قوستاناي وبلىسىندا 5 ماۋسىم كۇنگى رەسپۋبليكالىق رەفەرەندۋمدا 717 سايلاۋ ۋچاسكەسى جۇمىس ىستەيتىن بولادى. بۇل ۋچاسكەلەردەگى داۋىس بەرۋ بارىسىن بەيپارتيالىق باقىلاۋ ورتالىعىنىڭ وكىلدەرى قاداعالاپ وتىرادى.
وڭىردە رەفەرەندۋمعا دايىندىق جۇرگىزۋ جانە ۇيىمداستىرۋ شارالارى وبلىستىق سايلاۋ كوميسسياسىنا جۇكتەلگەن. كوميسسيا وكىلدەرىنىڭ مالىمەتىنشە, رەفەرەندۋم كۇنى تۇرعىندار ەرىكتى تۇردە سايلاۋ ۋچاسكەلەرىنە كەلىپ, اتا زاڭعا وزگەرىستەر ەنگىزۋ نەمەسە ەنگىزبەۋ تۋرالى قالاۋلارىن جاسىرىن داۋىس بەرۋ ارقىلى بىلدىرە الادى.
ەكى اپتادان كەيىن وتەتىن ماڭىزدى ساياسي ناۋقانعا وبلىستىق پارتيالىق ەمەس باقىلاۋ ورتالىعىنىڭ ءبىر جارىم مىڭداي بايقاۋشىسى قاتىسادى. ياعني ءاربىر سايلاۋ ۋچاسكەسىندە وسى ورتالىقتىڭ ەكى وكىلى وتىراتىن بولادى. سونداي-اق رەفەرەندۋم كەزىندە وبلىستىڭ بارلىق اۋماعىندا ءموبيلدى باقىلاۋشىلار جۇمىس ىستەيدى.
«قوستاناي وبلىسىندا رەفەرەندۋمعا دايىندىق اياسىنداعى وقۋ-ۇيرەتۋ سەمينارلارىنىڭ ءبارى اياقتالدى. ءبىزدىڭ بايقاۋشىلارىمىز بۇعان دەيىن دە بىرنەشە ساياسي ناۋقانعا اتسالىسىپ, مول تاجىريبە جيناقتاعان. قازىر حالىقپەن كەزدەسىپ, بولاشاقتا كونستيتۋتسياعا ەنۋى مۇمكىن وزگەرىستەر مەن تولىقتىرۋلار توڭىرەگىندە ءتۇسىندىرۋ جۇمىستارىن جۇرگىزىپ جاتىرمىز. مۇنىڭ سىرتىندا بايقاۋشىلار بلوكنوتتارىن كوبەيتىپ, باسىپ شىعارۋ سياقتى تولىپ جاتقان ۇساق-تۇيەك جۇمىستارمەن اينالىسىپ جاتىر. ورتالىق بايقاۋشىلارى 5 ماۋسىم كۇنى وتەتىن رەفەرەندۋمدا وزدەرىنە جۇكتەلگەن مىندەتتى ويداعىداي اتقارىپ شىعاتىنىنا سەنەمىن», دەدى بەيپارتيالىق باقىلاۋ ورتالىعى وبلىستىق فيليالىنىڭ توراعاسى بولات قاليەۆ.
قوستاناي وبلىسى