ريددەر قالاسىندا جەراستى شاحتاسىنىڭ ۇستىڭگى قاباتى وپىرىلىپ, الىپ قازانشۇڭقىرعا ءسىرىڭكەنىڭ قورابىنداي اۋناپ تۇسكەن ءۇي تۇرعىنداردى ۇرەيلەندىرگەنى بەلگىلى. قازىرگى تاڭدا قالا جۇرتشىلىعى, اسىرەسە, اپات بولعان اۋماقتىڭ وتباسىلارى كوڭىلدەرىن بيلەگەن قورقىنىشتان بىرتىندەپ سەيىلە باستادى. مۇنى ريددەرگە بارعان ساپارىمىزدا اڭدادىق.
وقيعا ورىن العاننان بەرگى ەكى اپتادان استام ۋاقىتتا بىرقاتار كەشەندى جۇمىستار اتقارىلدى. بۇگىندە الىپ قازانشۇڭقىردىڭ ەرنەۋى تولىق تولتىرىلعان. قىرتىستى بەكىتۋ ءۇشىن وعان بەتون قۇيىلعان ەكەن. جەر استىندا 5 كولبەۋ تىرەك جۇيەسى ورناتىلىپتى. بۇگىندە التىنشىسى جاسالىپ جاتىر. سالماق جاعدايىن تەكسەرۋ باعىتىندا قوسىمشا باقىلاۋعا ارنالعان بۇرعىلاۋ جۇمىستارى جۇرگىزىلۋدە. وسى ۋاقىتقا دەيىن 629 مەتر اۋماق بۇرعىلانعان. بۇل جۇمىس تا جالعاسىن تابۋدا. اۋداندا جەردىڭ بەتكى قاباتىنىڭ جاعدايىنا مونيتورينگ جاساۋعا ارنالعان ەكى باقىلاۋ ستانساسى ورناتىلدى.
كەنىشتىڭ يەسى سانالاتىن «قازتسينك» جشس مەن قالا اكىمدىگى اراسىندا مەموراندۋم قابىلداندى. وسى قۇجاتقا سايكەس كاسىپورىن اپات اۋماعىنداعى ۇيلەر ورنالاسقان القاپ كوشەسىن جارىقتاندىرۋ, جول سالۋ جانە كورىكتەندىرۋ جۇمىستارىن ءجۇرگىزۋگە ۋادە بەردى. قازىردىڭ وزىندە وزەن كوشەسى بويىنا قيىرشىق تاستان جول توسەلسە, القاپ كوشەسىنىڭ بويىمەن «رەچنوي» دۇكەنىنە دەيىن 19 كوشە شامى قويىلعان. ال جابىلعان قازانشۇڭقىر اۋماعىنىڭ ۇستىندە بالالارعا ارنالعان ويىن نەمەسە سپورت الاڭىن سالۋ جوسپارلانىپ وتىر. مۇنى تۇپكىلىكتى شەشۋدى كومپانيا تۇرعىنداردىڭ ءوز تاڭداۋىنا قالدىرىپتى.
كومپانيا جەتەكشىلەرىنىڭ ايتۋىنشا, ۇيىنەن ايىرىلىپ, اپاتتان زارداپ شەككەن وتباسىنا ەكى ءۇي بەرىلەدى. ولار پاتەرگە قاجەتتى جيھازعا وزدەرى تاڭداۋ جاسادى. قازىر تولتىرىلعان قازانشۇڭقىر ماڭايىندا ورنالاسقان عيماراتتارعا قاۋىپ ءتونىپ تۇرعان جوق. ارنايى قۇرىلعان كوميسسيا تەحنيكالىق تەكسەرۋ جۇمىستارىن جالعاستىرىپ جاتىر.
– اۋماقتى تولىعىمەن قاۋىپسىز دەپ تانۋ ءۇشىن بىلىكتى گەولوگيا ماماندارى جۇمىس ىستەۋدە. قاۋىپتى اۋماق ورنىندا توتەنشە جاعدايلار دەپارتامەنتىنىڭ ماماندارى بار توپ قۇرىلعان. سونداي-اق, ريددەر قالاسى اكىمدىگىمەن كەلىسە وتىرىپ, تاۋەلسىز كونسالتينگ كومپانياسىمەن اۋماقتاعى ۇيلەردى باعالاۋ جۇرگىزىلىپ جاتىر. كونسالتينگ فيرماسى ءار ۇيگە قانداي دەڭگەيدە زاقىم كەلگەنىن انىقتاپ, وزدەرىنىڭ تەحنيكالىق سيپاتتاماسىن بەرەدى, – دەدى «قازتسينك» جشس ۆيتسە-پرەزيدەنتى اندرەي لازارەۆ.
كومپانيا وكىلدەرى وقيعا ورىن العان كۇننەن بەرى تۇرعىنداردىڭ باستاماشىل توبىمەن كۇن سايىن كەزدەسىپ, ساراپشىلارمەن تىعىز جۇمىس جۇرگىزگەندەرىن جەتكىزدى. ولاردىڭ ايتۋلارىنشا, 16 ۋچاسكەنىڭ ىشىندە قاۋىپتى اۋماققا 11 ءۇي مەن 1 دۇكەن جاتقىزىلعان. ال قالعان 4 ۋچاسكەدە تۇرعىن ءۇي جوق. بۇگىندە قاۋىپسىز جەرگە كوشىرىلگەن تۇرعىندار ءوز ۇيلەرىنە ورالىپ جاتىر. «قازتسينك» پروفيلاكتوريىندە ءوز ۇيىنە ورالۋعا جۇرەكسىنىپ وتىرعان 5 وتباسى قالىپتى. ولاردىڭ دەنساۋلىعى مەن تاماقتانۋى جانە تاعى باسقا تۇرمىستىق ماسەلەلەرىمەن كومپانيا ماماندارى شۇعىلدانۋدا. تۇرعىندار كاسىپورىن تاراپىنان 6 ملن. 900 مىڭ تەڭگە كولەمىندە وتەماقى الدى.
– زارداپ شەكككەن تۇرعىنداردىڭ تالاپ-تىلەگىمەن ارنايى كوميسسيا مۇقيات تانىسىپ, بارلىعىن ەسكەرۋى ءتيىس, – دەدى اپات سالدارىن جويۋ جۇمىستارىمەن تانىسۋ بارىسىندا ءوڭىر باسشىسى بەردىبەك ساپارباەۆ.
وبلىس اكىمى ارنايى كوميسسيا قۇرامىندا مىندەتتى تۇردە جەرگىلىكتى زارداپ شەككەن تۇرعىنداردىڭ وكىلدەرى بولۋى كەرەكتىگىن, اتالعان اۋماققا قاتىستى ارنايى باعدارلاما دايىندالاتىنىن, جەرگىلىكتى تۇرعىندارعا قاجەتتى ينفراقۇرىلىم ماسەلەلەرى شەشىلەتىنىن اتاپ ءوتتى.
دۋمان اناش,
«ەگەمەن قازاقستان».
شىعىس قازاقستان وبلىسى,
ريددەر قالاسى.