باس پروكۋراتۋرا «ديكي ارماننىڭ» قىلمىستىق توبىنا قاتىستى جاڭا مالىمەتتەردى جاريالادى, دەپ حابارلايدى Egemen.kz.
باس پروكۋراتۋرانىڭ قىلمىستىق قۋدالاۋ قىزمەتىنىڭ باسشىسى سەرىك شالاباەۆ قاڭتار وقيعاسى كەزىندە قىلمىستىق توپتىڭ تارتىپسىزدىكتەرگە بەلسەنە قاتىسقانىن, وندا ارمان جۇماگەلديەۆ نەمەسە «ديكي ارماننىڭ» ءرولى ەرەكشە بولعانىن ايتتى.
«6 قاڭتاردا توپ مۇشەلەرىنىڭ ءبىرى الماتىداعى «قازاقستان» قوناقۇيىنە ۇيىمداسقان تۇردە كەلگەن قىلمىسكەرلەرگە Glock جانە «ماكاروۆ» تاپانشالارىن تاراتقان. قارۋلانعان قىلمىسكەرلەر ءبىر ۋاقىتتا ۇيىمداستىرۋشى مەن ونىڭ سىبايلاستارىنان نۇسقاۋ العان. ولار سىبايلاستاردى 10 توپقا ءبولدى, ولاردىڭ جوسپارلانعان قىلمىستا ءرولى بولدى. «جاۋاپتىلار» تاعايىندالىپ, ولارعا ۇيىمداستىرۋشىلار وق وتپەيتىن كەۋدەشە, باستى قورعايتىن قۇرالدار, اتىس قارۋى جانە 200 مىڭ تەڭگە بەرگەن», دەدى س.شالاباەۆ.
ونىڭ ايتۋىنشا, قاراپايىم سىبايلاستارعا سويىلدار جانە باسقا دا زاتتارمەن قارۋلانۋ تاپسىرىلعان. ەرەكشە بەلگى رەتىندە بارلىق قىلمىسكەردىڭ قولىندا اق تاڭعىش بولۋى كەرەك بولعان.
«قالانىڭ تۇكپىر-تۇكپىرىنەن كەلگەن قارۋلى قىلمىسكەرلەردىڭ بۇل توپتارى 24 ازاماتتى ۇرلاپ اكەتىپ, ۇرىپ-سوعىپ, Ritz Carlton جانە «قازاقستان» قوناقۇيلەرىنىڭ اۆتوتۇراعىندا ۇستاعان. ارتىنشا جابىرلەنۋشىلەر قالانىڭ شەتىنە جەتكىزىلىپ, تەمىر كونتەينەرگە قامالعان. جاراقات ناتيجەسىندە جابىرلەنۋشىلەردىڭ ءبىرى قايتىس بولدى», دەدى ول.
وسى قىلمىستاردى جاساعانى ءۇشىن 40 كۇدىكتى قاماۋعا الىندى. قىلمىستىق توپتىڭ قالعان مۇشەلەرىن انىقتاۋ جۇمىستارى جالعاسىپ جاتىر.