قارقارالى اۋدانىنداعى اقتەرەك دەيتىن اۋىلدا تاريحى تىلسىم دەۋگە بولاتىن ءبىر قاباتتى اعاش ءۇي بار. نەگە دەسەڭىز, عيماراتتىڭ قاي جىلى سالىنعانىن, كىم سالدىرتقانىن وسى ۋاقىتقا دەيىن تاپ باسىپ ەشكىم ايتا الماي كەلەدى.
ال ەندى, وسى ۇيگە قاتىستى تاريحتىڭ ءبىر پاراسى ۇلت ۇستازى احمەت بايتۇرسىن ۇلى ەسىمىمەن تىعىز بايلانىستى. اتاقتى عالىم اقجان ءماشانيدىڭ جازۋى بويىنشا, بۇل اياداي عانا عيماراتتا 1904-1909 جىلدار ارالىعىندا احاڭ بالا وقىتقان ەكەن.
قارقارالى اۋداندىق مادەنيەت جانە تىلدەردى دامىتۋ ءبولىمىنىڭ مامانى دانا اليەۆا بۇل ءۇيدىڭ ابدەن ەسكىرگەنىن ايتادى.
– ءبىر كەزدەرى بۇل ءۇي مەكتەپ بولعان, ال وتكەن عاسىردىڭ 90-جىلدارى عيماراتتا بايلانىس بولىمشەسى مەن تاۋ-كەن بايىتۋ كومبيناتىنىڭ شارۋاشىلىق كەڭسەسى ورنالاستى. سودان كەيىن ءبىراز ۋاقىت بوس تۇردى, – دەيدى ول.
اعاش ءۇيدى قيراۋدان امان الىپ قالعان اۋىل اقساقالدارى ەكەن. عيمارات 2002 جىلى «جىبەك جولى» باعدارلاماسىنىڭ اياسىندا قالپىنا كەلتىرىلىپتى جانە ونىڭ سىرتى شارباقپەن قورشالىپتى. ال 2008 جىلى وبلىستىق مادەنيەت باسقارماسى جوندەۋ جۇمىستارىن جۇرگىزگەن. قازىرگى ۋاقىتتا اۋىلدىڭ كىتاپحاناسى مەن شاعىن ورتالىق ورنالاسقان بۇل ءۇي قازاقستان رەسپۋبليكاسىنىڭ تاريحي-مادەني ەسكەرتكىشتەر تىزىمىنە ەنىپ, مەملەكەتتىڭ قورعاۋىنا الىنعان كورىنەدى.
قارقارالى اۋدانىنىڭ اكىمى ەرلان قۇسايىننىڭ ايتۋىنشا, 2021 جىلى تاريحي-مادەني مۇرانى ساقتاۋ ينسپەكتسياسى 5,3 ملن تەڭگەگە عيماراتتىڭ سىرتقى-ىشكى ارلەۋ جۇمىستارىن جۇرگىزىپ, جىلۋ جۇيەسىن اۋىستىرعان ەكەن.
– قازىرگى ۋاقىتتا مادەنيەت جانە تىلدەردى دامىتۋ ءبولىمى ءوزىنىڭ بالانسىنا الىپ, 1,5 ملن تەڭگە قاراجاتقا عيماراتتىڭ ءبىر بولمەسىن ارنايى جابدىقتاپ جاتىر. جۇمىس بارىسىندا تاقىرىپتىق ستەندتەر ازىرلەنەدى. احمەت بايتۇرسىن ۇلىنا قاتىستى قۇجاتتىق جادىگەرلەر قويىلاتىن سورەلەر ورناتىلدى, – دەيدى اۋدان اكىمى.
بۇدان بولەك احاڭنىڭ ءدارىس بەرگەن كەزەڭىن سۋرەتتەيتىن ۇلكەن پانو دايىندالۋ ۇستىندە ەكەن. كىتاپحانانىڭ كىتاپ سورەلەرى دە جاڭارتىلعان.
قاراعاندى وبلىسى,
قارقارالى اۋدانى,
اقتەرەك اۋىلى