قازاقستان قارۋلى كۇشتەرىنىڭ اسكەري بورتى ۇلى وتان سوعىسى جىلدارىندا قازا تاپقان قازاقستاندىق جاۋىنگەرلەردىڭ – نيكولاي ماتۆەەۆيچ گۋروۆتىڭ, تولەگەن ۇركەرباەۆتىڭ جانە پەتر ابراموۆيچ فومەنكونىڭ سۇيەكتەرىن ماسكەۋدەن نۇر-سۇلتانعا جەتكىزدى, دەپ حابارلايدى Egemen.kz وكق سايتىنا سىلتەمە جاساپ.
ءراسىم بارىسىندا قورعانىس ءمينيسترى گەنەرال-پولكوۆنيك رۋسلان جاقسىلىقوۆ ۇلى وتان سوعىسىندا قازا تاپقان قازاقستاندىق جاۋىنگەرلەردىڭ سۇيەكتەرىن ىزدەستىرۋگە بەلسەنە قاتىسقانداردىڭ بارىنە ريزاشىلىعىن جەتكىزىپ, العىسىن ءبىلدىردى.
– سۇراپىل سوعىستان ورالماي, حابار-وشارسىز كەتكەن ساربازدار مەن وفيتسەرلەردىڭ ۇرپاقتارى ءالى كۇنگە دەيىن بابالارى جايلى حابار كۇتەدى. سوعىستا قازا تاپقان سوڭعى سارباز جەرلەنگەنگە دەيىن ىزدەۋ جالعاسا بەرمەك. ءبىز بىرلەسىپ اتقارىپ جاتقان جۇمىس جاستارعا اسكەري-پاتريوتتىق تاربيە بەرۋگە, قازاقستاندىق جاۋىنگەرلەردىڭ جانقيارلىعى مەن باتىلدىعى تۋرالى تاريحتى جادىمىزدا ساقتاۋعا بارىنشا ىقپال ەتەرىنە سەنىمدىمىن, – دەدى قورعانىس ۆەدومستۆوسىنىڭ باستىعى.
قازا تاپقان جاۋىنگەرلەردىڭ سۇيەكتەرىن جەتكىزۋدى «Atamnyn Amanaty» قوعامدىق ۇيىمى ۇيىمداستىردى. بۇل ۇيىم قازاقستاننان ۇلى وتان سوعىسىنا اتتانىپ, قازا تاپقان جانە حابارسىز كەتكەن ساربازداردىڭ جەرلەنگەن جەرىن انىقتاۋ بويىنشا مۇراعاتتىق-ىزدەستىرۋ جۇمىستارىمەن اينالىسادى.
– سۇراپىل سوعىستىڭ باستالعانىنا سەكسەن جىلدان استام ۋاقىت ءوتتى. ءبىزدىڭ ۇيىم بۇل رەتتە مۇراعات دەرەكتەرىن جيناۋدا تىنىمسىز جۇمىس ىستەپ كەلەدى. جەڭىس جولىندا ءبىزدىڭ جارقىن بولاشاعىمىز ءۇشىن قازا تاپقانداردىڭ ەسىمدەرى انىقتالىپ, ولار ىزدەۋشىلەرمەن ۇنەمى بايلانىستا بولادى, – دەدى «Atamnyn Amanaty» باسقارماسىنىڭ توراعاسى مۇرات مولداعاليەۆ.
قازىر پەتر ابراموۆيچ فومەنكو – قوستاناي وبلىسى التىنسارين اۋدانىنىڭ ششەرباكوۆكا اۋىلىنان, ۇركەرباەۆ تولەگەن – الماتى وبلىسىنىڭ ۇزىناعاش كەنتىنەن, گۋروۆ نيكولاي ماتۆەەۆيچ – الماتى قالاسىنان ەكەنى ناقتىلاندى.
اتالعان وڭىرلەردە جاۋىنگەرلەردىڭ سۇيەكتەرىن قارسى الۋ, تۋىستارىنا بەرۋ جانە اسكەري قۇرمەت كورسەتىلىپ, قايتا جەرلەۋ راسىمدەرى وتەدى.