باتىس قازاقستان وبلىسىنىڭ بايتەرەك جانە تەرەكتى اۋدانىندا بىرنەشە اۋىلعا قازاقى اتاۋ بەرىلىپ, وكرۋگ اتاۋلارى وزگەردى. وبلىس اكىمى مەن وبلىستىق ءماسليحات حاتشىسى قول قويعان قاۋلى جاقىندا ەلىمىزدىڭ ادىلەت مينيسترلىگىندە ءتيىستى تىركەۋدەن ءوتىپ, رەسمي كۇشىنە ەندى.
قازاق جەرىنە قاراشەكپەندەر اعىلعان ءحىح عاسىردىڭ سوڭى, حح عاسىردىڭ باسىندا باتىس قازاقستان ولكەسىنىڭ كوپ جەرى ونوماستيكالىق وزگەرىسكە ۇشىراعان ەدى. ەلىمىز تاۋەلسىزدىك الىپ, تۇعىرىمىز بەكىگەلى تاريحي ادىلەتتىلىك قالپىنا كەلۋدە. جاقىندا جەرگىلىكتى ونوماستيكا كوميسسياسى حالىق پىكىرىن ەسكەرىپ, «قازاقستان رەسپۋبليكاسىنىڭ اكىمشىلىك-اۋماقتىق قۇرىلىسى تۋرالى» قازاقستان رەسپۋبليكاسى زاڭىنىڭ 11-بابىنىڭ 4-تارماقشاسىنا سايكەس قورىتىندى شىعارعان. سوعان وراي باتىس قازاقستان وبلىسىنىڭ اكىمدىگى قاۋلىسىمەن, وبلىستىق ءماسليحات دەپۋتاتتارىنىڭ شەشىمىمەن بايتەرەك جانە تەرەكتى اۋداندارىنىڭ ءبىراز ەلدى مەكەندەرى مەن اكىمشىلىك-اۋماقتىق بىرلىكتەرىنىڭ اتاۋى وزگەردى.
سونىمەن بايتەرەك اۋدانى بويىنشا كراسنوۆ اۋىلدىق وكرۋگى – بەيبىتشىلىك اۋىلدىق وكرۋگى, كراسنوۆ اۋىلدىق وكرۋگىنىڭ پوگوداەۆ اۋىلى – بەيبىتشىلىك اۋىلى, كراسنوۆ اۋىلدىق وكرۋگىنىڭ كوتەلنيكوۆ اۋىلى – سىرىم باتىر اۋىلى, جەلەزنوۆ اۋىلدىق وكرۋگى – اتامەكەن اۋىلدىق وكرۋگى, جەلەزنوۆ اۋىلدىق وكرۋگىنىڭ جەلەزنوۆ اۋىلى – اتامەكەن اۋىلى, جەلەزنوۆ اۋىلدىق وكرۋگىنىڭ نوۆەنكي اۋىلى – قاينار اۋىلى, چەبوتارەۆ اۋىلدىق وكرۋگى – قۇرمانعازى اۋىلدىق وكرۋگى, چەبوتارەۆ اۋىلدىق وكرۋگىنىڭ چەبوتارەۆ اۋىلى – قۇرمانعازى اۋىلى, چەبوتارەۆ اۋىلدىق وكرۋگىنىڭ حامين اۋىلى – امانات اۋىلى, شالعاي اۋىلدىق وكرۋگىنىڭ كارپوۆو اۋىلى – تىڭدالا اۋىلى دەپ اتالاتىن بولدى.
ال تەرەكتى اۋدانىنداعى فەدوروۆكا اۋىلدىق وكرۋگى – تەرەكتى اۋىلدىق وكرۋگىنە, فەدوروۆكا اۋىلدىق وكرۋگىنىڭ فەدوروۆكا اۋىلى – تەرەكتى اۋىلىنا اينالدى.
وسىلايشا, باتىس قازاقستان وبلىسىنداعى بارلىق اۋدان اتاۋى تولىعىمەن قازاقىلاندى. قازاقستان رەسپۋبليكاسى پرەزيدەنتى قاسىم-جومارت توقاەۆتىڭ 2019 جىلعى 27 قىركۇيەكتەگى №19-32-20.357 تاپسىرماسىنا سايكەس ونوماستيكالىق اتاۋلاردى رەتكە كەلتىرۋ جانە يدەولوگيالىق تۇرعىدان ەسكىرگەن اتاۋلاردى ۇلتتىق تانىمعا جاقىن اتاۋلارمەن اۋىستىرۋ مىندەتى وڭىردە رەتىمەن جۇزەگە اسۋدا.
ارينە ونوماستيكا سالاسىندا وڭىردە ءالى كەزەڭ-كەزەڭىمەن اتقاراتىن شارۋا كوپ. ەندىگى كەزەكتە اۋىل مەكتەپتەرىنىڭ اتاۋلارىن اۋىستىرۋ, ءىرىلى-ۇساقتى ەلدى مەكەن اتاۋلارىن وزگەرتۋ سەكىلدى مىندەتتەر تۇر. مىسالى, بايتەرەك اۋدانىنىڭ وزىندە ءالى وسىنداي 40-قا جۋىق اۋىل بار ەكەن. اقجايىق, ءبورلى, تەرەكتى اۋداندارىندا دا وسى باعىتتا اتقاراتىن ءىس از ەمەس.
باتىس قازاقستان وبلىسى