پرەمەر-مينيستر ءاليحان سمايىلوۆ شەتەلدىك ينۆەستورلار كەڭەسىنىڭ ارالىق وتىرىسىن وتكىزدى, وندا تۇراقتى جۇمىس توپتارىنىڭ قىزمەتى تۋرالى ەسەپتەر, كەڭەستىڭ 34-پلەنارلىق وتىرىسىنا دايىندىق بارىسى, سونداي-اق ينۆەستورلاردىڭ قازاقستاندا بيزنەس جۇرگىزۋىنە قاتىستى وزەكتى ماسەلەلەر قارالدى, دەپ جازادى Egemen.kz.
وتىرىستى اشقان قر پرەمەر-ءمينيسترى قازىرگى تاڭدا ۇكىمەت شەتەلدىك ينۆەستيتسيالاردىڭ اعىنىن ساقتاۋ جانە ۇلعايتۋ بويىنشا كەشەندى شارالار قابىلداپ جاتقانىن اتاپ ءوتتى.
وتكەن جىلى قر-دا $3,6 ملرد-قا 44 جاڭا ينۆەستيتسيالىق جوبا ىسكە قوسىلدى. وعان قوسا جالپى قۇنى $55 ملرد بولاتىن 700-دەن استام قولدانىستاعى جانە الەۋەتتى جوبالاردىڭ پۋلى پىسىقتالدى.
قازاقستاننىڭ ينۆەستيتسيالىق تارتىمدىلىعىن ودان ءارى ارتتىرۋ ءۇشىن ۇكىمەت ينۆەستيتسيالىق ساياساتتىڭ 2026 جىلعا دەيىنگى جاڭا تۇجىرىمداماسىن ازىرلەدى.
«جاھاندىق ترەندتەردى ەسكەرە وتىرىپ, جوعارى وڭدەۋ ونەركاسىبىنە, اگروونەركاسىپ كەشەنىنە, فارماتسەۆتيكاعا, كولىك-لوگيستيكا ينفراقۇرىلىمىنا جانە باسقا سالالارعا ينۆەستيتسيالار تارتۋ جۇمىسى جالعاسادى», دەپ اتاپ ءوتتى ءاليحان سمايىلوۆ.
سونداي-اق ءاليحان سمايىلوۆ مەملەكەت باسشىسى قاسىم-جومارت توقاەۆتىڭ «جاڭا قازاقستان» تۇجىرىمداماسى اياسىندا دەموكراتيالىق جانە الەۋمەتتىك-ەكونوميكالىق قايتا قۇرۋ جولىنا بەت العان قازاقستان بۇگىندە جاڭا تاريح بەتتەرىن اشىپ جاتقانىن اتاپ ءوتتى.
ول قوعام ءومىرىنىڭ بارلىق سالالارىن قامتيدى جانە زاڭ شىعارۋشى بيلىك ينستيتۋتىن نىعايتۋعا, ادال باسەكەلەستىكتى كۇشەيتۋ, جەكە مەنشىكتى قورعاۋ, ەكونوميكانى دەمونوپوليزاتسيالاۋ ارقىلى ەكونوميكانى ساپالى تۇردە جاڭعىرتۋعا باعىتتالعان.
«اتالعان شارالاردىڭ بارلىعى شەتەلدىك ينۆەستورلارعا كوپتەگەن ەكونوميكالىق مۇمكىندىكتەر تۋعىزادى. وسى ورايدا قازاقستان – ەلىمىزگە ادال ەڭبەك ەتىپ, تابىس تابۋعا كەلگەندەردىڭ بارلىعى ءۇشىن سەنىمدى ينۆەستيتسيالىق سەرىكتەس بولىپ قالا بەرەتىنىن تاعى دا اتاپ وتكىم كەلەدى», دەدى ءاليحان سمايىلوۆ.
وتىرىستا پرەمەر-ءمينيستردىڭ ورىنباسارى – سىرتقى ىستەر ءمينيسترى مۇحتار تىلەۋبەردى, ۇلتتىق ەكونوميكا ءمينيسترى الىبەك قۋانتىروۆ, ەكولوگيا, گەولوگيا جانە تابيعي رەسۋرستار ءمينيسترى سەرىكقالي برەكەشەۆ, ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا, ەنەرگەتيكا ءمينيسترى بولات اقشولاقوۆ, «سامۇرىق-قازىنا» قورىنىڭ باسقارما توراعاسى الماسادام ساتقاليەۆ جانە ت. ب. بايانداما جاسادى.
شەتەلدىك ينۆەستورلار تاراپىنان «قازاقستاننىڭ شەتەلدىك ينۆەستورلار كەڭەسى» قاۋىمداستىعىنىڭ باسقارما توراعاسى, «EY» كومپانياسىنىڭ باسقارۋشى سەرىكتەسى ەرلان دوسىمبەكوۆ, قر-داعى «توتالەنەردجيس» باسشىسى الەم فريگا-نوي, «كناۋف» كومپانياسىنىڭ وكىلى ديميتري پروپپ, «KPMG» باسقارۋشى سەرىكتەسى ساكەن جۇماشەۆ, رەسەي مەن تمد-داعى «GE» پرەزيدەنتى بەلا فەرەنتسي, «فيليپ مورريس ينتەرنەشنل» باسقارۋشى ديرەكتورى حۋان ەسكوبار جانە ت. ب. ءسوز سويلەدى.
سونىمەن قاتار وتىرىس بارىسىندا وتكەن كەزەڭدە كەڭەستىڭ بارلىق جاۋاپتى مەملەكەتتىك ورگاندارى مەن ۇيىمدارى, شەتەلدىك كومپانيالارى كەڭەستىڭ 33-پلەنارلىق وتىرىسىنىڭ حاتتامالىق تاپسىرمالارىن ورىنداۋ بويىنشا ءتيىستى شارالاردى قابىلداعانى اتاپ ءوتىلدى.
بۇل رەتتە قورشاعان ورتانى جانە سۋ رەسۋرستارىن قورعاۋ, جاڭارتىلاتىن ەنەرگيا كوزدەرىنە كوشۋ جانە ەكونوميكانى دەكاربونيزاتسيالاۋ – كەلەشەكتە ماڭىزى زور ستراتەگيالىق ماقساتتارعا اينالادى, كەڭەستىڭ 34-پلەنارلىق وتىرىسى وسى ماسەلەلەرگە ارنالادى.
وتىرىستى قورىتىندىلاي كەلە, قر پرەمەر-ءمينيسترى كەڭەس اياسىندا اۋقىمدى جۇمىس جۇرگىزىلگەنىن اتاپ ءوتتى. ايتىلعان ۇسىنىستار ۇكىمەتتە ەگجەي-تەگجەيلى پىسىقتالادى.
«شەتەلدىك ينۆەستورلاردىڭ بارلىق ۇسىنىستارىن, سونداي-اق ولاردىڭ قازاقستان اۋماعىنداعى ينۆەستيتسيالىق قىزمەتىنە قاتىستى تۋىندايتىن ماسەلەلەردى تالقىلاۋعا دايىن ەكەنىمىزدى تاعى دا اتاپ كورسەتكىم كەلەدى», دەپ تۇيىندەدى ءاليحان سمايىلوۆ.