ءبىلىم جانە عىلىم ءمينيسترى اسحات ايماعامبەتوۆ الەۋمەتتىك جەلىدەگى پاراقشاسىندا سوڭعى 10 جىلدا جەكەمەنشىك بالاباقشالار سانى كۇرت ارتقانىن جازدى, دەپ حابارلايدى Egemen.kz.
«10 جىلدان استام ۋاقىت بۇرىن بالاباقشالار سانىنىڭ جىلدام ءوسۋىن ىنتالاندىرۋ ءۇشىن ليتسەنزيالاۋدان, كەيىن مەملەكەتتىك باقىلاۋدان, مونيتورينگتەن جانە ولاردىڭ قىزمەتىن رەتتەۋدەن باس تارتۋ تۋرالى شەشىم قابىلداندى. ول قانداي ناتيجە بەردى؟ جەكەمەنشىك بالاباقشالار سانى كۇرت ارتىپ, 3 جاستان 6 جاسقا دەيىنگى بالالار بىردەن 99%-عا دەيىن قامتىلدى. بۇل - جاقسى ناتيجە. الايدا بالاباقشالار سانىن كوبەيتۋگە مۇمكىندىك بولسا دا, ساپا ماسەلەسى باياعىداي وزەكتى بولىپ قالا بەرەدى. بالاباقشالاردىڭ جارتىسى تەحنيكالىق جانە سانيتارلىق تالاپتارعا ساي كەلمەيتىن عيماراتتاردا, بىلىكتى ماماندارسىز جانە قاۋىپتى جاعدايلاردا اشىلعان. مۇنداي فاكتىلەر جەتكىلىكتى», دەي كەلە مينيستر 2 جىل بۇرىن ليتسەنزيالاۋ مەن مەملەكەتتىك باقىلاۋدى قايتارۋعا ارەكەت جاسالعانىن ايتتى.
الايدا سول كەزدە كاسىپكەرلەر پالاتاسىنىڭ, بالاباقشالار قاۋىمداستىعىنىڭ جانە بىرقاتار مەملەكەتتىك ورگاننىڭ ۇستانىمى بۇل نورمانى زاڭعا ەنگىزۋگە مۇمكىندىك بەرمەگەن.
ء«بىز بۇل باعىتتا جۇمىستى توقتاتپادىق. 2021 جىلدىڭ سوڭىندا مەملەكەتتىك اتتەستاتتاۋ جۇيەسىن ەنگىزە الدىق. اتتەستاتسيا ناتيجەسى كوڭىلدەن شىقپادى. تەكسەرىستەن وتكەن بالاباقشالاردىڭ 80%-ى مەملەكەتتىك اتتەستاتسيادان وتە المادى. اڭگىمە بالاباقشاداعى بۇلدىرشىندەرگە قولايلى جاعداي جاسالماۋى, وقۋ-تاربيە جۇمىستارىنىڭ مەملەكەتتىك ءبىلىم بەرۋ ستاندارتىنا, قاۋىپسىزدىك تەحنيكاسى, ءورت جانە سانيتارلىق نورمالاردىڭ تالاپتارعا سايكەس كەلمەۋى, تاربيەشىلەردىڭ قول كوتەرۋى جانە باسقا دا كەلەڭسىز فاكتىلەر تۋرالى بولىپ وتىر», دەپ جازدى مينيستر.