كوشى-قون قىزمەتى قازاقستاندىق تولقۇجاتتا ءچيپتىڭ قانداي ماقساتتا قويىلعانىن ءتۇسىندىردى, دەپ حابارلايدى Egemen.kz.
قر ىشكى ىستەر مينيسترلىگىنىڭ وكىلى شۇعىلا تۇرلىبەك الەۋمەتتىك جەلىدە تاراعان ۆيدەوعا بايلانىستى تۇسىنىك بەردى. بەينەجازبادا پاسپورتتاعى ءچيپتىڭ ازاماتتاردىڭ ءجۇرىس-تۇرىسىن قاداعالاۋعا ارنالعانى ايتىلادى.
«ەلەكتروندىق تولقۇجات الەمنىڭ كوپتەگەن ەلدەرىندە ەنگىزىلگەن. قازاقستاندا تولقۇجاتتار مەن ميكروسحەماسى بار جەكە كۋالىكتەر 2009 جىلدان باستاپ شىعارىلادى. ونداعى چيپ ازامات تۋرالى جەكە دەرەكتەردى ساقتاۋعا ارنالعان جانە جەكە تۇلعانى انىقتاۋعا مۇمكىندىك بەرەدى. ءچيپى بار تولقۇجات قازاقستان ازاماتتارىنىڭ ەلەكتروندى جۇيەلەرى ارقىلى شەكارا بەكەتىنەن ءوتۋىن جانە پاسپورت-ۆيزالىق باقىلاۋدى جەڭىلدەتۋ ءۇشىن ەنگىزىلگەن», دەدى ءىىم وكىلى ارنايى ءباسپاسوز ءماسليحاتىندا.
ۆەدومستۆو وكىلى سونداي-اق تولقۇجاتتاعى چيپ ازامات شەكارادان وتكەن كەزدە عانا ارنايى قۇرىلعىنىڭ كومەگىمەن تەكسەرىلەتىنىن ايتتى.