ەلىمىزدە اەس-ءتىڭ ەكى رەاكتورىنىڭ قۇرىلىسىنا 10-12 ملرد دوللار جۇمسالۋى مۇمكىن. بۇل تۋرالى «سامۇرىق-قازىنا» اق-ءنىڭ ەنشىلەس كاسىپورنى «قازاقستان اتوم ەلەكتر ستانتسيالارى» جشس ءباسپاسوز قىزمەتى مالىمدەدى, دەپ حابارلايدى Egemen.kz.
«الدىن الا ەسەپتەۋلەر بويىنشا, قازاقستاندا ارقايسىسىنىڭ قۋاتى 1,4 مىڭ مۆت بولاتىن 2 رەاكتورلى اەس سالۋ كەرەك. بولجام بويىنشا ونىڭ قۇرىلىسىنا 10-12 ملرد دوللار جۇمسالماق. سونداي-اق, اەس-ءتى پايدالانۋ مەرزىمىن 60 جىلدان 100 جىلعا دەيىن ۇزارتۋ مۇمكىندىگىن قاراستىرامىز. جالپى, اەس قۇرلىسىن نەسيە بەرۋ ارقىلى نەمەسە كوممەرتسيالىق جوبا اياسىندا سالۋ ۇسىنىلادى», دەلىنگەن حابارلامادا.
«قازاقستان اتوم ەلەكتر ستانتسيالارى» سەرىكتەستىگىنىڭ مالىمەتىنشە, ەلىمىزدە اەس سالۋعا 6 شەتەلدىك كومپانيا نيەت بىلدىرگەن.
«ەلىمىزدە اەس سالۋعا نيەتتى KHNP (وڭتۇستىك كورەيا), EDF (فرانتسيا), روساتوم (رەسەي), NuScale Power (اقش), CNNC (قىتاي), General Electric-Hitachi (اقش پەن جاپونيانىڭ بىرلەسكەن كومپانياسى) كاسىپورىندارىنان ۇسىنىس ءتۇستى. ءبىز 3 نەمەسە 3+ بۋىنىنا سايكەس كەلەتىن رەاكتورلاردى سالۋدى قاراستىرىپ وتىرمىز, ويتكەنى ولار قاۋىپسىز. بۇل باعىتتا ءبىزدىڭ تالاپتارعا ساي كەلەتىن رەسەي, كورەيا, فرانتسيا جانە قىتاي كومپانيالارىنىڭ رەاكتورلارى بار. ال, شاعىن جانە ورتا قۋاتتى رەكتورلاردى اقش-تىڭ General Electric-Hitachi جانە NuScale كومپانيالارىنان الۋ بويىنشا كوممەرتسيالىق جۇمىستار پىسىقتالىپ جاتىر», دەلىنگەن مالىمدەمەدە.
اەس سالۋعا 6 جىلداي ۋاقىت كەرەك. دەگەنمەن, ۇسىنىستى قوعامدىق تالقىلاۋدان وتكىزۋگە, قاجەتتى قۇجاتتار دايىنداۋعا دا ۋاقىت كەرەك. جالپى العاندا, بۇل 10 جىلعا سوزىلۋى مۇمكىن.