بالالار قاتىساتىن كەز كەلگەن ءىس-شارانى ۇيىمداستىرۋدا ولاردىڭ قاۋىپسىزدىگىنە كەپىلدىك بەرلۋى ءتيىس. بۇل تۋرالى پرەمەر-مينيستر ءاليحان سمايىلوۆ ايتتى, دەپ حابارلايدى Egemen.kz.
«بالالاردىڭ ءبىلىم الىپ, جان-جاقتى دامۋىنا, دەمالىسى مەن مەديتسينالىق قىزمەت الۋىنا جاعداي جاساۋ – مەملەكەتتىڭ ماڭىزدى مىندەتى. ءبىز جۇزدەگەن مەكتەپ, بالا-باقشا مەن مادەني جانە سپورت نىساندارىن سالىپ جاتىرمىز. مۇنىڭ بارلىعى بالالاردىڭ تولىققاندى دامۋى ءۇشىن قاجەت. سونداي-اق بالالار جىلى اياسىندا بيىل كوپتەگەن كەشەندى ءىس-شارا جوسپارلانىپ وتىر. بۇگىن الماتىدا مەملەكەت باسشىسى بالالار جىلىنىڭ قۇرمەتىنە شىعارماشىلىق, زياتكەرلىك جانە سپورتتىق بايقاۋلاردىڭ جەڭىمپازدارى مەن لاۋرەاتتارى 30 مىڭ وقۋشىنىڭ قاتىسۋىمەن «الماتى بالاFEST» فەستيۆالىن اشادى. بارلىق وڭىردە بالالارعا ارنالعان مەرەكەلىك ءىس-شارالار باستالادى», دەدى ۇكىمەت باسشىسى.
ءاليحان سمايىلوۆ بالالار جىلىنىڭ بارلىق ءىس-شارالارى ناقتى ورىندالۋى تيىستىگىن باسا ايتتى.
«بالالاردى قورعاۋ كۇنى قاشان دا جازعى ساۋىقتىرۋ ناۋقانىنىڭ باستاماسى بولعان. ول ءۇشىن دەنساۋلىق ساقتاۋ مينيسترلىگى قولايلى جاز مەزگىلىن بارىنشا ءتيىمدى پايدالانىپ, كەشەندى شارالاردى قابىلداۋ كەرەك. بالالاردىڭ جازعى دەمالىسى مەن بوس ۋاقىتىن ءتيىمدى ۇيىمداستىرۋ كەزىندە كوپتەگەن ماڭىزدى جانە نەگىزگى جايتتاردى ەسكەرۋ قاجەت. ەڭ باستىسى – كوشەدە, سۋدا دەمالۋ كەزىندە, ءتۇرلى ەكسكۋرسيالاردا بالالارىمىزدىڭ قاۋىپسىزدىگىن قامتاماسىز ەتۋ قاجەت», دەدى ول.
پرەمەر-ءمينيستردىڭ اتاپ وتۋىنشە, بالالار قاتىساتىن كەز كەلگەن ءىس-شارانى ۇيىمداستىرۋدا ەڭ الدىمەن ولاردىڭ قاۋىپسىزدىگىنە كەپىلدىك بەرىلۋى ءتيىس.
«ىشكى ىستەر, ءبىلىم جانە دەنساۋلىق ساقتاۋ مينيسترلىكتەرى, ءوڭىر اكىمدەرى ءتيىستى قىزمەتتەردىڭ جۇمىسىن وسىعان جۇمىلدىرۋى كەرەك. سونىمەن بىرگە وقۋ ورىندارىن قاۋىپسىزدىك جۇيەسىمەن جاراقتاندىرۋ جانە جاڭعىرتۋ جۇمىستارىن جانداندىرۋ قاجەت», دەدى ءاليحان سمايىلوۆ.