بويىن كۇدىك پەن ۇرەي بيلەگەن ادام بىرەۋدىڭ باسىنا تۇسكەن جاعدايىن ءتۇسىنىپ, ولارعا قيىندىقتان قۇتىلۋعا كومەكتەسە الا ما؟ جوق, ارينە. تۋىنداعان وسىنداي ماسەلەنى شەشۋ ءۇشىن كىسىگە الدىمەن قۋات كەرەك, جاقسى كوڭىل كۇي قاجەت. ونداي ادامنىڭ ىشكى جان دۇنيەسىندە الدەبىر كۇيزەلىستىڭ بولماعانى ابزال.
مۇنداي جاعدايدىڭ پايدا بولۋىنا ادامنىڭ مەنمەندىگى مەن وركوكىرەكتىگى سەبەپ بولادى. مۇندايدا ول ءبارىن تۇسىنە تۇرا, ەشتەڭە ىستەي المايتىنىن, ىستەگىسى دە كەلمەيتىنىن سىلتاۋراتىپ, جۇمىستان جالتارۋدىڭ امالىن ىزدەپ, قورقىنىشتىڭ قانداي دا ءبىر ءتۇرىن ويلاپ تابۋعا تىرىسىپ, ونى ءوز ىڭعايىنا قاراي تۇسىندىرگىسى كەلەدى.
«قورىققانعا قوس كورىنەدى», دەگەندەي قورىققانىنان ادام ەشتەڭەنى تۇسىنبەسى انىق. ول ەموتسياعا بەرىلەدى. بۇل ادامدى رەسۋرسسىز كۇيگە دۋشار ەتەتىندىكتەن, ءسىز بۇل كۇيدەن شىعا المايتىنداي جاعدايعا تۇسەسىز. ويتكەنى جانىڭىزدى جەگىدەي جەپ وتىرعان ىشتەگى جاڭاعى ەگوڭىز سىزگە جۇمىس ىستەتپەك تۇگىل, ول تۋرالى دۇرىس ويلاۋعا دا جول بەرمەيدى. بۇعان ادامنىڭ ءوزى كىنالى, ويتكەنى ول ءدال وسىنداي دۇنيەنى ءوز قولىمەن جانە ءوزى ءۇشىن جاساپ وتىر. ونىڭ ۇستىنە, ول وسى «جايلىلىق پەن قولايلىلىق ايماعىنان» شىعۋعا ىڭعاي تانىتپايدى. ماقتانشاقتىق پەن تاكاپپارلىق ادامعا مۇنى ىستەۋگە مۇمكىندىك بەرمەيتىندىگى ايتپاسا دا تۇسىنىكتى. مۇنىڭ بارلىعىن تەك «كوز قورقاق, قول باتىر», دەگەن ۇستانىممەن ءومىر سۇرەتىندەر عانا ۇعادى.
وسىعان بايلانىستى ومىرگە دەگەن سەنىم ادام ءۇشىن ۇلكەن موتيۆاتسيا بولادى.
قورقىنىش پەن كۇمانعا بوي الدىرعان ادام باسقاعا بىردەڭە بەرۋ دەگەندى مۇلدەم بىلمەيدى. ونداي ادامنىڭ بويىنداعى قۋات كىمگە جەتسىن. ولاي بولسا, ادامنىڭ ترانسفورماتسيالانۋى ونىڭ وعان قانشالىقتى دارەجەدە دايىن ەكەندىگىنە بايلانىستى. ەگەر ول بۇل ماسەلەنى باسىمەن قابىلدار بولسا, وندا پروبلەما تۋىندايدى. ويتكەنى ادامنىڭ ميى ءوزىنىڭ نە ىستەي الاتىنىن, نەنى ىستەي المايتىنىن تۇسىنە بەرمەيدى. ادام بويىنداعى تۇتاستىقتىڭ بولماۋى ىشكى دۇنيەنى وسىلاي بولشەكتەۋگە اكەلىپ, ول وسى ساتتەن باستاپ بويىنداعى كۇشىن جوعالتا باستايدى. ال ەگەر ادامنىڭ ىشكى بىرلىگى بولعان كەزدە ول ەشكىمدى ءبولىپ-جارىپ, اجىراتپاس ەدى. اينالاسىنا ادامشا كوز سالار ەدى. بارلىق ادامدارعا ادام رەتىندە بىردەي قاراپ, ولاردى الالاماس ەدى. وسىلاي بولعاندا عانا ادامنىڭ ومىرلىك جولىنىڭ تەرەڭ ءمانىن ىشكى جۇيەلىلىك پەن تاڭىرلىك نەگىزىندە تۇسىنۋگە بولادى. دەمەك, ءىشى ءبۇتىن ادام عانا جاقسى ادام بولا الادى. ەندەشە, وسىلاردىڭ بارلىعىنا توتەپ بەرۋ ءۇشىن ۇلكەن سەنىم قاجەت. ويتكەنى سەنىمسىز يمان بولمايدى, ال سەنىم جوعالعان ءومىر – سەرگەلدەڭ ءومىر. مەنمەندىكتەن ارىلۋ ءۇشىن كەز كەلگەن ءىستى شۇكىرشىلىك, سۇيىسپەنشىلىكپەن قابىلداپ, سەنىم جانە قۋانىشپەن جاساۋ كەرەك. سوندا عانا تازا بولاسىڭ. وسىنداي كۇي كەشۋ ارقىلى اسپان مەن جەردىڭ ەنەرگياسىن بايلانىستىرىپ, باسقالارعا قۋات بەرۋگە بولادى. سوندىقتان سانادا ساندىراق ەمەس, ايقىندىق بولۋى شارت. ادامنىڭ ينتۋيتسياسى – ونىڭ ىشكى داۋىسى. ول شىن جۇرەكتەن شىعادى. جۇرەگى تازا ادام قياناتقا بارمايدى. بۇل اداسپاۋدىڭ جانە دۇرىس جولدى تابۋدىڭ كەپىلى بولماق. ساتتىلىك انىقتىق بولعان كەزدە كەلەدى. بۇل جەردە باستاعى جاتتاندى ماتىندەردىڭ «مىقتىلىعى» ەمەس, شىعارماشىلىق پەن كورەگەندىك كەرەك. وعان بەكەردەن-بەكەر بويىڭداعى قۋاتىڭدى جۇمساپ, ىسىراپ قىلۋدىڭ قاجەتى شامالى. كەز كەلگەن ىسكە قىزىعۋشىلىقپەن قاراعان ءجون. بۇل جاقسى ءىس بولعاندىقتان سەن ونى مىندەتسىنبەي, جەكە باسىڭدى دارىپتەپ, ۇپاي ىزدەپ, كەز كەلگەن ىستەن پايدا دامەتپەي كىرىسسەڭ وعان شارشامايسىڭ. جاراتۋشى بارلىعىنا بىردەي مەيىرىمدى بولعاندىقتان, ول اق تىلەكپەن ادامنىڭ بويىنا مەيىرىمدىلىك, جاناشىرلىق جانە ماحاببات سىيلايدى. دەمەك, تىلەگى اقتىڭ – ءىسى حاق. ولاي بولسا, ادامنىڭ ارەكەتتەرى سىياقى الۋ ماقساتىنداعى مىندەتتىلىكپەن ەمەس, كەرىسىنشە, ەكولوگيالىق تازا نيەتپەن ىسكە اسىرىلۋى قاجەت. ويتكەنى ءاربىر نيەت كۇش-قۋاتتى قاجەت ەتەدى. كەز كەلگەن وي – مىندەتتى تۇردە ونەتىن ءدان. اركىم ارمانىن ورىنداۋ ءۇشىن سيقىرشىنى كۇتپەي-اق, ءوز ءومىرىنىڭ قوجاسى بولعانى ابزال.
ادامنىڭ باستى قۇندىلىقتارى ونىڭ بولمىسىن ايقىندايتىن ورتالىق بولعاندىقتان, ول ونىڭ كىم ەكەنىن كورسەتەدى جانە دۇرىس شەشىم قابىلداۋعا كومەكتەسەدى. سوندىقتان قۇندىلىقتاردى ناقتى انىقتاۋ ارقىلى ادام ءوزىنىڭ جەكە ەتيكاسىنا ادال بولۋعا مۇمكىندىك الادى. سونداي-اق وعان تۇلعا رەتىندە وسۋگە سەپتىگىن تيگىزەتىن ماقساتتاردى دۇرىسىراق قويۋعا جاعداي تۋادى. ماقساتتى انىقتاۋ – بۇل قاناعاتتانارلىق ءومىر ءسۇرۋ ءۇشىن بىرەگەي داعدىلار مەن قاجەتتىلىكتەردى پايدالانۋ جولىن تابۋ دەگەن ءسوز. ماقساتتارمەن ولارعا قول جەتكىزۋ جوسپارلارى ازاماتقا ءارى قاراي نە ىستەۋ كەرەكتىگىنىڭ دۇرىس باعىتىن تابۋعا مۇمكىندىك بەرەدى. ول سونىمەن قاتار ادامعا ماڭىزدى دەگەن نارسەلەرگە نازار اۋدارىپ, ماقساتتارعا جەتۋگە جاعداي جاسايدى.