Qagan ەتنوفيۋجن توبىنىڭ ونەرىن تاماشالاماي جاتىپ-اق ەرەكشە اسەردە بولارىڭىز انىق. ونەرپازداردىڭ كيىمى, ءجۇرىس-تۇرىسى تاريح قويناۋىنا سۇڭگىتىپ, رۋحىڭدى اسقاقتاتا تۇسەدى. جاقىندا اتالعان ۇجىم موڭعوليادا وتكەن حالىقارالىق Asia folk – 2022 بايقاۋىنىڭ كۇمىس جۇلدەگەرى اتاندى.
توپتىڭ مۋزىكالىق جەتەكشىسى ءارى مۇشەسى, كۇيشىلەر وداعى پاۆلودار وبلىستىق فيليالىنىڭ توراعاسى, كۇيشى, كومپوزيتور ەراسىل ادىلبەكوۆ بايقاۋدىڭ ونلاين وتكەنىن ايتتى.
– بايقاۋ ەكى جىلدا ءبىر رەت وتەدى. بۇل – بەدەلى زور بايقاۋ. ونى قاتىسۋشىلاردان-اق بىلۋگە بولادى. مىسالى, باس جۇلدەگەر اتانعان «حان حۋر» توبى گولليۆۋدتىڭ فيلمدەرىنە ساۋندترەك جازىپ, Universal Pictures-پەن جۇمىس ىستەپ جۇرگەن اتاقتى توپ. باسقا دا مىقتى كوماندالار بولدى. جالپى, بايقاۋدا 40-قا جۋىق مۋزىكالىق توپ باق سىنادى, – دەيدى ە.ادىلبەكوۆ.
بايقاۋ ەكى تۋردان تۇرىپ, Qagan توبى ەكى تۋىندىنى شىرقاپتى. قوس تۋىندى دا ەراسىل ادىلبەكوۆتىڭ اۆتورلىق شىعارمالارى. «تۇران دالاسى» جانە «شاشۋ» اتتى تۋىندىلار ۇسىنىلعان.
توپتا 7 ادام بار. كوركەمدىك جەتەكشىسى, «مادەنيەت قايراتەرى», «التىنسارين» جانە «قر قۇرمەتتى ۇستازى» توسبەلگىلەرىنىڭ يەگەرى – رىسكۇل سابەكوۆا. ايتپاقشى, توپ مۇشەلەرى جۋىردا عانا الماتى قالاسىندا وتكەن جاسوسپىرىمدەر اراسىنداعى بەدەلدى «بوزتورعاي» حالىقارالىق بايقاۋىندا سىنعا ءتۇسىپ, دومبىراشىلار باعىتىندا ءادىلجان نۇرقاەۆ 2-ورىن, نۇربول قاراتاي 3-ورىن يەگەرلەرى اتانعان.
پاۆلودار وبلىسى