قارجى پيراميداسىنىڭ جارناماسى ءۇشىن قىلمىستىق جاۋاپكەرشىلىك ەنگىزىلەدى

«قر كەيبىر زاڭنامالىق اكتىلەرىنە قارجى نارىعى مەن قارجى ۇيىمدارىن مەملەكەتتىك رەتتەۋدى, باقىلاۋ مەن قاداعالاۋدى كۇشەيتۋ جانە قارجىلىق (ينۆەستيتسيالىق) پيراميدالاردىڭ قىزمەتىنە قارسى ءىس-قيمىل ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» جانە «قر اكىمشىلىك قۇقىق بۇزۋشىلىق تۋرالى كودەكسىنە قارجىلىق (ينۆەستيتسيالىق) پيراميدالاردىڭ قىزمەتىنە قارسى ءىس-قيمىل ماسەلەلەرى بويىنشا تولىقتىرۋ ەنگىزۋ تۋرالى» زاڭ جوبالارىن قر پارلامەنتى ءماجىلىسىنىڭ دەپۋتاتى يۋري لي تانىستىردى.

«قاراۋعا ۇسىنىلعان زاڭ جوبالارىنىڭ نەگىزگى ماقساتى – قولدانىستاعى زاڭناماداعى قۇقىقتىق ولقىلىقتاردى جويۋ جانە قارجىلىق (ينۆەستيتسيالىق) پيراميدالاردى قۇرۋ جانە جارنامالاۋ ءۇشىن جاۋاپكەرشىلىكتى قاتاڭداتۋ ارقىلى الاياقتىق قارجى پيراميدالارىنىڭ كەڭىنەن تارالۋىنا دەپۋتاتتاردىڭ جەدەل دەن قويۋى بولىپ وتىر», دەدى يۋ. لي.

دەپۋتات اتالعان زاڭ جوبالارىنىڭ قانداي وزگەرىستەر ۇسىناتىنىن ءتۇسىندىردى:

قارجى پيراميدالارىن قۇرۋ جانە باسقارۋ ءۇشىن سانكتسيالاردىڭ جوعارعى شەگىن ارتتىرۋ; قارجى (ينۆەستيتسيالىق) پيراميدالارىن جارنامالاعانى ءۇشىن قىلمىستىق جاۋاپكەرشىلىكتى بەلگىلەۋ; سوتقا دەيىنگى تەرگەپ-تەكسەرۋدى باستاعان ىشكى ىستەر ورگاندارىنا نەمەسە ەكونوميكالىق تەرگەۋ قىزمەتىنە قارجىلىق (ينۆەستيتسيالىق) پيراميدالاردى جارنامالاۋ تۋرالى قىلمىستىق ىستەر بويىنشا تەرگەۋ جاساۋىن ايقىنداۋ; قىلمىستىق ءىس-ارەكەتتەردى اكىمشىلىك قۇقىقبۇزۋشىلىقتاردان اجىراتۋ; سونداي-اق جەكە جانە زاڭدى تۇلعالاردىڭ اقشاسى مەن وزگە دە مۇلكىن وسىنداي قىزمەتتى جۇزەگە اسىرۋعا قۇقىعى جوق تۇلعالاردىڭ پايداسىنا تارتۋعا قاتىستى قىزمەتتى جارنامالاۋعا تىيىم سالۋ.

وسىلايشا, تۇزەتۋلەر قىلمىستىق كودەكسكە, قىلمىستىق ءىس جۇرگىزۋ كودەكسىنە, اكىمشىلىك قۇقىقبۇزۋشىلىقتار تۋرالى كودەكسكە جانە «جارناما تۋرالى» زاڭعا قاتىستى بولادى.

«باستاماشىلىق جاسالعان تۇزەتۋلەر ازاماتتاردىڭ م ۇلىكتىك جانە م ۇلىكتىك ەمەس قۇقىقتارى مەن اكتيۆتەرىن قورعاۋ دەڭگەيىن ەداۋىر ارتتىرۋعا, قارجى (ينۆەستيتسيالىق) پيراميدالارىنىڭ قىزمەتىن ەسكەرتۋگە, قارجى پيراميدالارىن قۇرۋ مەن ولاردى جارنامالاۋ كەزىندەگى قۇقىقبۇزۋشىلاردىڭ ءىس-ارەكەتىن نەعۇرلىم ناقتى سارالاۋعا مۇمكىندىك بەرەتىن جيناقى, ناقتى تۇزەتۋلەر بولىپ سانالادى. جوعارىدا باياندالعاندى ەسكەرە وتىرىپ, قارالىپ وتىرعان زاڭ جوبالارىن ءبىرىنشى وقىلىمدا قولداۋدى سۇرايمىن», دەدى يۋري لي.