الماتىدا ءىرى ساۋدا ورتالىعى ورتەندى

الەۋمەتتىك جەلىدە «Life town» ساۋدا ورتالىعىنا جاپسارلاس ورنالاسقان بۋرگەر جانە دونەر دايىندايتىن دۇڭگىرشەكتەن ءورت شىققانى تۋرالى حابار تارادى. جالىن ساۋدا ورتالىعىن دا شارپىعان.

الماتى قالالىق توتەنشە جاعدايلار دەپارتامەنتىنىڭ مالىمەتىنشە, ءورت 6 مامىر كۇنى تاڭعى 5:45 شاماسىندا شىققان.

«دونەر ساتاتىن دۇڭگىرشەكتەن شىققان ءورت ساۋدا ورتالىعىنىڭ ەكىنشى قاباتىنا ۇلاسقان. قىزىل جالىن 150 شارشى مەتر جەردى شارپىدى. العاشقى بولىمشەلەر شاقىرۋ ورنىنا ساعات 05:50-دە (5 مينۋتتا) كەلدى. ءورت 06:16-دا اۋىزدىقتالىپ, 06:30-دا تولىق ءسوندىرىلدى. قازا بولعاندار مەن زارداپ شەككەندەر جوق. ءورتتىڭ شىعۋ سەبەبى انىقتالىپ جاتىر», دەپ حابارلادى دەپارتامەنتەن.

وقيعا ورنىنا 13 بىرلىك تەحنيكا مەن جەكە قۇرامنان 50 ادام جۇمىلدىرىلدى.