شىمكەنتتە قازاقستاننىڭ ءتۇرلى وڭىرلەرىندە 18 ادامدى الداعان ەكى الاياق ۇستالدى. ءتارتىپ ساقشىلارى اتاپ وتكەندەي, جابىرلەنۋشىلەردىڭ سانى بۇدان دا كوپ بولۋى مۇمكىن. قازىر سوتقا دەيىنگى تەرگەۋ ءجۇرىپ جاتىر, دەپ حابارلايدى Egemen.kz.
شىمكەنت پد تەرگەۋ باسقارماسىنىڭ باستىعى داۋلەتكەلدى ابدرامانوۆ بريفينگتە جەرگىلىكتى تۇرعىن پوليتسياعا ارىز جازعانىن ايتتى.
ول ءوزىنىڭ ەسكى جيھازىن ساتۋ تۋرالى جارنامانى ينتەرنەتتە ورنالاستىرعانىن حابارلادى.
جابىرلەنۋشىنىڭ مەسسەندجەرى ارقىلى بىرەۋدىڭ جيھاز ساتىپ العىسى كەلەتىنى تۋرالى حابارلاما كەلىپ تۇسكەن. بۇدان سوڭ, ول سىلتەمە بويىنشا ءوتىپ, كۋرەرلىك جەتكىزۋ تاپسىرىسىن راستاۋدى سۇراعان. ايەل جالعان ساتىپ الۋشىنىڭ نۇسقاۋلارىنا سۇيەنە وتىرىپ, سايت سۇراعان بانك كارتاسىنىڭ دەرەكتەمەلەرىن ەنگىزگەن. سودان كەيىن ونىڭ شوتىنان 950 مىڭ تەڭگە جوعالىپ كەتكەن. ال ونلاين سۇحباتتاسۋشى ونى مەسسەندجەردە بۇعاتتاپ تاستاعان.
ارىز بويىنشا قر قك 190-بابى «الاياقتىق» بويىنشا قىلمىستىق ءىس تىركەلدى.
«كيبەرقىلمىسكەرلەردى انىقتاۋ ءۇشىن جەدەل ۋاكىلدەر بىرقاتار ىزدەستىرۋ شاراسىن جۇرگىزدى, ناتيجەسىندە ەكى جىگىت ۇستالدى. ءتىنتۋ كەزىندە كۇدىكتىلەردەن التى ۇيالى تەلەفون مەن 21 SIM-كارتا تاركىلەندى», دەدى داۋلەتكەلدى ءابدىرامانوۆ.
تەرگەۋ ناتيجەلەرى كورسەتكەندەي, ۇستالعانداردىڭ وسىعان ۇقساس تاعى 17 قىلمىسقا قاتىسى بار.