قاراعاندى. 23 ءساۋىر. قاراعاندىدا وڭىرلىك دامۋ مينيسترلىگى مەن جەرگىلىكتى ءۇي سالۋشىلاردىڭ اراسىندا داۋ-داماي تولاستاماي تۇر. قازىرگى كەزدە ءورشي تۇسكەن جانجالدىڭ تۋىنداۋىنا قۇرىلىس جۇمىستارىن جۇرگىزۋشىلەردىڭ تاراپىنان بولىپ جاتقان ورەسكەل قاتەلىكتەر سەبەپ بولۋدا. بۇل تۋرالى «ەكسپرەسس ك» حابارلادى.
وڭىرلىك دامۋ مينيسترلىگى قاراعاندى قالاسى اۋماعىندا جاڭادان بوي كوتەرىپ جاتقان «شاپاعات» شاعىن اۋدانىنىڭ كەلەشەگىنە كۇمانمەن قاراۋدا. ويتكەنى, «شاپاعات» وسىدان ءبىراز ۋاقىت بۇرىن وپىرىلىپ تۇسكەن «بەسوبا» تۇرعىن ءۇي كەشەنىنىڭ ورنىنا تۇرعىزىل جاتىر. مينيسترلىك وكىلدەرى بۇل شاعىن اۋدان اتى كەڭگە جايىلعان «بەسوبانىڭ» كۇيىن كەشۋى ابدەن مۇمكىن دەپ وتىر. سونداي-اق, تالاپقا ساي ەمەس, ساپاسىز دەپ ەسەپتەلىنگەن بىرنەشە ۇيلەردىڭ تىزىمىنە «قولجەتىمدى باسپانا» باعدارلاماسى بويىنشا سالىنىپ جاتقان قۇرىلىستار دا ەنگەن.
قۇرىلىس ىستەرى جونىندەگى كوميتەت پەن قۇرىلىس جانە تۇرعىن ءۇي-كوممۋنالدىق شارۋاشىلىق ىستەرى اگەنتتىگىنىڭ ماماندارى وتكەن اقپان ايىنان بەرى «شاپاعات» شاعىن اۋدانىنداعى تۇرعىزىلىپ جاتقان ۇيلەرگە تەكسەرۋ جۇرگىزگەندە, تسەمەنت بلوكتاردىڭ تىم ناشار ەكەنىن, الدەن مايىسىپ تۇرعانىن كورگەن. بۇعان قوسا, باقىلاۋشىلار قابىرعالاردى ورۋگە كۇيگەن كىرپىشتى ەمەس, ارزان, ساپاسىز شلاكوبلوكتاردىڭ پايدالانىلعانىن انىقتاعان. سونىمەن قاتار ءۇي سالۋشىلار بىرقاتار تەحنيكالىق قاجەتتىلىكتەردى ەسكەرمەگەن.
وڭىرلىك دامۋ مينيسترلىگىنىڭ ماماندارى, اسىرەسە, بيۋدجەتتىڭ 700 ملن. تەڭگەسىنە سالىنىپ جاتقان كوپ قاباتتى ەكى ءۇيدىڭ قۇرىلىسىن قاتتى سىناۋدا. مۇنىڭ بىرەۋىن قايتادان دەمونتاج جاساۋ كەرەك كورىنەدى. ويتكەنى, ونىڭ مونوليت ۇستىندارى ءوز ورنىنان شامادان تىس اۋىتقىعان. مامانداردىڭ ايتۋىنشا, ەگەر, قۇرىلىس ىستەرى وسىلاي جالعاسا بەرسە, بۇل ءۇي قۇلاۋ قاۋپى باسىم ۇيلەر قاتارىنا جاتقىزىلۋى مۇمكىن.
جولدىباي بازار.
دەرەككوز: «ەكسپرەسس ك».
فوتو: azattyg.org.