استانا. 25 ءساۋىر. گەرمانيا تۇرعىنى, نەمىس روزەماري كراۋزە دەگەن ايەل استاناعا ارنايى كەلىپ, قورقىت كۇيلەرىن تارتىپ, كورەرمەننىڭ كوزايىمىنا اينالدى. بۇل تۋرالى egemen.kz ءتىلشىسى حابارلادى.
ەندى ءبىز روزەماريدىڭ قوبىزدى جانىنا قالاي سەرىك ەتكەنى جونىندە از-كەم توقتالايىق.
ونەرگە ءۇش قايناسا سورپاسى قوسىلمايتىن ماماندىق يەسى – پسيحولوگ-دارىگەر روزەماري وسىدان بىرنەشە جىل بۇرىن ءوز ەلىندە عايىپتان تايىپ, قۇلاققا جاعىمدى, جۇرەك شىمىرلاتار كەرەمەت ءبىر اۋەزدى قۇلاعى شالىپ قالادى. سودان باستاپ ونىڭ مازاسى كەتەدى. الگى اۋەن قانداي اسپاپپەن ورىندالعانىن بىلۋگە قانشا تالپىنسا دا, ماقساتىنا جەتە الماي, اۋرەلەنەدى. قولىن ءبىر سىلتەپ قويا سالايىن دەسە, ىشكى سارايى تىنىشىن الىپ, سەزىمىن سەرپىلتكەن جاڭاعى اۋەندى قايتا تىڭداۋعا ۇندەۋىن دوعارا قويمايدى.
ءسويتىپ جۇرگەندە, 2012 جىلى اۆستريانىڭ گراتس قالاسىندا قىلقوبىزشى, حالىقارالىق, رەسپۋبليكالىق بايقاۋلاردىڭ لاۋرەاتى, قازاقستاننىڭ مادەنيەت قايراتكەرى راۋشان ورازباەۆا قىزى توعجانمەن بىرگە قوبىز كۇيلەرىنەن كونتسەرت بەرەدى. وسى شارانىڭ وتەتىنىن الدىن الا ەستىگەن, جاتجۇرتتىقتاردىڭ كونتسەرتى بولادى دەگەن حابارلارعا ءبىرازدان بەرى قۇلاعىن ءتۇرىپ ءجۇرۋدى ادەتكە اينالدىرعان روزەماري ىزدەگەنىن سول جەردەن تاباتىنداي, بارلىق شارۋاسىن ىسىرىپ قويىپ, گراتس قالاسىنا جەتەدى. سويتسە, بوسقا اۋرە بولماپتى. جانى ەلەگىزە ىزدەگەن اۋەنىن الگى كونتسەرتتەن تاۋىپ, كوڭىلى جايلانادى.
قوبىز ءۇنىن قۇمارتا تىڭداپ, رۋحاني سەرپىلىپ قالعان نەمىس ايەلى كونتسەرتتەن كەيىن راۋشان ورازباەۆاعا جاتا كەلىپ, جابىسادى. تىلەگى – قوبىز تارتۋدى ۇيرەنۋ. ول راۋشانعا: «قوبىز تارتۋدى ۇيرەنگىم كەلەدى, ونىڭ ءۇنى مەنىڭ جۇرەگىمدى قوزعادى, كوڭىلىمدى تەربەتتى», – دەيدى. بەيتانىس ەۋروپالىق ايەلدىڭ قازاقتىڭ قاسيەتتى قوبىزىنا اسىق بولعانىنا قۋانعان راۋشان ورازباەۆا روزەماريدىڭ ءوتىنىشىن قابىلدايدى. سودان باستاپ روزەماري قوبىزشى قىزدىڭ تالاپتى شاكىرتى بولىپ شىعا كەلەدى.
راۋشان ورازباەۆا نەمىس ايەلىنە قوبىز ۇيرەتۋىن العاش جولىققان ساتتەن باستاپ كەتەدى. كەيىننەن روزەماري قوبىز تارتۋدى مەڭگەرە ءتۇسۋ ءۇشىن راۋشان ورازباەۆانى الماتىعا ىزدەپ كەلەدى. نە دەگەن قۇمارلىق دەسەڭىزشى! ەندى ونى قازاقتىڭ كيەلى قوڭىر قوبىزى استاناعا جەتەكتەپ اكەلدى.
راۋشان ورازباەۆا: «روزەماريگە ءدام-تۇز بۇيىرىپ, استاناعا جولى ءتۇستى. مۇندا ول مەنىڭ «اققۋ» اتتى شىعارماشىلىق كەشىمە قاتىستى. ول كورەرمەندەر قاتارىندا وتىرعان جوق. بىزبەن بىرگە, ياعني, ءوز شاكىرتتەرىمنەن قۇرالعان انسامبل قۇرامىندا قورقىت اتامىزدىڭ كۇيلەرىن تارتتى», – دەدى.
جولدىباي بازار.
دەرەككوز: egemen.kz.
فوتو: ورىنباي بالمۇرات.