2022 جىلعى ساۋىردە تۇرعىن ءۇيدى ساتىپ الۋ-ساتۋ بويىنشا 52520 مامىلە تىركەلدى. بۇل ناۋرىز ايىمەن (67 801) سالىستىرعاندا 22,5% كەم, دەپ حابارلايدى Egemen.kz ۇلتتىق ستاتيستيكا بيۋروسىنا سىلتەمە جاساپ.
ساتىپ الۋدىڭ ەڭ كوپ سانى قاراعاندى وبلىسىندا – 8 898, ودان كەيىن الماتى جانە نۇر-سۇلتان قالالارىندا, تيىسىنشە 6 583 جانە 5 900 شارت. ناۋرىز ايىندا دا ءدال وسى ءۇش ايماق تۇرعىن ءۇي نارىعىنىڭ ساۋداسىندا كوش باستاعان بولاتىن. مامىلە سانى ەڭ از بولعان ءوڭىر – سولتۇستىك قازاقستان وبلىسى (958).
قازاقستاندىقتاردى كوبىنە كوپپاتەرلى ۇيلەردەگى تۇرعىن ءۇي قىزىقتىرعان, بارلىعى – 38 149 مامىلە. كوپ پاتەرلى ۇيلەردەگى بولمەلەر سانى تۇرعىسىنان 2-بولمەلى پاتەرلەر سۇرانىسقا يە. ساۋىردە 15 مىڭنان استام 2-بولمەلى پاتەر راسىمدەلدى, ال 1-بولمەلىسى ودان ءسال از – 13 مىڭ. جەكە ۇيلەر بويىنشا 14 371 مامىلە راسىمدەلدى. جەر ۇيلەردى الماتى, قىزىلوردا جانە سولتۇستىك قازاقستان وبلىستارىنىڭ تۇرعىندارى قۇپ كورگەن.
2022 جىلعى ساۋىردە تۇرعىن ءۇيدى ساتىپ الۋ-ساتۋ مامىلەلەرىنىڭ سانى وتكەن جىلدىڭ ءتيىستى ايىمەن سالىستىرعاندا 12% كەمىدى. تۇرعىن ءۇي نارىعىنداعى مامىلەلەردىڭ وتكەن جىلعى ساۋىرمەن سالىستىرعاندا ەڭ كوپ كەمۋى ماڭعىستاۋ وبلىسىندا تىركەلدى - 48,9%.