بيىل ناۋرىز ايىندا ەكىنشى دەڭگەيلى بانكتەردىڭ قارىز پورتفەلى 0,7 پايىزعا ارتىپ, 20,45 ترلن تەڭگەگە جەتكەن. ساراپشىلاردىڭ ايتۋىنشا, بانكتەر جەكە جانە زاڭدى تۇلعالارعا بەلسەندى نەسيە كومەگىن جاساپ جاتىر. بولشەك سەگمەنتتە كەپىلسىز نەسيە الۋ پروتسەسى تولىقتاي اۆتوماتتاندىرىلعان. كليەنتتەر تۇتىنۋشىلىق نەسيەلەردىڭ 50 پايىزىن ءموبيلدى قوسىمشا ارقىلى الۋعا ماشىقتانعان.
نەسيە بەلسەندىلىگىن ساقتاعان بانكتەر اراسىندا ForteBank (+10,9 پايىز, 1,02 ترلن تەڭگە) كوش باستايدى. بانكتىڭ جىلدىق ديناميكاداعى كورسەتكىشى دە جوعارى (+30,9 پايىز). ۇزدىك وندىقتاعى بانكتەر اراسىنان زايم كولەمىنىڭ ايلىق ءوسىمى بويىنشا ەكىنشى ورىندا «ەۋرازيالىق بانك» تۇر (+6,2 پايىز, 801,9 ملرد تەڭگە). جىلدىق ديناميكادا قارجى ينستيتۋتى 28,2 پايىز ءوسىم كورسەتكەن. ءۇشىنشى ورىندا – ايلىق 6,2 پايىزدىق وسىممەن «بانك تسەنتركرەديت». قارجى ينستيتۋتىنىڭ حالىققا بەرگەن نەسيە كولەمى 1,31 ترلن تەڭگەگە جەتكەن. ءبىر جىل ىشىندە بانك قارىز پورتفەلىن 18,2 پايىزعا دەيىن ۇلعايتا العان. بۇل بانكتىڭ بىرەر اپتا بۇرىن عانا رەسەيلىك ەنشىلەس «الفا-بانكتى» ساتىپ الىپ, ونى Eco Bank جاڭا برەندىمەن قايتا تىركەۋدەن وتكىزگەنىن دە ايتا كەتەيىك.
ايلىق ديناميكادا وڭ ءوسىم كورسەتكەندەر ىشىندە Halyk Bank (+2,7 پايىز) پەن Jusan Bank تە (+1,6 پايىز) بار. ال سوڭعى بىرەر اي كولەمىندە سانكتسيا سالدارىنان جاعدايى ۋشىعىپ, اكتسيونەرلەرىن اۋىستىرۋعا ءماجبۇر بولعان «سبەربانك قازاقستان» مەن «الفا-بانكتىڭ» ناۋرىز ايىندا قارىز پورتفەلدەرى مينۋس 4,6 جانە مينۋس 2,1 پايىزعا تومەندەپ كەتكەن. باسىنا مۇنداي جاعداي تۇسپەسە دە Kaspi Bank (مينۋس 2,3 پايىز) پەن «وتباسى بانكتىڭ» دە (مينۋس 1,5 پايىز) قارىز پورتفەلى كەرى كەتكەن.
ال قارىز پورتفەلىندەگى مەرزىمى وتكەن بەرەشەكتەردىڭ ۇلەسى ءساۋىر ايىندا 6,6 پايىزدى قۇراپتى. ءبىر اي بۇرىن – 6,8 پايىز, جىل بۇرىن 10,6 پايىز بولعان. سوماعا شاققاندا – 1,34 ترلن تەڭگە. جالپى, تولەنبەگەنىنە 90 كۇننەن اسقان نەسيەلەر ۇلەسى بۇكىل زايم پورتفەلىنىڭ 3,6 پايىزىن قۇرايدى. ءبىر اي بۇرىن – 3,5 پايىز, جىل بۇرىن 7,1 پايىز بولعان. سوماعا شاققاندا – 729,2 ملرد تەڭگە.