اقتاۋ گارنيزونىنداعى اسكەري بولىمدەرىنىڭ اسكەري قىزمەتشىلەرى جالپىۇلتتىق رەفەرەندۋمدا ءوز تاڭداۋىن جاساپ, داۋىس بەردى, دەپ حابارلايدى Egemen.kz قوعامدىق كوممۋنيكاتسيا ورتالىعىنا سىلتەمە جاساپ.
تەڭىز جاياۋ اسكەري بريگاداسىندا ورنالاسقان № 61 سايلاۋ ۋچاسكەسى اشىلۋى مەملەكەتتىك ءانۇران ايتۋمەن ەسىگىن اشتى. ساپ تۇزەگەن ساربازدار اسكەري ءبولىمنىڭ مادەني دەمالىس ورتالىعىنداعى سايلاۋ ۋچاسكەسىندە ەلىمىزدىڭ جارقىن بولاشاعى ءۇشىن داۋىس بەردى.
قاتىسۋشىلاردىڭ باسىم بولىگى العاش رەت داۋىس بەرگەن. سولاردىڭ ءبىرى, 6 اي بۇرىن اسكەرگە الماتى وبلىسىنان شاقىرىلعان نۇرداۋلەت نۇرلىبەكوۆ.
«بۇگىن ەرەكشە كۇن. سەبەبى قازاقستان رەسپۋبليكاسىنىڭ ازاماتى رەتىندە العاش رەت داۋىس بەرۋ قۇقىعىمدى پايدالانىپ تۇرمىن», دەدى قاتارداعى جاۋىنگەر نۇرداۋلەت نۇرلىبەكوۆ.
اسكەري بولىمدە رەفەرەندۋم وتكىزۋگە بارلىق جاعداي جاسالعان. سايلاۋ جاشىكتەرى مەن ونعا جۋىق داۋىس بەرۋگە ارنالعان كابينالار بار.
«بۇگىن ەلىمىز ءۇشىن تاريحي ماڭىزدى كۇن, وسى كۇنى ءار سارباز وتانىمىزدىڭ بولاشاعى ءۇشىن ءوزىمىزدىڭ تاڭداۋىمىزدى جاسادىق», دەدى قاتارداعى جاۋىنگەر ارقات راحىش.