مەملەكەت باسشىسى قاسىم-جومارت توقاەۆ بيىلعى جىلدى «بالالار جىلى» دەپ جاريالاپ, بالالاردىڭ بولاشاعىن قالىپتاستىرۋ ماقساتىندا ناقتى مىندەت جۇكتەگەن بولاتىن. پرەزيدەنت تاپسىرماسىنا وراي, تاراز قالاسىندا «باقىتتى بولاشاق» وقۋشىلار سارايى پايدالانۋعا بەرىلدى. جاڭا نىساننىڭ سالتاناتتى اشىلۋ راسىمىنە جينالعان كوپشىلىك اۋەلى عيماراتتى ارالاپ كوردى. سونداي-اق وقۋشىلاردىڭ عىلىمي-زەرتتەۋ جانە شىعارماشىلىق جۇمىستارى بويىنشا ۇيىمداستىرىلعان كورمەنى تاماشالادى.
جيىنعا جامبىل وبلىسىنىڭ اكىمى نۇرجان نۇرجىگىتوۆ قاتىسىپ, بۇگىندە وبلىستا كوركەمونەر, مۋزىكالىق, عىلىمي-تەحنيكالىق, اسكەري-پاتريوتتىق باعىتتاعى قوسىمشا ءبىلىم بەرەتىن 75-تەن استام مەكتەپتەن تىس ۇيىم اشىلعانىن اتاپ ءوتتى.
«مەملەكەت باسشىسى 2022 جىلدى «بالالار جىلى» دەپ جاريالادى. وسكەلەڭ ۇرپاقتىڭ بالالىق شاعىنىڭ قامسىز, باقىتتى ءوتۋىن قامتاماسىز ەتۋ – ءبىزدىڭ ورتاق مىندەتىمىز. بۇگىنگى تاڭدا جامبىل وبلىسىنىڭ بالاباقشالارىندا 57 مىڭنان استام بالا تاربيەلەنۋدە. 244 مىڭ بالا مەكتەپتەردە, 23 مىڭ ستۋدەنت كوللەدجدەردە ءبىلىم الۋدا. ءبىلىم بەرۋ ساپاسىن ارتتىرۋ ماسەلەلەرىمەن قاتار, بالالاردىڭ بوس ۋاقىتىن ۇيىمداستىرۋ دا نازاردان تىس قالعان ەمەس. جاڭا وقۋشىلار سارايىندا جاس ۇرپاقتىڭ شىعارماشىلىق جانە زياتكەرلىك الەۋەتىن دامىتۋ ءۇشىن بارلىق جاعداي جاسالعان. ەل پرەزيدەنتى اتاپ وتكەندەي, بالالاردىڭ ءال-اۋقاتى – مەملەكەتىمىزدىڭ تابىستى بولاشاعىنىڭ سەنىمدى كەپىلى», دەدى نۇرجان نۇرجىگىتوۆ.
ال ەلىمىزدىڭ ءبىلىم جانە عىلىم ءمينيسترىنىڭ كەڭەسشىسى, بالالارعا قوسىمشا ءبىلىم بەرۋدىڭ رەسپۋبليكالىق وقۋ-ادىستەمەلىك ورتالىعىنىڭ ديرەكتورى رايسا شەر جاڭا وقۋشىلار سارايى بالالار ءۇشىن دە, پەداگوگتەر ءۇشىن دە يننوۆاتسيالىق الاڭعا اينالاتىنىن جەتكىزدى.
«قازىرگى ۋاقىتتا ەلىمىزدە بارلىعى 1 523 مەكتەپتەن تىس ۇيىم جۇمىس ىستەيدى. بۇل وتە جاقسى كورسەتكىش. وقۋشىلاردىڭ كاسىبي دايارلىققا دەيىنگى تىڭعىلىقتى دايىندىعىن ۇيىمداستىرۋ ءۇشىن كۇش-جىگەرىمىزدى بىرىكتىرۋ – اسا ماڭىزدى. جاستار بولاشاق ماماندىعىن سەنىمدى تۇردە تاڭداپ, كرەاتيۆتى, بەلسەندى ازاماتتىق ۇستانىم يەسى بولۋى ءتيىس», دەدى رايسا شەر.
سونداي-اق قازاقستاننىڭ ەڭبەك سىڭىرگەن قايراتكەرى ءجاميلا سەركەباەۆا, رەسەيدىڭ چەليابى قالاسىنان كەلگەن «كۆانتوريۋم» تەحنوپاركىنىڭ باسشىسى يۆان شميدت, «R4 Technology & Research Center» ءبىلىم بەرۋ جانە زەرتتەۋلەر ورتالىعىنىڭ ديرەكتورى ايدىن ءتۇسىپجانوۆ, Lakeview school Almaty ديرەكتورى گۇلنار قارامەندينوۆا, تاراز سەرۆيس جانە تەحنولوگيا كوللەدجىنىڭ تۇلەگى باعلان جاقسىبەكوۆ جانە جامبىل پوليتەحنيكالىق جوعارى كوللەدجىنىڭ 3-كۋرس ستۋدەنتى ازامات نامەلبەك ءسوز سويلەپ, پەداگوگتەر مەن وقۋشىلارعا تابىس تىلەدى.
وقۋشىلار سارايىنىڭ اشىلۋىنا وراي مەكتەپتەن تىس ۇيىمداردىڭ بەيىنى بويىنشا پەداگوگتەر مەن ماماندارعا ارنالعان «قوسىمشا ءبىلىم بەرۋدەگى يننوۆاتسيالار: يدەيادان باستاپ ىسكە اسىرۋعا دەيىن» تاقىرىبىندا رەسپۋبليكالىق قۇرىلىمدىق ديالوگى ءوتتى. قاتىسۋشىلار پىكىر الماسىپ, وي ءبولىستى. جالپى, «باقىتتى بولاشاق» وقۋشىلار سارايىندا روبوتتەحنيكا, 3D-مودەلدەۋ, اۆيامودەلدەۋ, كەمە مودەلدەۋ, قازاق جانە قازىرگى زامانعى ساندىك-قولدانبالى ونەر, لاندشافتىق ديزاين كابينەتتەرى مەن ساۋلەت جانە ديزاين مەكتەبى, كوۆوركينگ ورتالىعى بار. سونىمەن قاتار مۇندا بارلىعى 81 ۇيىرمە جۇمىس ىستەيتىن بولادى.
جامبىل وبلىسى