ەلىمىزدەگى ەكولوگيالىق احۋالى ناشار ءوڭىردىڭ قاتارىندا اتىراۋ وبلىسى دا بار. ال اۋاسى لاستانعان 10 قالانىڭ تىزىمىنە مۇنايلى شاھار دا ەنگەن. بۇل ءوڭىر تۇرعىندارى اراسىندا ءتۇرلى اۋرۋدىڭ بەلەڭ الۋىنا اسەر ەتىپ وتىر.
وبلىستىق ونكولوگيا ديسپانسەرىنىڭ ديرەكتورى ەلميرا ساپاروۆانىڭ مالىمەتىنە سۇيەنسەك, بىلتىر قاتەرلى ىسىكپەن اۋىرعان 1 063 ناۋقاس تىركەلگەن. ونكولوگيالىق اۋرۋلاردىڭ جوعارى كورسەتكىشى ماقات, قىزىلقوعا, يندەر اۋداندارىندا بايقالىپتى. ونىڭ ىشىندە وكپە راگى, ءسۇت بەزى, كولورەكتالدى وبىرى باسىم بولىپ تۇر. اسقازان وبىرى دا اسقىنعان. جاتىر موينى جانە ءسۇت بەزى وبىرىن انىقتاۋ ءۇشىن ايەلدەردى سكرينينگتىك تەكسەرۋ كورسەتكىشى سايكەسىنشە, 92% جانە 94% قۇراعان. تەكسەرۋدىڭ ناتيجەسىندە ءسۇت بەزى وبىرىنىڭ 26, جاتىر موينى وبىرىنىڭ 16, توق-
ىشەك قاتەرلى ىسىگىنىڭ 5 جاعدايى ەرتە ساتىسىندا انىقتالىپتى.
– ونكولوگيالىق اۋرۋلاردان ءولىمنىڭ تومەندەۋى 100 مىڭ تۇرعىنعا شاققاندا 74 پايىزدى قۇرايدى. جىل باسىنان بەرى قاتەرلى ىسىكپەن 241 ناۋقاس تىركەلدى. بۇل وتكەن جىلمەن سالىستىرعاندا 29 ناۋقاسقا ازايىپ, اۋرۋ كورسەتكىشىنىڭ ديناميكاسى 11,9 پايىزعا تومەندەدى, – دەپ ءمالىم ەتتى ە.ساپاروۆا.
بىلتىر اتىراۋ وبلىسىنىڭ 2021-2025 جىلدارعا ارنالعان الەۋمەتتىك-ەكونوميكالىق دامۋىنىڭ كەشەندى جوسپارى قابىلدانعان ەدى. وبلىستىق دەنساۋلىق ساقتاۋ باسقارماسىنىڭ باسشىسى اسحان بايدۋاليەۆتىڭ ايتۋىنشا, اتالعان جوسپار اياسىندا 14 مەديتسينالىق ەمدەۋ نىسانىن اشۋ جوسپارلانعان. قازىر ءتورت نىساننىڭ قۇرىلىسى ءجۇرىپ جاتىر.
– ءوڭىردىڭ دەنساۋلىق ساقتاۋ سالاسىندا 35 مەكەمە بار. وندا 6 747 مەديتسينا قىزمەتكەرى تۇرعىندارعا قىزمەت كورسەتەدى. اتىراۋ قالاسىنداعى «وركەن», «نۇرسايا» شاعىن اۋداندارىندا №4 جانە №5 قالالىق ەمحانالارعا قوسىمشا 250 ادامدى قابىلدايتىن ەكى ەمحانا قۇرىلىسىن سالۋ جوسپارلانىپ وتىر. ەمحانالاردىڭ جوبالاۋ-سمەتالىق قۇجاتتارى جاساقتالدى. سونداي-اق 250 ەمدەلۋشىگە ارنالعان پسيحيكالىق دەنساۋلىق ورتالىعى سالىنادى. ونىڭ قۇرىلىس جۇمىستارى وسى جىلدىڭ ءتورتىنشى توقسانىندا باستالادى, – دەيدى اسحان بايدۋاليەۆ.
ونىڭ مالىمەتىنە قاراعاندا, اتىراۋ قالاسىندا قۇرىلىسى باستالاتىن جەدەل جاردەم ستانساسىن ءۇش پودستانساسىمەن سالۋ جوباسىنا تۇزەتۋ ەنگىزىلدى. قازىر جاڭا جوبا ىشكى اۋديت دەپارتامەنتىندە ساراپتامادان وتكىزىلىپ جاتىر. جاڭا نىساننىڭ قۇرىلىسىن ءۇشىنشى توقساندا باستاۋ كوزدەلىپ وتىر. ال وبلىستىق ونكولوگيالىق ديسپانسەر جانىنان راديولوگيالىق كورپۋس سالۋ ءۇشىن جوبالىق-سمەتالىق قۇجاتتى دايىنداۋ قولعا الىنعان.
اتىراۋ وبلىسى