پرەمەر-مينيستر ءاليحان سمايىلوۆ ەلدەگى ءتۋريزمنىڭ دامۋىن تەجەپ وتىرعان ماسەلەلەردى اتادى, دەپ حابارلايدى Egemen.kz.
«كەيبىر دەمالاتىن جەرلەرگە اۋە جانە تەمىرجول تاسىمالىنىڭ بولماۋى, دەمالىس ماۋسىمىندا جول قاتىناسىنىڭ قيىندىعى – ءتۋريزمنىڭ دامۋىن تەجەپ وتىرعان ماسەلەلەردىڭ ءبىرى. وسىعان بايلانىستى, يندۋستريا مينيسترلىگى ينتەرمودالدىق جولاۋشىلار تاسىمالىن دامىتۋ بويىنشا ۇسىنىستار ازىرلەپ, اۆيا, اۆتو جانە تەمىرجول كولىكتەرىنىڭ ىڭعايلى باعىتتارىن قامتاماسىز ەتۋى قاجەت», دەپ اتاپ ءوتتى ءا. سمايىلوۆ ۇكىمەتتىڭ بۇگىنگى وتىرىسىندا.
سونىمەن بىرگە تۋريستىك سالا ماماندارىن كاسىبي دايارلاۋعا جۇيەلى ءتاسىل كەرەك ەكەنىن باسا ايتتى.
«قولدانىستاعى باعدارلامالار تۋريزم سالاسىنىڭ ناقتى قاجەتتىلىكتەرىنە ساي كەلمەيدى. سوندىقتان وسى باعىتتاعى جۇمىستى, ونىڭ ىشىندە تۇركىستان قالاسىنداعى حالىقارالىق تۋريزم جانە مەيماندوستىق ۋنيۆەرسيتەتىنىڭ بازاسىندا كۇشەيتۋ قاجەت.
جالپى تۋريزم سالاسىنىڭ دامۋىندا وڭ ديناميكا بار, وسى ورايدا كەي ماسەلەلەرگە كوڭىل ءبولۋ كەرەك. ءوڭىر اكىمدىكتەرى مۇددەلى مەملەكەتتىك ورگاندارمەن بىرلەسىپ, تۋريستىك وبەكتىلەردى ينجەنەرلىك ينفراقۇرىلىممەن ۋاقىتىلى قامتاماسىز ەتسىن», دەدى ءا. سمايىلوۆ.
ودان بولەك, مادەنيەت مينيسترلىگىنە ءوڭىر اكىمدىكتەرىمەن بىرلەسىپ, ءبىرىنشى كەزەكتە تۋريستەردىڭ قاۋىپسىزدىگى مەن قىزمەت ساپاسىن ارتتىرۋدى كوزدەيتىن تۋريستىك ونىمدەر ۇسىنۋ تاپسىرىلدى.
«ەڭ باستىسى, تۋريستەرگە قىزمەت كورسەتۋ ساپاسىنا نازار اۋدارۋ كەرەك جانە بيوتۋالەتتەر ماسەلەسى شەشىلۋى ءتيىس. بۇل تۋريستەر سانىنىڭ وسۋىنە ىقپال ەتەدى. وتاندىق جانە شەتەلدىك تۋريستەر كوبىنە ءدال وسى سەرۆيستىڭ ناشارلىعىن ايتىپ, شاعىمدانادى. سوندىقتان بۇل ماسەلەنى مۇقيات پىسىقتاۋ قاجەت. ۇشىنشىدەن, مادەنيەت مينيسترلىگى ەكولوگيا مينيسترلىگىمەن جانە سولتۇستىك قازاقستان وبلىسىنىڭ اكىمدىگىمەن بىرگە يمانتاۋ-شالقار كۋرورتتىق ايماعىن دامىتۋ جوسپارىن بەكىتىپ, ونداعى شارالاردى ىسكە اسىرۋعا كىرىسسىن. وزدەرىڭىز بىلەتىندەي, بۇل تۋرالى مەملەكەت باسشىسىنىڭ ءتيىستى تاپسىرماسى بار. ول ناقتى ورىندالۋى ءتيىس», دەدى ءا. سمايىلوۆ.
ايانا توعانبەك