قاسىم-جومارت توقاەۆ نازارباەۆ زياتكەرلىك مەكتەبىنىڭ وقۋشىلارىمەن اۋقىمدى دومبىرا ساباعىن وتكىزگەن قازاقستان رەسپۋبليكاسىنىڭ ەڭبەك سىڭىرگەن مادەنيەت قايراتكەرى ايتجان توقتاعانعا العىس حات جولدادى, دەپ حابارلايدى Egemen.kz اقورداعا سىلتەمە جاساپ.
– حالىق مۇراسىن ناسيحاتتاۋ جانە ۇيرەتۋ ىسىنە بەل شەشە كىرىسىپ, كوپشىلىككە بەلگىسىز تۋىندىلاردى نوتاعا ءتۇسىرىپ, ولاردىڭ اۆتورلارىن انىقتاۋعا اتسالىسىپ كەلەسىز. سان جىلعى زەرتتەۋ جۇمىستارىڭىزدىڭ ناتيجەسى ىسپەتتى ەڭبەكتەرىڭىز قازىرگى تاڭدا مۋزىكا مەكتەپتەرى مەن وقۋ ورىندارىندا وقۋلىق رەتىندە قولدانىلىپ ءجۇر. ال نازارباەۆ زياتكەرلىك مەكتەبىنىڭ مىڭنان استام وقۋشىسى قاتىسقان دومبىرا ساباعىڭىز وسكەلەڭ ۇرپاقتىڭ ۇلتتىق كۇي ونەرىنە قىزىعۋشىلىعىن ارتتىرىپ, ءبىلىمىن تەرەڭدەتكەن ماڭىزدى شارالاردىڭ ءبىرى بولدى. ۇلتتىق ونەردى ۇلىقتاۋعا باعىتتالعان بۇل مادەني ءىس-شارا گيننەس رەكوردتار كىتابىنا ەنەدى دەپ سەنەمىن, – دەلىنگەن العىس حاتتا.