بۇگىن, 16 ءساۋىر كۇنى پارلامەنت ءماجىلىسىنىڭ وتىرىسىندا «رۇقساتتار جانە حابارلامالار تۋرالى» زاڭ جوباسى جانە وعان ىلەسپە زاڭدىق قۇجات ەكى وقىلىمدا قارالىپ, ماقۇلداندى. بۇل تۋرالى egemen.kz ءتىلشىسى حابارلادى.
نەگىزىنەن بۇل زاڭدىق قۇجات رۇقسات بەرۋ جۇيەسىن بىرىڭعاي قاعيداتتار مەن تاسىلدەردى پايدالانا وتىرىپ رەتتەۋگە باعىتتالعان. اتاپ ايتقاندا, ەلىمىزدەگى كاسىپكەرلىكتى ودان ءارى دامىتۋعا, ونىڭ قىزمەت اياسىن كەڭەيتۋگە مۇمكىندىك بەرەتىن بولادى. بۇل رەتتە تۇتىنۋشىلار, كاسىپكەرلەر جانە مەملەكەت مۇددەلەرى ناقتى ايقىندالىپ, مەملەكەتتىك ورگاندار قىزمەتىنىڭ اشىقتىعى مەن اقپاراتتىڭ قولجەتىمدىگى قامتاماسىز ەتىلەدى.
زاڭ جوباسى بويىنشا بايانداما جاساعان وڭىرلىك دامۋ ءمينيسترى بولات جامىشەۆ زاڭ جوباسىنىڭ ەلىمىزدەگى رۇقسات بەرۋ جۇيەسى پروبلەمالارىن شەشۋگە باعىتتالارىنان حاباردار ەتتى. ونىڭ مالىمەتىنە قاراعاندا, قولدانىستاعى رۇقساتتامالاردىڭ تولىق تىزبەسى جاسالادى. جاڭا رۇقساتتار بەرۋدى ەنگىزۋدە رەتتەۋشى اسەرلەردى تالداۋ قولدانىلادى جانە رۇقساتتار قاۋىپتىلىك دارەجەسى بويىنشا ساناتتارعا بولىنەدى. مينيستر سونداي-اق بارلىق رۇقسات بەرۋ راسىمدەرىن جۇزەگە اسىرۋداعى بىرىڭعاي ستاندارتتالعان تاسىلدەردى بەكىتۋ جانە «جالعىز تەرەزە» قاعيداتتارىن نەعۇرلىم كەڭىنەن قولدانۋ كوزدەلگەندىگىن دە ورتاعا سالدى.
زاڭ جوباسىندا رۇقسات پەن حابارلامانىڭ 54 پۋنكتىن جويۋ تەتىكتەرى كورىنىس تاپقانىمەن, ءالى دە 737-ءى قالىپ وتىر. «بىزدە كوپتەگەن ورگان وزىنە بيزنەستىڭ قانداي دا ءبىر دەڭگەيدە تاۋەلدى بولعاندى قالايدى. وسىمەن كۇرەسۋگە ءتيىسپىز. بۇعان بارىنشا سالماقتىلىقپەن قاراپ, شاعىن جانە ورتا بيزنەسكە بارىنشا جاعداي جاساۋىمىز كەرەك», - دەدى پارلامەنت ءماجىلىسىنىڭ توراعاسى قابيبوللا جاقىپوۆ وسىعان وراي.
اسقار تۇراپباي ۇلى.
دەرەككوز: egemen.kz.