ارىس اۋدانىنىڭ پوليتسيا قىزمەتكەرلەرى دالالى جەردە وسەتىن, ەمدىك قاسيەتى جوعارى دارىلىك كەۋرەك (فەرۋلا) ءشوبىنىڭ ءسولىن قازىپ, زاڭسىز ارەكەت ەتكەن 23 وزبەكستاندىق ازاماتتى انىقتادى, دەپ حابارلايدى Egemen.kz.
تۇركىستان وبلىستىق پوليتسيا دەپارتامەنتىنىڭ مالىمەتىنشە, ولار دالالى القاپقا شاتىر تىگىپ, كەۋرەك قازىپ جۇرگەن.
«23 ازامات اقبتك-ءنىڭ 517-بابىنىڭ 5-بولىگىمەن (شەتەلدiكتiڭ نەمەسە ازاماتتىعى جوق ادامنىڭ حالىقتىڭ كوشى-قون سالاسىنداعى زاڭناماسىن بۇزۋى) بويىنشا جاۋاپقا تارتىلىپ, ەل اۋماعىنان الاستاتىلدى. ال جۇمىس بەرۋشى قازاقستان ازاماتىنا 519-باپ (شەتەلدىك جۇمىس كۇشىن جانە ەڭبەكشى كوشىپ كەلۋشىلەردى ەل زاڭناماسىن بۇزا وتىرىپ تارتۋ) بويىنشا حاتتاما تولتىرىلىپ, ايىپپۇل سالىندى», دەپ حابارلادى ۆەدومستۆودان.