استانا. 23 ءساۋىر. قازاقستان ءسپيرتتى ىشىمدىكتى پايدالانۋ جاعىنان ورتالىق ازيا ەلدەرى اراسىندا ءبىرىنشى ورىندا كەلەدى. بۇل تۋرالى بۇگىن
پارلامەنت ءماجىلىسىنىڭ كەزەكتى وتىرىسىندا پرەمەر-ءمينيستردىڭ ورىنباسارى -قارجى ءمينيسترى باقىت سۇلتانوۆ مالىمدەدى.
ب.سۇلتانوۆتىڭ ايتۋىنشا, قازاقستان جان باسىنا شاققاندا, ورتالىق ازيادا الكوگول ونىمدەرىن ەڭ كوپ تۇتىناتىن, ياعني ەڭ كوپ ىشەتىن ەل بولىپ وتىر. الايدا, بۇل تۇجىرىمعا دەپۋتات ۆ.كوسارەۆ قارسى شىقتى. «قۇدايعا شۇكىر, - دەدى ول, - بۇگىنگى كۇنى قازاقستاندىقتاردىڭ الكوگول ونىمدەرىن تۇتىنۋ مادەنيەتى ارتقانىن جوققا شىعارۋعا بولمايدى. قازىر ءىشىپ الىپ, سەلەڭدەپ جۇرگەن ەشكىمدى دە كورمەيسىڭ. ەسكە الۋ, جانازا سەكىلدى شارالاردا ول مۇلدە بولمايتىنىن كورىپ ءجۇرمىز. سوندىقتان الكوگولدى تۇتىنۋ مادەنيەتىن ارتتىرا بەرۋ جاعىنا كوڭىل ءبولۋ كەرەك».
ال دەپۋتات الدان سمايىلوۆ الكوگول ونىمدەرىن ساتاتىن دۇكەندەردىڭ بالالار مەن جاسوسپىرىمدەر ورتالىعىنان كەم دەگەندە 100 مەتر جەردە بولۋى تۋرالى تالاپتىڭ جوبادان ءتۇسىپ قالعانىنا قىنجىلىس ءبىلدىردى. ول سونىمەن قاتار نورۆەگيانىڭ تاجىريبەسىن العا تارتىپ, مەرەكە جانە دەمالىس كۇندەرى اراق-شاراپتىڭ مۇلدە ساتىلماۋىنا كوڭىل اۋدارۋ قاجەتتىگىنە نازار اۋداردى.
زاڭ جوباسى قىسقا تالقىلاۋدان كەيىن تولىق ماقۇلدانىپ, ەكىنشى وقىلىمعا دايىندالۋعا جونەلتىلدى.
جاقسىباي سامرات.
دەرەككوز: egemen.kz.
فوتو: www.inform.kz.