«قىمىزمۇرىندىق» – اتادان بالاعا ميراس بولىپ كەلە جاتقان يگى ءداستۇردىڭ ءبىرى. بۇل ەجەلدەن قالىپتاسقان جازعا قاراي بيە بايلاپ, العاشقى قىمىز ءىشۋ ءراسىمى. وعان اۋىل اقساقالدارى مەن وزگە دە سىيلى قوناقتار شاقىرىلادى. كوپشىلىككە ارناپ اق داستارقان جايىلىپ, باتا جاسالادى. داستۇرگە ساي, بيىل بۇل ءۇردىس اۋليەاتا وڭىرىندە ءوز جالعاسىن تاپتى. تالاس اۋدانىنىڭ «جۇرىندىساي» بالالار لاگەرىندە وبلىستىق «قىمىزمۇرىندىق-2022» ەتنو-فەستيۆالى ءوتتى. اتالعان ءىس-شاراعا جامبىل وبلىسىنىڭ اكىمى نۇرجان نۇرجىگىتوۆ قاتىستى. سونداي-اق ەتنو-فەستيۆالگە تاراز قالاسى مەن ءوڭىر اۋداندارىنان جۇزگە جۋىق ارداگەر شاقىرىلعان.
قارت قاراتاۋدىڭ بوكتەرىندە وتكەن يگى ءىس-شارا بارىسىندا كەلۋشىلەردى اق جاۋلىقتى اجەلەر قازاقى قوناقجايلىق پەيىلمەن شاشۋ شاشىپ قارسى الدى. قىمىز ازىرلەۋشىلەر قىمىز باپتاۋ بارىسىنداعى تاجىريبەلەرىمەن ءبولىستى. ال قوناقتار ىستىق باۋىرساق پەن قىمىزدان ءدام تاتتى. سونىمەن قاتار ارداگەرلەر «اۋىز تيۋ», «بيەبايلار» راسىمدەرىنە قاتىسىپ, ارنايى ۇيىمداستىرىلعان ءتۇرلى سالت-داستۇرلەر مەن سپورتتىق جارىستاردى, قولونەر كورمەلەرىن تاماشالادى. قاريالار كوپشىلىككە اق باتاسىن بەرىپ, ەلدىڭ تىنىشتىعى مەن اماندىعىن تىلەدى. اتالعان ءىس-شارا بارىسىندا تالاستىق ونەرپازدار ونەر كورسەتتى. قاراتاۋ اسپانىن ءان كەرنەپ, كۇي قالىقتادى. جيىندا حالىقارالىق Qazaqstan Dauiri جاۋاپكەرشىلىگى شەكتەۋلى سەرىكتەستىگىنىڭ باس ديرەكتورى, جامبىل وبلىسىنىڭ قۇرمەتتى ازاماتى ساۋلە مەشىتبايقىزى ءسوز الىپ, ءىس-شارانىڭ ماڭىزدىلىعىنا توقتالدى. سونداي-اق, قازاقتىڭ ۇلتتىق سۋسىنى قىمىزدىڭ قادىر-قاسيەتى جايلى ويىن ورتاعا سالدى.
جينالعاندار عاسىرلاردان عاسىرلارعا جالعاسىپ كەلە جاتقان ۇلتتىق قۇندىلىقتاردى قۇرمەتتەپ, ءداستۇردى دارىپتەگەن ەلدىڭ العا وزاتىنىن اتاپ ءوتتى. سونداي-اق قاسيەتتى سۋسىن قىمىزدى ۇلتتىق برەندكە اينالدىرۋ, ونى كەڭ كولەمدە ناسيحاتتاۋ, ول ءۇشىن ەلىمىزدە «قىمىزمۇرىندىق» ءداستۇرىن اتاپ ءوتۋدى جالپىحالىقتىق سيپاتقا اينالدىرۋ سەكىلدى ۇسىنىس-پىكىرلەرىن ورتاعا سالدى.
جامبىل وبلىسى