ءوڭىر اكىمدىكتەرى جانىنداعى تاۋەلسىز بالا قۇقىقتارى جونىندەگى ۋاكىلدەردىڭ لاۋازىمدارىن ەنگىزۋدى تەزدەتۋ قاجەت. بۇل تۋرالى بۇگىن ۇكىمەت وتىرىسىندا پرەمەر-مينيستر ءاليحان سمايىلوۆ ايتتى, دەپ حابارلايدى Egemen.kz.
«وبلىس اكىمدىكتەرىنە الەۋمەتتىك جاعىنان از قامتىلعان ساناتتاعى بالالاردى ساۋىقتىرۋ شارالارىمەن, جازعى دەمالىسپەن جانە بوس ۋاقىتتارىن پايدالى وتكىزۋمەن بارىنشا قامتۋدى تاپسىرامىن. بارلىق اۋىلدىق ەلدى-مەكەندەردە سپورت الاڭدارىن, بالالاردى دامىتۋ ورتالىقتارىن جابدىقتاپ, ويىن-ساۋىق, مادەني ءىس-شارالار ۇيىمداستىرۋ قاجەت», دەدى ۇكىمەت باسشىسى.
ءاليحان سمايىلوۆ دەنساۋلىق ساقتاۋ مينيسترلىگىنە شالعايداعى ەلدى مەكەندەردە بالالاردىڭ دەنساۋلىق جاعدايىنا سكرينينگتىك جانە ستوماتولوگيالىق تەكسەرۋلەر جۇرگىزۋ ءۇشىن جىلجىمالى مەديتسينالىق پۋنكتتەردىڭ جۇمىس ىستەۋىنە قاتىستى شارالار قابىلداۋدى تاپسىردى.
«بالالار قۇقىقتارىنىڭ ساقتالۋىن قامتاماسىز ەتۋ ءۇشىن ءبىلىم مينيسترلىگى اكىمدىكتەرمەن بىرلەسىپ, ءوڭىر اكىمدىكتەرى جانىنداعى تاۋەلسىز بالا قۇقىقتارى جونىندەگى ۋاكىلدەردىڭ لاۋازىمدارىن ەنگىزۋدى تەزدەتسىن», دەدى پرەمەر-مينيستر.