نۇر-سۇلتان تۇرعىنى پوليتسەيگە قاراقشىنى ۇستاۋعا كومەكتەستى, دەپ حابارلايدى Egemen.kz Polisia.kz سايتىنا سىلتەمە جاساپ.
پوليتسيا مالىمەتىنشە, عابدۋلين كوشەسىندە ەر ادام 61 جاستاعى ايەلگە شابۋىل جاساپ, ءاميانىن تارتىپ العان. كۋاگەر 37 جاستاعى ەلوردا تۇرعىنى قاناعات حاسەنوۆ بولعان. ول جابىرلەنۋشى تونالعانىن بىردەن تۇسىنگەن. ءسويتىپ, ول قاراقشىعا قاراي جۇگىرگەن.
«ايەلدىڭ كومەك سۇراعان ايقايىن ەستىدىم. ارتقا بۇرىلىپ قاراسام, وتىرار كوشەسىنە قاراي جۇگىرىپ بارا جاتقان ادامدى كورسەتىپ تۇر ەكەن. بىردەن قاراقشىنىڭ سوڭىنان جۇگىردىم», دەدى قاناعات.
ول قۋىپ جەتىپ, ەر ادامدى جەرگە قۇلاتقان. الايدا شابۋىلداۋشى قارسى تۇرعان.
بۇل ۋاقىتتا «بايقوڭىر» اۋدانىنىڭ ۋچاسكەلىك پوليتسيا ينسپەكتورى رۋسلان ابىلقايىروۆ ءوزىنىڭ اكىمشىلىك ۋچاسكەسىن ارالاپ جۇرگەن. كوشەدەگى توبەلەس ونىڭ نازارىن اۋدارعان, وسىلايشا ول جانجالعا ارالاسقان. ءسويتىپ, پوليتسەي كۇدىكتىنى ۇستاعان.
قازىر كۇدىكتى نۇر-سۇلتان پد ۋاقىتشا ۇستاۋ يزولياتورىنا قامالدى, سوتالدى تەرگەۋ جۇرگىزىلىپ جاتىر. تەرگەۋ بارىسىندا كۇدىكتى جابىرلەنۋشىنى باقىلاپ, كەيىن ايەلدىڭ ايىرباستاۋ پۋنكتىندە اقشا اۋىستىرعانىن كورگەنى انىقتالعان. سونداي-اق, 31 جاستاعى ەر ادامنىڭ بۇرىن سوتتالعانى بەلگىلى بولدى.