ەندى ياندەكس, Uber ءتارىزدى ونلاين-پلاتفورما ارقىلى جۇمىس ىستەيتىندەر الەۋمەتتىك قامسىزداندىرىلادى. بۇل تۋرالى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ايتتى, دەپ حابارلايدى Egemen.kz.
«ساراپتامالىق مالىمەتتەرگە جۇگىنسەك, قازاقستاندا 500 مىڭعا جۋىق ادام پلاتفورمالىق جۇمىسپەن قامتىلعان. ياعني, ازاماتتار ياندەكس, Uber, Wolt جانە Glovo سياقتى ءتۇرلى ونلاين-پلاتفورمالار ارقىلى جۇمىس ىستەيدى. مۇنداي رەجيم تۇرعىندارعا ىڭعايلى ەكەنى ءسوزسىز. الايدا ونىڭ باستى كەمشىلىگى – جۇمىسپەن قامتىلعاندار ءۇشىن الەۋمەتتىك كەپىلدىكتىڭ جوقتىعى. ءبىر سوزبەن ايتقاندا, ونداي ازامات جۇمىسسىز قالسا نەمەسە بالالى بولۋىنا بايلانىستى جۇمىسىن توقتاتسا, مەملەكەتتىك الەۋمەتتىك ساقتاندىرۋ قورىنان قاجەتتى الەۋمەتتىك تولەم الا المايدى», دەپ ءتۇسىندىردى ول.
ءمينيستردىڭ سوزىنە سەنسەك, وسى جىلدىڭ سوڭىنا قاراي زاڭعا قاجەتتى وزگەرىستەر ەنگىزىلىپ, بۇل ماسەلە ءتيىستى شەشىمىن تابادى.
سالتانات كەنجەباي