باتىس قازاقستان وبلىسىندا كونستيتۋتسيالىق رەفەرەندۋمعا داۋىس بەرۋ ءۇشىن 505 سايلاۋ بولىمشەسى قىزمەت كورسەتتى. وڭىردە بارلىعى 443 مىڭداي سايلاۋشى بولسا,ەلوردا ۋاقىتىمەن 16.00.-دە بارلىق سايلاۋشىنىڭ 57,70 پايىزى داۋىس بەرىپ ۇلگەردى, دەپ جازادى Egemen.kz.
بۇل باتىسقازاقستاندىقتاردىڭ باسىم كوپشىلىگى ەل ەرتەڭى ءۇشىن جاسالاتىن ساياسي وزگەرىستەرگە بەي-جاي قارامايدى دەگەن ءسوز.
ورال قالاسىنىڭ وزىندە تاڭنان بەرى 123 سايلاۋ بولىمشەسى داۋىس بەرۋشىلەرگە قىزمەت كورسەتتى. مۇنىڭ 104-ءى اشىق جۇمىس ىستەگەن بولىمشەلەر بولسا, 19-ى – جابىق مەكەمەلەرگە ارنالعان ورىندار.
اسا جاۋاپتى ناۋقانعا بارلىق سايلاۋ بولىمشەلەرى تياناقتى دايىندالعانى كورىندى. كوپتەگەن سايلاۋ ۋچاسكەلەرىندە ەڭ ءبىرىنشى كەلگەن سايلاۋشىعا, ەڭ ەگدە سايلاۋشىعا, ەڭ جاس داۋىس بەرۋشىگە شاعىن سىيلىقتار تابىستالعان.
مىسالى, ورال قالاسىنىڭ اباي داڭعىلى بويىندا ورنالاسقان №463 سايلاۋ بولىمشەسىندە ۋچاسكەگە ەلدىڭ الدى بولىپ كەلگەن ليۋبوۆ شاحوتكينا, 80 جاستاعى ەڭ ەگدە داۋىس بەرۋشى ءمارۋا نۇرعاليەۆا, 18-گە بيىل عانا تولعان, داۋىس بەرۋگە العاش قاتىسقان ميلانا باقتيارقىزى ءتۇرلى سىي-سياپاتقا يە بولدى. ءبىر قىزىعى, شاعىن دا بولسا شاتتىق سىيلايتىن وسىناۋ سياپاتتى ليۋبوۆ فيليپقىزى جىل سايىن الادى ەكەن.
جاڭارعان رەفەرەندۋم ءۇشىن داۋىس بەرۋگە قازاقستان مۇسىلماندارى ءدىني باسقارماسىنىڭ باتىس قازاقستان وبلىسىنداعى وكىل يمامى باقىتجان قۇرالباي ۇلى ەلەڭ-الاڭنان وتباسىمەن بىرگە بارىپتى. جاقىندا عانا قادىر مىرزا ءالي اقىننىڭ ەسىمىن يەلەنگەن №47 ورتا مەكتەپتە ورنالاسقان №400 سايلاۋ بولىمشەسىندە قۇرالبايلار وتباسى ءارى جاڭا قازاقستان ءۇشىن تاڭداۋ جاساپ, ءارى سۋ جاڭا «Tefal» شاينەگىن سىيلىققا الىپ قايتتى. ايتا كەتەيىك, ءدال وسى وزگەرىستەرگە يمام باقىتجان قۇرالباي ۇلىنىڭ جەكە ۇلەسى دە بار: قاڭتارداعى دۇربەلەڭدە ورالدىڭ ورتالىق الاڭىندا شيرىققان توپتىڭ الدىنا شىعىپ, سالماقتى دا ساليقالى سوزىمەن كوپشىلىكتى سابىرعا شاقىرعان بولاتىن. وزگە وڭىرلەردەگىدەي ءىستىڭ ناسىرعا شاپپاۋىنا, حالىق نارازىلىعى قاقتىعىس-قانتوگىسسىز اياقتالۋىنا باقىتجان يمامنىڭ سول ءسوزىنىڭ دە اسەرى بولعانى انىق.
سايلاۋ كۇنى ورال قالاسىنىڭ حالىق كوپ جۇرەتىن كوشەلەرى مەن الاڭدارىندا كونتسەرتتەر قويىلىپ, كوڭىلدى ءان-دۋمان ءوتىپ جاتتى. وسىنىڭ ءبارى ساياسي ناۋقانعا مەرەكەلىك سيپات بەرىپ تۇردى. وبلىس ورتالىعىنداعى №463 سايلاۋ ۋچاستوگىندە بايقاۋشى بولعان افيزا سەمعاليەۆا دا داۋىس بەرۋشىلەردىڭ بەلسەندىلىگىن, تاڭداۋ جاساۋعا كوتەرىڭكى كوڭىل كۇيمەن كەلىپ جاتقانىن ايتتى.
«بۇگىن ەلىمىز ءۇشىن تاريحي كۇن. وزگەرىستەرگە تولى كەزەڭگە اياق باستىق. ورال قالاسىنداعى №45 مەكتەپ ۋچاسكەسىنە داۋىس بەرۋگە بارعان كەزدە بايقاعانىم – حالىقتىڭ بەلسەندىلىگى كۇشتى, سونداي ءبىر شىنايى, وزىندىك ىنتامەن داۋىس بەرىپ جاتىر. اسىعىستىق, ماجبۇرلىك بايقالمايدى. ۋچاسكەدەگى تازالىق, مادەنيەتتىلىك, ءبىر سوزبەن ايتقاندا ۇيىمشىلدىق كورىنىپ تۇر. ادام قوعامنان تىس ءومىر سۇرە المايدى. قالاي بولعاندا دا, ءبىزدىڭ ارقايسىمىز قوعامنىڭ ءبىر بولشەگىمىز. سوندىقتان ارقايسىمىزدىڭ بۇگىنگى بەرگەن داۋسىمىز ماڭىزدى. وسىنداي تاريحي كەزەڭ ءبىزدىڭ تاعدىرىمىزعا بۇيىرعان ەكەن. سول ءۇشىن دە باقىتتىمىز. مەن بۇگىن ۇلكەن وزگەرىستەرگە داۋىس بەردىم!» دەيدى «ورلەۋ» باۇو» اق فيليالى باتىس قازاقستان وبلىسى بويىنشا پەداگوگيكالىق قىزمەتكەرلەردىڭ بىلىكتىلىگىن ارتتىرۋ ينستيتۋتى ديرەكتورى سوفيا ىزمۇحامبەتوۆا.
بۇل كۇنى باتىس قازاقستان وبلىسىنىڭ اكىمى عالي ەسقاليەۆ تە ەل كونستيتۋتسياسىنا وزگەرىستەر مەن تولىقتىرۋلار ەنگىزۋ جونىندەگى رەسپۋبليكالىق رەفەرەندۋمدا داۋىس بەرۋگە قاتىستى. ال احمەت بايتۇرسىنوۆ اتىنداعى №10 ورتا مەكتەپتە ورنالاسقان №421 سايلاۋ ۋچاستوگىندە العاش داۋىس بەرگەن نۇراسىل قازىبەك ۇلى كامەلەت جاسىنا تولعانىنا جارتى جىل بولسا دا, بۇگىن ءوزىن تولىققاندى ازامات رەتىندە سەزىنگەنىن ايتادى. ءبىز كەزدەسكەن سايلاۋشىلاردىڭ ءبارى دە جاڭا قازاقستاننىڭ كەلەشەگى ءۇشىن ءوز ەركىمەن تاڭداۋ جاساۋعا كەلگەنىن ءبىلدىرىپ جاتتى.