پرەزيدەنت ۇلتتىق عىلىم اكادەمياسى عىلىمي وي-تۇجىرىم ورتالىعىنا جانە ساراپتاما جاسايتىن بەدەلدى مەكەمەگە اينالۋعا ءتيىس ەكەنىن ايتتى. مەملەكەت باسشىسى بۇل ويىن اكادەميانىڭ 75 جىلدىعىنا ارنالعان سالتاناتتى سەسسيا بارىسىندا مالىمدەدى, دەپ حابارلايدى Egemen.kz اقورداعا سىلتەمە جاساپ.
«قارا شاڭىراقتىڭ ءرولىن ارتتىرۋ اسا ماڭىزدى. سوندىقتان, وعان مەملەكەتتىك مارتەبە بەرەمىز جانە بيۋدجەت ەسەبىنەن قارجىلاندىرامىز. ونىڭ قازىر اتقارىپ وتىرعان قىزمەتىنەن باسقا دا مىندەتتەرىن ناقتى بەلگىلەۋ قاجەت. اتاپ ايتقاندا, عىلىمي باسىمدىقتاردى ءدال وسى قۇرىلىم ايقىنداۋى كەرەك. ارناۋلى گرانتتار, ستيپەنديالار جانە سىيلىقتار تاعايىنداۋ قۇزىرەتى دە اكادەمياعا بەرىلگەنى ءجون», دەدى پرەزيدەنت.
وسى رەتتە مەملەكەت باسشىسى عىلىمعا ادالدىق ماسەلەسىنە باسا نازار اۋداردى.
«قازىر قوعامدا قۇر اتاق ءۇشىن عىلىمي دارەجە العىسى كەلەتىندەردىڭ بار ەكەنى جاسىرىن ەمەس. بۇل جاعىمسىز ۇردىسكە اينالىپ بارادى. ولار, شىن مانىندە, عىلىمي اتاققا يە بولعانىمەن, عىلىم جولىن جالعاستىرمايدى. سونىڭ كەسىرىنەن مەملەكەتتىڭ قانشاما قاراجاتى بوسقا كەتەدى. بۇعان ءبىرجولا توسقاۋىل قوياتىن كەز كەلدى. ءبىز عىلىمعا شىنايى بەرىلگەن ازاماتتاردى عانا قولداۋىمىز قاجەت», دەدى قاسىم-جومارت توقاەۆ.