استانا. 25 ءساۋىر. پارلامەنت سەناتىنىڭ دەپۋتاتى سۆەتلانا جالماعامبەتوۆا ارىپتەستەرىن اتباسارداعى سۋ تاسقىنىنان زارداپ شەككەندەرگە ءبىر كۇندىك ەڭبەكاقىلارىن اۋدارۋعا ۇندەدى. بۇل تۋرالى «31 ارنا» حابارلادى.
بۇعان دەيىن بەلگىلى بولعانداي, بيۋدجەتتەن سۋ استىندا قالعاندارعا ءبىر رەتتىك جاردەماقى بەرىلگەن. الايدا, ونىڭ مولشەرى ماردىمسىز, نەبارى 46 مىڭ تەڭگە. وسى دەرەكتى العا تارتقان سەناتور سۆەتلانا جالماعامبەتوۆا سۋ استىندا قالعان وڭىرگە قوسىمشا 2,4 ميلليارد تەڭگە ءبولۋ كەرەكتىگىن ايتتى.
كەيىنگى دەرەكتەرگە قاراعاندا, اتباسار قالاسى مەن 4 اۋىلداعى 500-گە تارتا ءۇي سۋعا كەتكەن. 18 كوشە بۇزىلعان. 1,5 مىڭ تۇرعىن بار مۇلكىنەن ايىرىلعان. بۇعان قوسىمشا, ارنايى تەكسەرۋ بارىسىندا 164 باسپانانىڭ تۇرۋعا جارامسىزدىعى انىقتالدى. سونداي-اق, 1 مەكتەپ پەن 307 ۇيگە شۇعىل جوندەۋ جۇمىستارىن جۇرگىزۋ كەرەك.
پارلامەنت سەناتىنىڭ كەزەكتى وتىرىسىندا سۆەتلانا جالماعامبەتوۆا: «الداعى ۋاقىتتا وسىنداي زارداپتار بولماۋى ءۇشىن تاعى دا شارالار قولدانۋ كەرەك. ونىڭ ىشىندە كوپىردى جوندەۋ كەرەك. ونىڭ ىشىندە سۋ بوگەتتەرىن سالۋ كەرەك. وسىلاردىڭ بارىنە 2,5 ميللياردتاي قاراجات كەرەك», – دەدى.
جولدىباي بازار.
دەرەككوز: «31 ارنا».
فوتو: newskaz.kz.