنايى مەيماندار شاقىرىلىپ وتىر. شىعىس قازاقستان ءوڭىرىنىڭ تابيعاتى مەن ەكونوميكالىق الەۋەتى جانە كەلەشەگى جاڭا جوبالاردىڭ ىسكە اسىرىلۋىنا جول اشاتىنى ءسوزسىز. قازىردىڭ وزىندە وبلىستا قازاقستاندىق-كورەيالىق بىرلەسكەن جوبالار ىسكە اسىرىلىپ جاتىر. سونىمەن قاتار, 1991 جىلى قازاقستان پرەزيدەنتى نۇرسۇلتان نازارباەۆتىڭ جارلىعىمەن سەمەي سىناق ايماعىنىڭ جابىلعاندىعى, قازاقستاننىڭ يادرولىق قارۋدان باس تارتقانى, ەلباسىنىڭ يادرولىق قارۋعا قارسى باستامالارى الەمگە ايگىلى.
ساپار بارىسىندا كورەيا رەسپۋبليكاسى ۇلتتىق اسسامبلەياسىندا ەكى ەلدىڭ پارلامەنتشىلەرى جۇزدەسىپ, پىكىر الماستى. تاقىرىپتىڭ ارقاۋى اۋىل شارۋاشىلىعىن دامىتۋ ماسەلەلەرى توڭىرەگىندە بولدى. ر.ءمادينوۆ ءوز سوزىندە قازاقستاننىڭ اگرارلىق سالاسى, قولعا الىنىپ جاتقان ىستەر جايلى ايتىپ ءوتتى. قازاق ەلىنىڭ اگروونەركاسىپ سالاسىنىڭ ينۆەستيتسيالىق مۇمكىندىكتەرى تۋرالى بايانداپ بەردى. زاڭنامالىق تۇرعىدا اۋىل شارۋاشىلىعى تاۋارىن وندىرۋشىلەرگە قانداي جەڭىلدىكتەر جاسالاتىنىنا توقتالدى.
بۇگىنگى تاڭدا قازاقستانعا قوماقتى ينۆەستيتسيا سالىپ وتىرعان ەلدىڭ ءبىرى – كورەيا رەسپۋبليكاسى. ەكى ەلدىڭ ىنتىماقتاستىعى جاڭا ءمۇمكىندىكتەرگە جول اشىپ وتىر. قازاقستان دەلەگاتسياسى عىلىمي-زەرتتەۋ ينستيتۋتىندا, شارۋا قوجالىقتارىندا بولدى, سونداي-اق, جىلىجايلاردى ارالاپ كوردى. اگرارلىق سالاعا ەنگىزىلىپ جاتقان جاڭا تەحنولوگيالارمەن تانىستى.
«ەگەمەن-اقپارات».