دجۋنيادان 25 جۇلدەمەن ورالدى

ەرلەر اراسىندا ءتورت بالۋانىمىز في­نالعا شىعىپ, سولاردىڭ ۇشەۋى باس جۇل­دەنى ولجالادى. 58 كيلو سالماقتا اتىراۋلىق اي­دىنباي قايىرگەلدى قارسىلاس شاق كەلتىر­مەدى. وسى جارىس بارىسىندا ول وزبەكستاندىق دوس­­تون رۋزيەۆ, كورەيالىق شين جاەنگ جانە قىر­­عىزستاندىق نۇرعازى جانبوسىنوۆتى جە­ڭىپ, كوماندا قورجىنىنا العاشقى التىندى سالدى.

ايدىنباي باستاعان جەڭىستى جولدى ەسەن­تاي يماحانوۆ جالعاستىردى. بۇل با­لۋان جايىندا ۇزاق اڭگىمەلەۋگە بولادى. كونە­كوزدەر ەسەنتايدىڭ ارعى اتاسى ءابدۋالي مەن اتاسى پارمان دا كەزىندە اباي وڭىرىنە اتى شىققان بالۋاندار بولعان دەسەدى. ولاردىڭ «قۇرمەتتى سپورت قايراتكەرى» دەگەن اتاقتارى بار. ءوزىنىڭ اكەسى دە تالاي دۇرمەكتە وزا شاۋىپ, سپورت شەبەرىنىڭ كۇمىس بەلگىسىن كەۋدەسىنە تاقتى. بۇل كۇندەرى ءبىرجان يماحانوۆ سامبو كۇرەسىنەن قازاقستان ۇلتتىق قۇراماسىنىڭ باس باپكەرى. ارينە, وسىنداي بالۋاندار اۋلە­تىنەن شىققان جاس ورەننىڭ وسال بولۋعا حاقىسى جوق. ونى ەسەنتايدىڭ ءوزى دە بالا كەزىنەن ساناسىنا ءسىڭىرىپ ءوستى. 2016-2021 جىل­دارى جاسوسپىرىمدەر مەن جاستار اراسىندا اتوي سالعان يماحانوۆ ازيا چەمپيونى اتا­نىپ, الەم بىرىنشىلىگىندە بىرنەشە رەت جۇل­دەگەرلەر ساناتىنا قوسىلدى. ياكۋتياداعى «ازيا بالالارى» تۋرنيرىندە توپ جاردى. ەرەسەكتەر اراسىندا ەلىشىلىك جارىستاردا قار­سىلاس شىداتپاي, بىلتىر گرەكيانىڭ سالو­نيكي قالاسىندا ۇيىمداستىرىلعان الەم چەمپيوناتىندا قولا مەدالدى موينىنا ءىلدى.

ليۆاندا ەسەنتاي يماحانوۆ 64 كيلو سال­ماق دارەجەسىندە سىنعا ءتۇستى. تۇساۋكەسەر كەزدەسۋىندە ول بىلتىرعى ازيا چەمپيونى, تۇرىك­مەنستاندىق مۇحاممەد كوسسەكوۆتى قا­پى قالدىردى. جارتىلاي فينالدا سيريا­لىق ومران اجەنانىڭ اياعىن كوكتەن كەلتىر­دى. اقتىق سايىستا الەم كۋبوگى جولىن­داعى جارىستاردا سان مارتە جۇلدە العان وزبەك­ستان­دىق حوميدجون مۋمينوۆتىڭ ابدەن سىلىك­پەسىن شىعارىپ, جەڭىس تۇعىرىنىڭ ەڭ بيىك ساتىسىنا كوتەرىلدى.

ءۇشىنشى التىندى 71 كيلو سالماقتا كۇش سىناسقان ارنۇر قۋاتاي يەلەندى. بولات قوجاح­مەتوۆ پەن بەرىك جەتپىسباەۆتاي بىلىك­تى باپكەرلەردەن ءتالىم-تاربيە العان جەتىسۋ وبلىسىنىڭ تۋماسى بيىل كوكتەمدە سەمەيدە وت­كەن ەل چەمپيوناتىنىڭ فينالىندا الەم جانە ازيا چەمپيونى, حالىقارالىق دارە­جەدەگى سپورت شەبەرى نۇربول سەرىكوۆتى سان سوقتىرعاندا, كەيبىر ماماندار ونىڭ بۇل جەڭىسىن كەزدەيسوقتىققا بالاعان ەدى. بىراق مۇلدە ولاي ەمەستىگىن ارنۇر جەر­ورتا تەڭىزى جاعالاۋىندا تولىعىمەن دالەل­دەدى. باستاپقىدا يراكتىق حۋسسەين جا­سيم مەن ليۆاندىق جوي حاداتتىڭ تاس-تال­قانىن شىعارعان قانداسىمىز شەشۋشى تۇس­تا وزبەكستاننىڭ ورەنى, الەم جانە ازيا چەم­پيو­نى شاحريور ماماتكۋلوۆتان ايلاسىن اسىر­دى.

التىن تۇعىرعا كوتەرىلۋگە ەلامان قويشى­بەكوۆتىڭ (88 كيلو) دە جاقسى مۇمكىندىگى بولدى. ەكى بىردەي قارسىلاسىن ەش قينالماي ۇتقان ول فينالدا وزبەك سامبوشىسى يحتيەر ەشمۋرودوۆقا ەسە جىبەردى. ال ايبەك زەكەنوۆ (98 كيلو) پەن تەمىرلان كولباي (+98 كيلو) قولا مەدالدى قاناعات تۇتتى.

– بىلتىر تاشكەنتتە وتكەن ازيا چەمپيو­ناتىندا قازاقستاننىڭ ەرلەر قۇراما كومان­داسى مۇشەلەرى اراسىنان تەك تەمىرلان كول­باي عانا التىن العان ەدى. بۇل جاعداي ءبىزدى قاتتى قىنجىلتتى. ەلگە ورالعان سوڭ بارلىق ماسەلەنى وي ەلەگىنەن وتكىزىپ, اقىل تارازىسىنا سالدىق. كەمشىلىكتەردى تۇزەتۋ ءۇشىن كوپ ەڭبەكتەندىك. ناتيجەسى جامان بولعان جوق. ارادا بىرەر اي وتكەندە الەم چەمپيوناتىندا ەكى التىن الساق, بۇگىن, مىنە, قۇرلىقتىڭ باستى دوداسىن ءۇش التىنمەن قورىتىندىلادىق. بىراق بۇل كورسەتكىشكە توقمەيىلسۋگە بولمايدى. ويتكەنى ءبىز وسى جارىستىڭ جالپى ەسەبىندە ءبىرىنشى ورىن الۋدى كوزدەدىك. الايدا وزبەكتەر الدىمىزدى وراپ كەتتى. ولاردان وزۋ ءۇشىن كوماندامىزعا ءبىر قولا مەدال عانا جەتپەي قالدى, – دەيدى قازاقستان قۇراماسىنىڭ باس باپكەرى ءبىرجان يماحانوۆ.

ايەلدەر اراسىندا وتكەن جارىستا 3 التىن مەن 4 كۇمىستى ولجالاعان وتانداس­تارى­­مىز كوماندالىق ەسەپتە كوش باستادى. ال­تىن تۇعىردان قول بۇلعاعان بۇرىم­دى­لار اراسىنان 72 كيلو سالماقتا كۇرەس­كەن ءدىلداش قۇرىشباەۆانى بولە-جارا اتا­ساق, ەش ايىبى جوق دەپ ويلايمىز. تالاي بايراقتى باسەكەدە ابىرويىمىزدى اسقاق­تاتقان باقىت قوقىسبەكوۆتىڭ شاكىرتى بۇل جا­رىستا دا تەڭدەسسىز دەپ تانىلىپ, ءوزىنىڭ ازيا چەمپيوناتتارىندا جەڭىپ العان باس جۇل­دەلەرىنىڭ سانىن جەتىگە جەتكىزدى. سونى­مەن قاتار د.قۇرىشباەۆانىڭ ازيا ويىن­دارىنىڭ جەڭىمپازى جانە التى دۇركىن الەم چەمپيوناتىنىڭ جۇلدەگەرى (3 كۇمىس+3 قولا) دەگەن اتاقتارى تاعى بار.

ءدىلداشتان بولەك, مارگاريتا باجاەۆا (50 كيلو) مەن ازمان اماەۆا (80 كيلو) التىن­نان القا تاقتى. فينالدا مارگاريتا تۇرىكمەنستاندىق دينارا يبادوللاەۆانى ۇتسا, ازمان وزبەكستاندىق گۇلميرا يسماتوۆادان باسىم ءتۇستى. ال گۇلدانا المۇحانبەتوۆا (54 كيلو), مارجان بيزاق (54 كيلو), اجار سالىقوۆا (65 كيلو) جانە ارايلىم ابەنوۆا (+80 كيلو) كۇمىس مەدالدى ەنشىلەدى.

جاۋىنگەرلىك سامبودان بەس جۇلدە بۇيىر­دى. فينالدا وزبەكتەردىڭ وسال تۇسىن تابا الماعان ادىلبەك سەيسەنوۆ (64 كيلو) پەن اسەت انارباەۆ (71 كيلو) جانە قىرعىزدارعا جول بەرگەن اسىلبەك سمايىلوۆ (79 كيلو) پەن ءمادي رايحان (98 كيلو) ەكىنشى ورىن السا, ايبەك سامەتاەۆ (88 كيلو) ءۇشىنشى ساتىعا جايعاستى. جارتىلاي فينالدا ايبەك وزبەكستاندىق سام­بوشىدان ايلاسىن اسىرا المادى. سونىڭ سال­دارىنان جالپىكوماندالىق سايىستى جىگىت­تەرىمىز قالىڭ توپتىڭ اراسىندا قالىپ قويدى.

ەسەسىنە بۇرىمدىلارىمىز ەرلەدى. جاۋىن­گەرلىك سامبودان ايەلدەر اراسىندا العاش رەت ۇيىمداستىرىلعان جارىستا قازاق ەلىنىڭ قىزدارى ايدى اسپانعا ءبىر-اق شىعارىپ, سارى قۇرلىقتىڭ تەڭدەسسىز كومانداسى دەپ تانىلدى. وسى جارىسقا قاتىسقان جەتى سپورت­شىمىزدىڭ بارلىعى دا ەلگە ولجالى ورالدى. اتاپ ايتساق, ايانا ساتقىناليەۆا (54 كيلو), ريزا سۇلەيمەنوۆا (72 كيلو) جانە انار سەيتىموۆا (+80 كيلو) الدىنا جان سالماسا, يناس اشىربەك (50 كيلو), جانەل نابيەۆا (59 كيلو), ءمولدىر اشىربەكوۆا (65 كيلو) جانە اسەل بورانباەۆا (80 كيلو) كۇمىسپەن كۇپتەلدى.

ەستەرىڭىزگە سالا كەتەيىك, بىلتىر وزبەك­ستاننىڭ باس شاھارى – تاشكەنتتە وتكەن ازيا بىرىنشىلىگىن قازاقستان قۇراماسى 6 التىن, 8 كۇمىس جانە 10 قولا مەدالمەن قورىتىندىلاعان ەدى. بارلىعى – 24 جۇلدە. ەندى بىرەر اپتاعا سوزىلعان ۇزىلىستەن كەيىن ەلىمىز­دىڭ ەڭ ۇزدىك سامبوشىلارى بيىلعى قارا­شادا قىرعىزستاننىڭ استاناسى – بىشكەك­تە جالاۋى جەلبىرەيتىن الەم چەمپيوناتىنا ءوز دايارلىقتارىن باستايدى.

جالپىكوماندالىق ەسەپ

ورىن

كوماندا

التىن

كۇمىس

قولا

بارلىعى

1.

وزبەكستان

12

4

8

24

2.

قازاقستان

9

13

3

25

3.

قىرعىزستان

4

4

5

13

4.

تۇرىكمەنستان

2

5

13

20

5.

فيليپپين

1

0

1

2

6.

وڭتۇستىك كورەيا

0

1

3

4

7.

يراك

0

0

4

4

8.

ليۆان

0

0

3

3

9.

يران

0

0

2

2

10.

جاڭا زەلانديا

0

0

1

1