قازاقستاننىڭ نيدەرلاندىداعى ەلشىسى اسقار جۇماعاليەۆ كورولدىك يندۋستريالىق كلۋب مۇشەلەرىن ينۆەستيتسيالاۋ ءۇشىن قىزىقتى سەكتورلارمەن, سونداي-اق مەملەكەتتىڭ ودان ارعى دامۋ باعىتى جونىندەگى جوسپارلارىمەن تانىستىردى, دەپ حابارلايدى Egemen.kz.
ديپلومات قازاقستان بيزنەس ءۇشىن باسەكەگە قابىلەتتى ورتا قۇرۋعا ەرەكشە نازار اۋداراتىنىن ايتتى. جاھاندىق باسەكەگە قابىلەتتىلىك رەيتينگىسىن مىسالعا كەلتىردى. ايتا كەتسەك, وندا قازاقستان 35-ءشى ورىنعا يە بولدى.
«دۇنيەجۇزىلىك بانكتىڭ سوڭعى ەسەبىنە قاراعاندا, قازاقستان بيزنەس جۇرگىزۋ بويىنشا 190 ەلدىڭ ىشىندە 25-ءشى ورىندا. مەن بۇرىن ايتىپ وتكەن قارجىلىق جانە ەكونوميكالىق تۇراقتىلىقتان باسقا, ەل ءتۇرلى سالالاردا جان-جاقتى مەملەكەتتىك قولداۋ ۇسىنادى. ءبىز كورپوراتيۆتى تابىس سالىعىنان, جەر سالىعىنان, م ۇلىك سالىعىنان بوساتۋ جانە فيسكالدىق ەمەس ىنتالاندىرۋ: جەر ۋچاسكەسى مەن ينفراقۇرىلىم سياقتى سالىقتىق جەڭىلدىكتەردى قامتيتىن ينۆەستيتسيالىق جوبالارعا قولداۋ كورسەتەمىز», دەدى اسقار جۇماعاليەۆ.
ديپلومات ينفراقۇرىلىم مەن ينۆەستيتسيالىق پرەفەرەنتسيالاردىڭ كەڭ سپەكترىن ۇسىناتىن بۇكىل قازاقستان بويىنشا ورنالاسقان 13 ارنايى ەكونوميكالىق ايماق پەن 36 ونەركاسىپتىك ايماق تۋرالى توقتالا كەتتى.
ونىڭ ايتۋىنشا, قازاقستاندا ەۋرازيالىق ەكونوميكالىق وداق ەلدەرىن, قىتاي مەن كاسپي باسسەينىن قوسا العاندا, ميللياردتان استام تۇتىنۋشىلاردىڭ نارىققا تىكەلەي قولجەتىمدىلىگى بار. سونداي-اق ەلدە كولىك ينفراقۇرىلىمى جاقسى دامىعان.
«نيدەرلاند قازاقستانداعى ءبىرىنشى ءنومىرلى شەتەلدىك ينۆەستور دەپ ويلايمىن. پاتشالىق ءبىزدىڭ ەلگە 105 ميلليارد دوللاردان استام ينۆەستيتسيا سالدى», دەپ تۇيىندەدى ول.
كورولدىك كلۋب مۇشەلەرى پرەفەرەنتسيالاردان باسقا, كادر ماسەلەلەرى, اعىلشىن ءتىلىن مەڭگەرۋ دەڭگەيى, قازاقستاننىڭ كليماتتىق ەرەكشەلىكتەرى جانە ەلدە جۇرگىزىلىپ جاتقان رەفورمالار تۋرالى الاڭدادى.
سونىمەن قاتار اسقار جۇماعاليەۆ جۋىردا ەلىمىزدە وتكەن رەفەرەندۋم, ونى وتكىزۋ ناتيجەلەرى مەن كونستيتۋتسياعا ەنگىزىلەتىن تۇزەتۋلەرگە اكەپ سوقتىراتىن وزگەرىستەر تۋرالى دا حاباردار ەتتى.