قىتاي اقجارقىن تۇرلىبايدى قازاقستانعا قايتارۋدان باس تارتتى

«2020 جىلدىڭ 19 قازانىندا باس پروكۋراتۋراعا سوتتالعان اقجارقىن تۇرلىبايدىڭ قازاقستانعا اۋىسۋى تۋرالى جازباشا ءوتىنىش كەلىپ ءتۇستى. سول كۇنى قىتاي تاراپىنا ءتيىستى سۇرانىس جىبەرىلدى. قحر ادىلەت مينيسترلىگىنىڭ 03.03.2021 جىلعى جاۋابىنا سايكەس اقجارقىن تۇرلىبايدى جازاسىن ودان ءارى وتەۋ ءۇشىن قازاقستان رەسپۋبليكاسىنا بەرۋدەن ءومىر بويىنا سوتتالعاندىعىنا بايلانىستى باس تارتىلدى», دەدى باس پروكۋرورلار حالىقارالىق ىنتىماقتاستىق دەپارتامەنتىنىڭ باستىعى عالىمجان قويگەلديەۆ.

سونداي-اق پروكۋرور قازاقستاندىق تاراپ تۇرلىبايدى قازاقستانعا اۋىستىرۋعا ءۇمىتىن ۇزبەيتىنىن, ەگەر قىتاي سوتى سوتتالۋشىنىڭ جازاسىن قىسقارتىپ, جازانى وتەۋدىڭ ناقتى ۋاقىتىن تاعايىنداسا, ءبارى مۇمكىن ەكەنىن ايتتى.

«قىتايداعى قازاقستان ەلشىلىگى قولدانىستاعى زاڭعا سايكەس ا.تۇرلىبايدىڭ جازا مەرزىمىن قىسقارتۋ ۇكىمى زاڭدى كۇشىنە ەنگەن ساتتەن 2-3 جىل وتكەننەن كەيىن مۇمكىن بولاتىنىن ايتتى. بۇل ماسەلە تۇراقتى باقىلاۋدا. ا.تۇرلىبايعا قاتىستى جازا جەڭىلدەسە نە جازانىڭ ناقتى مەرزىمى ايتىلسا باس پروكۋراتۋرا ونى قازاقستانعا اۋىستىرۋ تۋرالى قايتادان سۇراۋ سالۋعا باستاماشىلىق جاسايدى», دەدى ع.قويگەلديەۆ.

باس پروكۋراتۋرا قازاقستان رەسپۋبليكاسىنىڭ سوتتالعان ازاماتتارىن ەلگە قايتارۋ 2015 جىلدىڭ 30 قىركۇيەگىندە بەيجىڭدە قول قويىلعان ەكىجاقتى كەلىسىممەن رەتتەلەدى. مۇنداي كەلىسىم بارلىق ەلدە جوق.

ەسكە سالا كەتەيىك, قازاقستاندىق اقجارقىن تۇرلىباي 2014 جىلى ناۋرىزدا گۋانجوۋ اۋەجايىندا ۇستالعان ەدى. كەيىن ونى ءومىر بويىنا باس بوستاندىعىنان ايىرعان بولاتىن. ءبىراز ۋاقىتتان كەيىن سوت ۇكىمى جويىلىپ, ءىس قايتا قاراۋعا جولدانعان.