فرانتسيانىڭ ايگىلى TiJi بالالار تەلەارناسى ەندى قازاق تىلىندە حابار تاراتادى. بالالار جىلى اياسىندا قولعا الىنعان يگى جوبا اقپارات جانە قوعامدىق دامۋ مينيسترلىگى مەن فرانتسيانىڭ «Groupe M6» كومپانياسىنىڭ باستاماسىمەن قولعا الىنىپ وتىر.
وسىعان وراي اقپارات جانە قوعامدىق دامۋ ءمينيسترى اسقار وماروۆ «Groupe M6» كومپانياسىنىڭ تەلەارنالار مەن راديوستانتسيالار پورتفەلىن حالىقارالىق ديستريبۋتسيالاۋ جونىندەگى ديرەكتورى جان-رەنە وكۋتيۋرە جانە «لتي ۆوستوك» حالىقارالىق ديستريبۋتسيا جونىندەگى باس ديرەكتورى ماريا جابينا-پانتەليك جانە قازاقستان رەسپۋبليكاسىنداعى فرانتسۋز رەسپۋبليكاسى ەلشىلىگىنىڭ مادەنيەت جانە ىنتىماقتاستىق ماسەلەلەرى جونىندەگى كەڭەسشىسى الەكس بورتولانمەن كەزدەستى. كەزدەسۋ بارىسىندا تاراپتار بالالار ءۇشىن قاۋىپسىز اقپاراتتى قامتاماسىز ەتۋدىڭ ماڭىزدىلىعىنا توقتالدى.
ساراپشىلاردىڭ ايتۋىنشا, الدىن الا جۇرگىزىلگەن زەرتتەۋلەر مەن ساۋالنامالار ناتيجەسىندە قازاقستاندىق بالالاردىڭ وتاندىق ونىمنەن باسقا, اسىرەسە وسى TiJi ارناسىنىڭ ءونىمىن كوبىرەك كورەتىنىن كورسەتكەن. اۋدارما جۇمىستارى وتكەن جىلى باستالىپ, 70 ساعاتتىق تەلەونىم مەملەكەتتىك تىلدە دۋبلياجدالدى. ەستەرىڭىزگە سالا كەتەيىك, بۇل جوبانىڭ جۇزەگە اسىرىلۋىنا 2021 جىلى ايدا بالاەۆا باستاماشىلىق ەتكەن بولاتىن.
مەملەكەت باسشىسى قاسىم-جومارت توقاەۆتىڭ 2022 جىلدى «بالالار جىلى» دەپ جاريالاعانىن اتاپ وتكەن اسقار وماروۆ قازىرگى اقپاراتتىق عاسىردا بالالاردىڭ قارىم-قاتىناس ورتاسىن قالىپتاستىرۋدا مۋلتفيلمدەردىڭ ىقپالى زور ەكەنىن اتاپ ءوتتى. «مينيسترلىك الەمگە تانىمال مۋلتيپليكاتسيالىق بالالار ارنالارىن قازاق تىلىنە اۋدارۋ بويىنشا اۋقىمدى جوبانى ىسكە اسىرۋدا. بۇل بالالاردىڭ مەملەكەتتىك تىلگە دەگەن قىزىعۋشىلىعىن ارتتىرۋعا, سونداي-اق وسكەلەڭ ۇرپاقتى تاربيەلەۋگە سەپتىگىن تيگىزەتىنىنە سەنىمدىمىن», دەدى مينيستر.
كەزدەسۋ بارىسىندا جۋرناليستەردىڭ بىلىكتىلىگىن ارتتىرۋ, انيماتسيا ءوندىرىسى جانە مينيسترلىك جەتەكشىلىك ەتەتىن باسقا دا سالالار بويىنشا ەكىجاقتى ىنتىماقتاستىقتى دامىتۋ پەرسپەكتيۆالارى تالقىلاندى.
ايتا كەتۋ كەرەك, بالالار تەلەۆيزيالىق كونتەنتىن وندىرۋشىلەردى تاڭداۋ كەزىندە بالالار تەلەارنالارىنىڭ وسىنداي جوبالاردى ىسكە اسىرۋداعى تاجىريبەسى جانە حابار تاراتۋ تىلدەرىنىڭ سانى ەسكەرىلدى. ماسەلەن, TiJi ارناسىنىڭ 20 ەلدە 14 ءتۇرلى تىلدە حابار تاراتۋ تاجىريبەسى بار. تەلەارنانىڭ نەگىزگى ميسسياسى 2-دەن 7 جاسقا دەيىنگى بالالار ءۇشىن قاۋىپسىز اقپاراتتىق كەڭىستىكتى قامتاماسىز ەتۋ بولىپ سانالادى.
«قازاق ءتىلى – وتە باي ءتىل. وسى ءتىلدى كەڭىنەن ناسيحاتتاۋ ماقساتىندا قازاقستاندىق بالالار ءۇشىن ارنا قۇرۋدى قولعا الدىق. قازاق بالالارىنا ولاردىڭ مەملەكەتتىك ءتىلىنىڭ دامۋىنا ىقپال ەتەتىن ويىن-ساۋىق جانە ءبىلىم بەرۋ كونتەنتىن قالىپتاستىرۋدى ماقسات تۇتقان بىرلەسكەن بۇل جوبا – ءبىزدى وسىناۋ يگى ىسكە ىنتالاندىردى», دەپ اتاپ ءوتتى جان-رەنە وكۋتيۋرە.
قازىرگى تاڭدا قازاق تىلىندەگى TiJi اۋديوجولاعى الما تۆ, TV Commerce, قازاقتەلەكوم, فەرماتا پرك, قاينار مەديا (تالدىقورعان قالاسى), تەرالاين (نۇر-سۇلتان قالاسى), تتك (تەمىرتاۋ قالاسى) سەكىلدى وپەراتورلاردا قولجەتىمدى.